1 Tẹsalonaikaapụ 4 - Ibani New Testament

Tamuno Tẹ́mẹ́ Ḅẹlẹma Duma

¹ Kunemaá, wámịna Daa awọ, ọ wámịna ḅara dawọḅomam ọ duma kọọ bẹ ḅara sị anị Tamuno ḅụ ḅẹ́lẹ̄. Mị ḅara ma anịị o duma kọọarị ḅara. Mị́sa wamịnị ọ tẹ́ghẹ̄m opuma ḅẹ́ Kị́nị́nyánáḅọ Jizọs ẹrẹ ḅụ ọmịnị ibi mịma nẹ́ngị ḅara pa duma kọọ.

² Tegó, ọ kọkọ nimi wa dugho ọ pịrịnyẹ ḅẹ ọ mịẹ, mịná againma ma Jizọs Krais ḅara anịị anị sághị ḅo nyẹ.

³ Ḅẹẹ mịị Tamuno binyẹ, ḅẹẹ ọ tọ́ntọ́ ḅụ fịnị ḅẹ́, gbẹ́rẹ́ḅọ sọ yáakuu ḅụ ófórigha nwángị kọma, ọkọfịnị nyẹ ḅụ ọ gbẹ́rẹ́ sáá ọ ḅụ fóofóo ma.

⁴ Ọmịna ḅụ gbẹ́rẹ́ḅọ gbẹ́rẹ́ḅọ sọ nimi n ḅọ amịna oju pa duma kọọ bẹ ḅara, tọ́ntọ́ ḅụ na pịghị kuu nyáná ḅara ḅụ,

⁵ Yáakuu ḅụ ofori nwángị ḅụghaa, Juughaapụ ḅara Tamuno nímighaapụ.

⁶ Mị ḅẹ́rẹ́ ma ḅụ, gbẹ́rẹ́ḅọ sọ amịna Krais asọduaḅọ mị́naḅọ irima ma anịgha inomaa. Wa parị mịma dugho ọ pịrịmam pịghị kụ́rọ́ma o birinụ́nụ́ ḅẹ Kị́nị́nyánáḅọ anị nyẹ ma mịẹapụ pa tọ́rụ́siarịmabẹm.

⁷ Tamuno wa sịgha ḅẹẹ wa ḅo yáakuu ḅụ ofori nwángị kọọ, kụ́ma wa tọ́ntọ́ ḅụ fịnị.

⁸ Anịgo mị dienyẹ ma sịghịḅọ gonyẹ́ gonyẹ́ tumḅọ sịghịghaa kụ́ma Tamuno anịị n ḅo sịghịḅọ ḅo ori Tọ́ntọ́ Tẹ́mẹ́ ma pa ọ pịrịarị ḅo.

⁹ Mịnaapụ ma ḅẹlẹma gbolomanyẹ, o bigha gbẹ́rẹ́ḅọ sọ anị gbolomanyẹ gịẹ ọ pịrị Tamuno ọ ḅara na pa o diemam ọ jụghọ jụghọ ḅẹlẹma bẹ ḅara.

¹⁰ Ọ pịghị mị ḅara ma pa Krais ḅụ mininiapụ mamgba na ngáamam Masidoniya gbọrụ ḅụ. Anịgo, wamịnị ọ tẹ́ghẹ̄m ḅẹ́ ọ mịma nẹ́ngịma ibiḅara pa angaá.

¹¹ Pa ọmịna fịrị mịẹ ḅẹ ọ diin duma kọọm, tọ́rụ́ pa jẹ́apụ nyẹ bie suama, ọmịnị ọmịna ḅara pa fịrịnwangị ọ ḅụ pịrị, wa parị dugho ọ pịrị ḅara.

¹² Mị ḅara ma Tamuno nimigha na mininighaapụ ma ọmịnị osibẹm ọ pịghị gbẹ́rẹ́ḅọ sọ tọ́rụ́ dighibịgha ọ pálịma nyẹ gosi.

Kị́nị́nyánáḅọ Ma Ḅoo

¹³ Wámịna Daa awọ wa bim ọ karakárá ma nimi fịịmaapụ ma gbolomanyẹ, sị ọ tẹ́mẹ́ si nyánábịgha ḅara tọ́rụ́ dighinyẹ nyánágháapụ ḅara.

¹⁴ Wa mininim ḅẹ́ Jizọs Krais fịịm pịghị fịị ḅụ saghị anịgo wa mininim ḅẹ́ Tamuno n nụ́nụ́ ọ ḅụ pịrịbẹm nnị na Jizọs na, anịị Krais ḅụ minini sị fịịmaapụ.

¹⁵ Mị́sa wa pa o diearịnyẹ ma anịị Kị́nị́nyánáḅọ ma dienyẹ: wamịnị dumafịnị mú Kị́nị́nyánáḅọ ḅoo bẹ ene laapụ ma fịịmaapụ ma ḅụ tórúku sọbịgha.

¹⁶ Kị́nị́nyánáḅọ ma sobie sághị kóróḅobẹm kụrọ owupugho pa, sookumuḅọ ma sịbịdáḅọ pụghọ pa, Tamuno ọdụ ofúrobẹm. Anịsáa, Krais ḅụ minini sị fịịmaapụ ma tarị saghịbẹm.

¹⁷ Wamịnị dumafịnịapụ ma, anịsáa ma ḅụ n wamịnị na n nana kobirịbẹm so tọ́rụ́, sị wa mú Kị́nị́nyánáḅọ ma na dona fọ́rụ ma bie. Anịị wa Kị́nị́nyánáḅọ ma na fịnị bẹ ḅara mú gbámásó láa.

¹⁸ Anịgo ọ mịị ẹ́gẹ́rẹ ma pa jụghọ jụghọ tẹ́mẹ́ kụ́rọ́ma.