1 Tẹsalonaikaapụ 2 - Ibani New Testament

Pọl Fịrị Tẹ́salonaika Ḅụ

¹ Ọmịnị wámịna Daá awọ nimim ḅẹ́ wámịna ọ damaḅo ma papanyẹ sọgha.

² Ọ kọkọ nimi nnị wa pa tọ́rụ́siarịma ḅara pịghị wa wirikọsị ḅara Filipai ḅụ na wamịnị ọ dámaḅogha sáá Tẹ́salonaika ḅụ. Anịsọnị ḅẹ́ tọghaapụ mini wa pịrịgha, kụ́ma wámịna Tamuno kụrọ kúkúbie pa wa pịrịm sị wamịnị ine ọ ḅarabie saghị ḅo ibi oku ma dugho wásáma ọ pịrịm.

³ Wa kọọ ọ pịrị ẹ́gẹ́rẹ́ ma gbẹ́rẹ́ siinyẹ sọ nyanagha anị bie. Wa pịghị wámịna kóróma ḅụ ḅọ́rọ́ ẹ́gẹ́rẹ́ kọọgha, wamịnị ẹ́gẹ́rẹ́ ma kọarị sáá. Wa pịghị mịná ẹ́gẹ́rẹ́ ma kọọgha pa oḅori pa ọ sịị́.

⁴ Anịmanakaragha, wamịnị ẹ́gẹ́rẹ́kọarị Tamuno bi ḅara, tegó ọ́ wa daádighiman sị árị ḅo ḅẹ́ ori ine mị ibi oku dugho wásáma pa wa ḅarabie suabẹm. Wamịnị asọ dọghụgha ḅẹ wa túminị́ tẹ́mẹ́ mịẹ ḅẹ́lẹ́maa, kụ́ma Tamuno tẹ́mẹ́ mịẹ ḅẹ́lẹ́maa, anịị wa mịẹarịnyẹ ori ma anịị pịghị wámịna tẹ́mẹ́bie nimiḅo.

⁵ Ọ Kọkọ ibima nimi ḅẹ wa ḅẹlẹ bịpị ẹ́gẹ́rẹ́ pa ọ́ dámaḅogha anịgha wa ọ damaḅo so ḅọ́rọ́ wamịnị ibi oku ma pa sọ́nyẹ mịẹ dọghụnyẹ ọmịna ḅara. Tamuno anịị wámịna onyésẹ̄ḅọ.

⁶ Wa gbẹ́rẹ́ḅọ sọ mịẹgha ḅẹ n ḅo wa túminị́, wamịnị ọmịna ḅara bighaa anịgha jẹapụ ḅarabie.

⁷ Krais fịrịmaapụ ḅara, wamịnị ine ọ ḅara nyẹ́bibẹm. Kụ́ma wa diin ḅara pa ọ nana mịẹm wamịnị ọ nana fịnị sáá, nyingiḅọ árị awọ siḅearị ḅara.

⁸ Wa nyáná ọ pịrị ḅẹlẹma gosi, wa tẹ́lẹ́mamam ibi oku ma ngéréghaa wa dugho wásáma ọ pịrị ḅẹnyẹ kụ́ma wámịna duma sọ tegó ọmịnị opuma wa ḅụ nyẹ́lam.

⁹ Wámịna Daa awọ, ọ kọkọ biekóróma wa nwángị kụ́rọ́fịrị, dii na ḅa na wa wámịna ḅara pa fịrịnwangịm sị wa ḅụḅáláḅálá dighi gbẹ́rẹ́ḅọ sọ pịrịbịgha ḅara, wa Tamuno ḅara saghị ḅo oku ma dugho wásáma ọ pịrị ḅara.

¹⁰ Ọmịnị wámịna onyésẹapụ anị Tamuno sọ sẹ wa pịrị ḅara ḅẹ wámịna mịẹnyẹ ọmịnị mininiapụ ma tórúku, fiafiam, karakáram pịghị bịpị ḅụ láanyẹ nyanagha.

¹¹ Ọ kọkọ nimi ḅẹ́ wamịnị ọ́rụ́ḅọ ọ́rụ́ḅọ na mịẹm, nyingiapụ na daapụ nna awọ na mịẹ ḅara.

¹² Wamịnị ọ tẹ́mẹ́ kụ́rọ́mam, wamịnị o bie diinmam, wa pa dugho ọ pịrịarị ḅẹẹ, ọ sị Tamuno ma ḅẹ́ o ḅoo diekiri nyáná ori amadakiri na, ori ipine ḅụ, ọmịnị ọ ḅụḅẹlẹ duma kọọ.

¹³ Jẹ́nyẹ imi wa go sámámgba ịmịẹḅam pa Tamuno ḅẹ́arịnyẹ, wa Tamuno oku ma akuoo ọ pịrị sáá, ọmịnị anị naam pịghị anị daakị, o tumḅọ ḅara ḅo oku pa anị daákịgha kụ́ma Tamuno ḅara saghị ḅo oku, anịị pịghị anịị, ḅẹ́ Tamuno ọmịnị mininiapụ ma duma bie fịrịnwangịarị.

¹⁴ Wámịna Daa awọ, ọ ḅụ pághányẹ anị pịghị Judiya ḅụ fịnị Tamuno sọsị sọsị ma ḅụ pághányẹ, na anị ngá fịnị sị Krais Jizọs ḅụ mininiapụ. Ọmịnị árị tọ́rụ́siarị ma ọmịna amaapụ ma ḅara anịị nnị pịghị árị tọ́rụ́siarị Juuapụ ma ḅara.

¹⁵ Kị́nị́nyánáḅọ Jizọs na ikiakoroapụ ma ḅáapụ, sị pịghị wa deepágháma. Nnị Tamuno igánimam, warị kị́nị́mamgba iruonaapụ sọ!

¹⁶ Nnị asọ dọ́ghụm wa kiki bẹ ḅara, wa Juughaapụ dụaḅọ́rọ́ma akuoo bẹ oku ma dugho wásámabịgha ḅara. Mịị ḅara ma n mịẹarị siiamịẹnyẹ ma, n mịẹmam anị ḅo káara bifụfụụ́. Kunema Tamuno igani ḅo nna sịbị gbanamam.

Anị Pọl Tarịarị Bẹ O Sima Nnị Dámámuu

¹⁷ Kụ́ma wamịnị, wámịna Daa awọ ma, n wa fóofóo ma sa ọ fịnị angaá kálá sáátụọ ḅụ, wámịna kóróma ḅugha kụ́ma ojumẹnị ḅụ ngéré wamịnị ịnyọsua ḅara ḅẹ́ wa sima ọmịnị arịị!

¹⁸ Wa bim wa sima ọ damaḅo. Irị ị ḅụgbọrụ asọ dọ́ghụm ḅẹ́ a pịghịma mú a gbẹ́rẹ́ sáá nẹ́ngị nyẹ pa asọ dọ́ghụm, kụ́ma ẹ́kpẹ́dua mini wa pịrịgha.

¹⁹ Ọmịnị ma, ọmịnị ma ngéré jẹ́apugha anịị wámịna tọ́rụ́ dighinyẹ, wámịna bieḅẹlẹ wa go pịghị bịpịkpọarị nyẹ Tamuno wa pa nwángị kárámá maá fịrị Wányánáḅọ Jizọs Krais tórúku o ḅo bẹ sáá.

²⁰ Karakáráma, ọmịnị anịị wa pa bịpịkpọarịapụ na pịghị wámịna bieḅẹlẹ!