1 Pita 5 - Ibani New Testament

Pita Pa Sẹnịapụ Na Ásáawọ Pịrị Againma

¹ Irị ịḅụ gbọrụ sẹnịḅọ, ọmịna bie fịnị sọsị sẹ́nịapụ ma tẹ́ghẹ̄m. Ḅẹ́ ịrị a tọ́rụ́ na Krais tọ́rụ́siarị ma arịm, a pịghị diekiri nyánábẹm ori ipine ma ḅụ, anị ḅụ diepágháma bẹnyẹ.

² A ọ tẹ́ghẹ̄m ḅẹ́, ọmịnị ánánákúrúapụ sọ Tamuno pa ọ pịrị ánánáawọ́ ma pịrị, ọmịnị ọ tẹ́mẹ́bie gbọrụ pa n siḅe Tamuno ma bi ḅara. Ọ mịẹma sọ́ḅọ́rọ́ nnị pa ọ kọngọ kpọm ọ pịghị mịẹma igbii go. Kụ́ma kúkúbie fịrịnwangị Tamuno ma pịrị dọghụ tẹ́mẹ́.

³ Ọ kị́nị́nyánáapụ dighi Tamuno pa ọ pịrị ánánáawọ́ ma pịrịma, kụ́ma n siḅe sị nnị ọ duma kọọ ḅara pa duma kọọ.

⁴ Sị sịbịda Ánánákúrúḅọ ma ḅo sa ọmịnị ipine ogunu nyáná bẹ ḅara anị baá jẹ́ éné jẹ́ éné sịrịfabịgha nyẹ.

⁵ Anị gbẹ́rẹ́ ḅara ma ọmịnị ásáawọ ọmịnị ọ tórúku sẹ́nịapụ ma osii. Ọ ḅụ́sitéréma fịrịnwangị jụghọ jụghọ pịrị. Tọ́ndiri ma dugho ḅara ḅẹ́, Tamuno opuamịẹnyẹapụ ma daá sẹ́ma sẹ́mam kụ́ma ọrẹ ḅẹlẹma pa ḅụ sitérémaapụ ma die.

⁶ Anịgo ọmịnị ọmịna ḅụ sitéréma Tamuno ma opu ḅara sughubie fịnị, si ọrẹ karakárá sa ḅụ ori ọ saghị sóghóloma bẹ ḅara.

⁷ Ị́yẹ́ ḅụḅáláḅálá mamgba pa ọḅụ gbii, tegó ori ma anịị o sịḅẹarịḅọ

⁸ Tẹ́lẹ́ma, ọ tọ́rụ́ findi warị! Ọmịna iruonaḅọ Ẹ́kpẹ́dua ma, ikelekelema ḅọ́rọ́arị o kuu kaa pẹẹ́ bẹḅọ dọghụarị.

⁹ Ọ sẹ́kụrọ ọmịna minini ḅụ, ọ daa sẹ́ma ọ kọkọ nimi bẹ ọmịna jẹ́ mininiapụ tuminikiri gbọrụ ḅụ nnị sọ mị gbẹ́rẹ́ tọ́rụ́siarị ma árịarị.

¹⁰ Ọ kẹ́lẹ́ tọ́rụ́siarị so sáá, tọ́rụ́kụrụkụ́rụ́ mamgba nyáná Tamuno ma, ọ sị ḅo bẹ ọ ḅo diekiri nyáná ọrẹ gbámásó ipine ma ḅụ Krais bie, ori ma pịghị ọ mịẹ kpaimabẹm, pịghị ọ sẹ kụ́rọ́mabẹm pịghị ịnyọ, na pịghị karakárá súghúise pa ọ pịrị.

¹¹ Kụ́rọ ma fịnị ọ pịrị gbáso. Anị ọkọ fịnịị.

Kunema Sịbịpị

¹² Sailas a minini akị ḅo ḅẹ́ ori karakáráma Krais asọduaḅọ, ori anị ḅárásua si a mị kálá ábálálá ma gịẹ ọ fịrịma ḅọ. A ọmịna tẹ́mẹ́ kụrọma dọ́ghụm sị ị́yẹ́ dugho págháma nyẹ ma dugho ḅẹ́, mị anị Tamuno karakárá tọ́rụ́kụrụkụ́rụ́ ma anị ḅụ sẹ kụrọ.

¹³ Babịlọn ḅụ fịnị sọsị ma, Tamuno pịghị ọmịnị na sẹlẹakịapụ, oku fịrịmam ḅẹ́ a obíí, Mak i tụwọ sọ ḅẹm a obii.

¹⁴ Ọ Krais ḅẹlẹma ma pa jụghọ jụghọ ḅolo. Ọmịnị Krais bie fịnịapụ ma diin ọmịnị mamgba na fịnịị.