1 Tẹsalonaikaapụ 5 - Ibani New Testament

Tẹ́lẹ́ma Kị́nị́nyánáḅọ Ma Ḅo Pịrị

¹ Wámịna Daa awọ, mịnanyẹ ma dada ḅo kiriakị bẹ sáá ma o bigha ḅẹ́ a anị gbolomanyẹ gịẹ ọ pịrị.

² Ọmịnị ḅụgbọrụ kọkọ nimi ḅẹ́ Kị́nị́nyánáḅọ ma pịghịma ḅo bẹ éné ma ḅobẹm fúrúḅọ ḅara dibie.

³ Túminị́ ḅẹ bẹ sáá ḅẹẹ, <> anịsáa anịị ḅụnimigha guluguluma nna ḅụ koro bẹnyẹ! Ákụ yii ọlọ ọ́rụ́ḅọ ḅụ kóró ḅara ma anịị anị nna ḅụ ḅo bẹ ḅara; mangị sọ bẹḅọ ofori.

⁴ Kụ́ma ọmịnị, wámịna Daa awọ, ọ kánákánábie ofori ḅẹ mị éné ma ḅoo ḅụnimigha ḅụ ọmịna akị fúrúḅọ ḅara ḅụ.

⁵ Ọmịnị kị́nị́mamgba ọmịnị baá ma owiapụ awọ na pịghị éné ma awọ; wamịnị dii bie awọgha anịgha kánákáná awọ.

⁶ Anịgo wamịnị isiapụ múnoarị ḅara pa mụ́nobịgha; wa múno ḅụ saghịbẹm sị pịghị ḅụ ọlọ.

⁷ Dii bie anịị túminị́ múno múnonyẹ; dii bie anịị túminị́ iru ḅụ tọ́rụ́ḅáma ḅáma nyẹ.

⁸ Kụ́ma wamịnị, éné ma nyẹ; anịgo wamịnị wa ḅụ ọlọbẹm. Wa minini na ḅẹlẹma suabẹm n gbolu daa kúkúbie gbẹ́nyẹ ḅara, na wámịna dụaḅọ́rọ́ma tọ́rụ́ dighinyẹ ma anịị wámịna ikúlélusú.

⁹ Tamuno wa sẹlẹakịgha ḅẹ wa ḅo ori igani tọ́rụ́siarị arịị, kụ́ma wa ḅo dụaḅọ́rọ́ma nyáná wámịna Nyáná ḅo Jizọs Krais ḅụ ḅọ́rọ́.

¹⁰ Wa sịbị goo fịị ḅo sị wamịnị ọ nana duma bẹ ḅara, wa fịị o, wa duma o, o ḅoo bẹ sáá.

¹¹ Anịgo, ọ jụghọ jụghọ tẹ́mẹ́ kụrọma ọ pịghị ḅárásua jụghọ jụghọ pịrị, mị́sa ọ mịẹarị ḅara ma.

Kunema Againma Na Sịbịpị

¹² Wamịnị ọ tẹ́ghẹ̄m, wámịna Daa awọ, ḅẹẹ ọmịnị ibima ọmịna ogboku bie fịrịnwangịarịapụ ma osii, ọ datụ́ghụ́ma pịghị againma pa ọ pịrịarịapụ Krais asọ ma ḅụ.

¹³ Ọ dụḅaḅá kuu pa n pịrị, ọ pịghị n ḅẹlẹma n nwángịarị fịrị ma gosi, ọ pịghị diin ḅụ jụghọ jụghọ na ngaa.

¹⁴ Wa pịghị ọ tẹ́ghẹ̄m, wámịna Daa awọ, ọ mini fịrịnwangịghaapụ ma birinụ́nụ́ ḅẹẹ, nnị ọkọ mịẹma, nnị ḅáláfáarịapụ ma kúkúbie kụrọma, ḅárásua ḅárásua biapụ pịrị, mgịrịma nyáná kị́nị́mamgba pịrị.

¹⁵ Arịị ḅẹ́ gbẹ́rẹ́ḅọ sọ siinyẹ pa siinyẹ gbẹ́gha, kụ́ma sámámgba pa ọmịna mịẹmịẹnyẹ mịẹsị ibi mịẹ jụghọ jụghọ pịrị na pịghị kị́nị́mamgba pịrị.

¹⁶ Bieḅẹlẹ sámámgba,

¹⁷ Tẹ́ghẹ̄ẹ̄ sámámgba ḅụ,

¹⁸ Nyẹ gonyẹ́ gonyẹ́ ḅụ ịmịẹḅam pa Tamuno ḅẹẹ. Mịị anị Tamuno i ḅara binyẹ Krais Jizọs bie.

¹⁹ Tọ́ntọ́ Tẹ́mẹ́ ma kikima.

²⁰ Tẹ́mẹ́ ma ḅara saghị ḅo oku dighisima ma.

²¹ Nyẹ gonyẹ́ gonyẹ́ daádighi, ibinyẹ ma ọlọ kụ́rọ́maá.

²² Arịị ḅẹẹ i siiamịẹnyẹ na mịẹnyẹ nyánágha.

²³ Diin pa wa pịrịarị Tamuno ma, mịẹsị ọ tọ́ntọ́ ḅụ fịnị asọ mamgba ḅụ, sị pịghị ọmịna duma gbọrụ, tẹ́mẹ́ na biebẹ duma na oju ma wárii, bịpị anị ḅụ labịgha ḅara ḅụ, wámịna Nyánáḅọ Jizọs Krais ma ḅo ḅụ.

²⁴ Ori ọ sịḅọ ma ori anị mịẹbẹm, tegó o minini nyẹ ọ mịẹbẹm.

²⁵ Wámịna Daa awọ, ọ tẹ́ghẹ̄ wa pịrị.

²⁶ Kị́nị́nyánáḅọ ḅụ mininiapụ ma bii, tọ́ntọ́ ḅara ḅụ jụghọ jụghọ ḅolo.

²⁷ A kụrọma dughoarị, Kị́nị́nyánáḅọ pa i pịrị kụ́rọ ḅụ ḅẹẹ, ị mị diri ma goo mininiapụ mamgba pịrị.

²⁸ Wámịna Nyánáḅọ Jizọs Krais tọ́rụ́kụrụkụ́rụ́ ọmịnị na fịnịị.