1 Tẹsalonaikaapụ 3 - Ibani New Testament

¹ Kunemaá, wamịnị ine daagha sáá, anị wa ḅẹnyẹ ḅẹ́ wamịnị ngéré Atensi ḅụ fịnịbẹm.

² Wa wámịna numboru owitụ́wọ Timoti fịrịmam, wamịnị na Tamunofịrị ma nwangịarịḅọ Krais ibi oku ma dugho wásáma ḅụ. Wamịnị ọ fịrịmam ḅẹ́ ọ ḅo ịnyọ pa ọ ḅụ sua pịghị ḅárásua ọ pịrị ọmịna minini ḅụ,

³ gbẹ́rẹ́ḅọ sọ ọḅụ dabịgha ḅara mịná tọ́rụ́siarị ma gosi. Ọmịnị ḅụgbọrụ nimim ḅẹẹ Tamuno mị tọ́rụ́siarị ma warisom ḅẹ́ anị wa láa.

⁴ Wa pa ọ nána fịnị sáá, wa dugho ọ pịrịm nịị anị kiriakịgha sáá, ḅẹ́ nnị wa pa tọ́rụ́siarịmabẹm; ọ pịghị ibima nimiḅara, anịị anị pịghị pághá ḅara.

⁵ Anịị a go Timoti fịrịma nyẹ. A mịnị ine anị dagha sáá, a ọ fịrịmam ḅẹ́ o ḅo ọmịna minini gbolomanyẹ dọghụpágháma ḅoo. A ine ịḅụ ọlọgha, ḅụḅáláḅálá pa i tẹmẹ pịrịgha pa ḅẹ́ ẹ́kpẹ́dua ma ọ daádighim si wámịna fịrị mamgba sọ ḅo papanyẹ soarị.

Timoti Ori Tẹ́mẹ́kụ́rọma Ẹ́gẹ́rẹ́

⁶ Mị́sa Timoti sóḅomam, ọ pịghị ọmịna minini na ọmịna ḅẹlẹma gboloma bieḅẹlẹma oku ma akuomam. O dugho wa pịrịmam ḅẹẹ sámámgba ọmịnị ibi kóróma nyáná wa pịrịarị, ḅẹẹ o biarị ọmịnị wamịnị árị bẹ ḅara, wamịnị sọ dọghụarị ḅara wamịnị ọmịnị arịị.

⁷ Wámịna Daa awọ, wámịna ḅụḅáláḅálá na wámịna tọ́rụ́siarị mamgba ḅụ, ọmịnị wámịna tẹ́mẹ́kụ́rọmamam, ọmịna minini anịị pịghị tẹ́mẹ́kụ́rọ ma pa wa pịrịnyẹ.

⁸ Tegó ḅẹ́ mị́sa ma ḅụ wa tụmasi dumam, ọ ḅọ́rọ́ sẹ kụrọ ị́yẹ́ Kị́nị́nyánáḅọ na gbẹ́rẹ́nyẹ mịẹ duma ma ḅụ.

⁹ Ḅẹ́ mị́sa ọmịna sịbị goo wamịnị ine imiẹḅa pa Tamuno ḅẹẹbẹm. Wa ịmịẹḅam pa ọ ḅẹẹm wá nyáná bieḅẹlẹ ọ toruku, ọmịna sịbị goo.

¹⁰ Dii na ḅá na wamịnị wa tẹ́mẹ́ gbọrụ pa ọ tẹ́ghẹ̄m ḅẹẹ ọ wa wáriso wamịnị ine tọ́rụ́ pa ị́yẹ́ árị sị i binyẹ ị́yẹ́ minini ḅụ anị pa ị pịrị.

¹¹ Tamuno wámịna Daḅọ ma na wámịna Nyánáḅọ Jizọs asọ findi wa pịrị wa ọ fịnịnga ḅoo!

¹² Kị́nị́nyánáḅọ ma mịẹsị ọ nyáná jụghọ jụghọ pịrị ḅẹlẹma na ọ nyáná kị́nị́mamgba pịrị ḅẹlẹma opuma sẹnị sị ḅoo wa nyáná ọ pịrị ḅẹlẹma la ḅara láa.

¹³ Mịị ḅara ma ori ịnyọ pa ọ ḅụ suabẹm sị mịẹsị ọ kpain pịghị tọ́ntọ́ ḅụ fịnị wámịna Tamuno na Daḅọ ma toruku, wámịna Nyánáḅọ Jizọs ḅo bẹ sa ori na ori tọ́ntọ́apụ.