1 Pita 2 - Ibani New Testament

¹ Tọ́rụ́kịrịkị́rị́ siiamịẹnyẹ gonyẹ́ gonyẹ́ pa angaá ḅọ́rọ́, mịnị epele ti ma anịgha mmẹẹ́ tọ́rụ agidi duma kọọ anịgha jughonyẹ mọnị anịgha wirinumo ẹ́gẹ́rẹ́kọọ.

² Ọmịnị nnị ịwọma yii awọ fịnị ḅara fịnị, sámámgba karakárá tẹ́mẹ́ju ndomingi ma ọ pụghọ tarị, tegó ọmịnị anị ḅụarị sáá ọmịnị ine sẹ́nị págháḅobẹm ọmịna dụaḅọ́rọ́ma ḅụ,

³ mị́sa ọ dọghụ pághámaḅomam ḅẹ́ Kị́nị́nyánáḅọ ma ori ibim.

Dumafịnị Dapịrị Na Nnị Sẹlẹakịapụ Ma

⁴ Ọ Kị́nị́nyánáḅọ ma damaḅo, túminị́ dighisima ḅẹ́ nyẹ́ḅụoforị dumafịnị dapịrị, Kụ́ma Tamuno ọ ḅara na sẹlẹakị sị nyẹ́ḅụ sọ́nyẹ.

⁵ Mị́sa ọ fịnị ḅara sọ́ḅọ́rọ́ dumafịnị dapịrị nnị pa tẹ́mẹ́ju warị námáarị nyẹ. Ọmịnị sọ pịghị tọ́ntọ́ igwagwaapụ, Jizọs Krais ḅárásua ḅụ ḅọ́rọ́ ọ Tamuno ḅẹ́lẹ́maarị igwaa gwaabẹm.

⁶ Tọ́ndiri ma dughom ḅẹ́: <>

7 Mị dapịrị ma anị opuma nyẹ́la ọmịnị mininiapụ ma pịrịm, kụ́ma mininighaapụ ma: <>

⁸ Tọ́ndiri pịghị dughom ḅẹ́, <> Nnị peelem, nnị ẹ́gẹ́rẹ́ ma minini akịịghaa gosi, mịma anị Tamuno ma tọ n pịrị ḅara.

⁹ Kụ́ma ọmịnị anịị n sẹlẹakịmaapụ ma, Ámányánáḅọ ma igwagwaapụ, Tọ́ntọ́ sẹ, Tamuno ḅárákúu túminị́, n sẹlẹakị sị nnị Tamuno ḅụ́gbérépuma fịrị ma dugho págháma, ọ sị ákịḅọ kánákánábie sị o ḅo ọrẹ ḅụ́gbérépuma baá ma bie so.

¹⁰ Gbẹ́rẹ́sa biri imi o túminị́ ḅụ ofori, kụ́ma mị́sa ọmịnị ori a túminị́, gbẹ́rẹ́sa biri ọ Tamuno lolomakúkúbie nimigha kụ́ma mị́sa ọmịnị ọrẹ lolomakúkúbie nyanaḅomam.

Tamuno Fịrịnwangịapụ Ḅara Pa Duma Kọọ

¹¹ A ọ tẹ́ghẹ̄m ịyẹa nángwọ́apụ igoniapụ na biaapụ na mị tuminikiri, ọmịnị sa nyána oju bie mẹnị tarịarịnyẹ ma pịrịma, owu pa sámámgba biebẹ duma ma pághámaarị nyẹ.

¹² O mịná mịẹnyẹ mininighaapụ ma tórúku gbụ́nụ́nụ́ na ibim, si, nnị ẹ́rẹ́ pa o sịarị sáá ḅẹ́ ọ siinyẹ mịẹm, nnị ọmịna ibifịrị lighilighiḅobẹm si Tamuno ma boma o ḅo bẹ éné.

¹³ Kị́nị́nyánáḅọ ma go, ọ ḅụsímínímá túminị́ pa sịbịdaapụ mịẹapụ ma gonyẹ́ gonyẹ́ pịrị, ḅọ́rọ́ ámányánáḅọ ma anịị sóghólóḅa kụ́rọ nyánáḅọ,

¹⁴ pịghị ọ tọ ḅẹ́rẹ́tọapụ ma, ḅẹ́ n siinyẹ mịẹapụ ma pa tọ́rụ́siarịma pịghị ibinyẹ mịẹapụ ma túminí.

¹⁵ Tamuno bim ḅẹ́, ọmịnị ọmịna ibifịrị ḅụ ḅọ́rọ́ o nyẹ ḅụ ófórigha oḅoriapụ ma bịpị pụ́ma nna oḅori ẹ́gẹ́rẹ́ ḅụ.

¹⁶ O duma kọọ furoawọ ḅara, kụ́ma ọmịnị ọmịna furoawọ kiri ma pa ọ mịẹarị siiamịẹnyẹ ma gbẹ́ẹ̄ ma. Kụ́ma ọ duma kọọ Tamuno fịrịnwangịapụ ḅara.

¹⁷ Ọmịnị osigha nyáná kị́nị́mamgba pịrị, ị jẹa mininiapụ ma ḅẹlẹma, ọ Tamuno dighi ḅáláfaa, kuu pa ámányánáḅọ ma pịrị.

¹⁸ Ómóniapụ ọ ḅụsímínímá ọmịna nyánáapụ pịrị, pịghị karakárá osigha nyáná n pịrị, ibi pịghị diin ḅara pa ọ nana ngaapụ ngéréghaa kụ́ma ọmịnị mbasịariapụ sọ.

¹⁹ Tamuno bieḅẹlẹarị tegó, ḅọ́rọ́ ori ẹrẹ́sị tumḅọ árị na ibighaa tọ́rụ́siarị arịị sa.

²⁰ Anị tẹ́ sọ́nyẹ sọ ọ pịrịbẹ, ọ ḅọ́rọ́ fomḅara daá ọ mịẹ siiamịẹnyẹ gosi, warị ngịrịma nyáná anị pịrị? Kụ́ma ḅọ́rọ́ o fomḅara dam o karakárányẹ ma mịẹ sáá sị ngịrịma nyáná anị pịrịị, Tamuno o dighi bieḅẹlẹbẹm.

²¹ Mịma sịbị go anịị Tamuno go ọ sị nyẹ ḅẹ́ Krais ọ ḅụgbọrụ tọ́rụ́siarị ọ pịrịm ọ pa ọ ḅarabie nyẹ dáwọ sị ọ ḅụọ dua.

²² <<Ọ mịẹ siiamịẹnyẹ sọ ofori anịgha ọ bịpị págháḅo epele naaḅọ sọ ofori.>>

²³ Nnị o wiri sa, ori jẹ́ wirinumo pa n pagharagha, ọ tọ́rụ́siarị sa, o kam kórógha, kụ́ma ọ ḅụ saghị Tamuno ma ḅárásua, karakárá ḅẹ́rẹ́kọḅọ ma.

²⁴ Krais o ḅụgbọrụ wámịna sii ma dighiákịm ori oju mgbẹsẹ sị́ ma ọgọnọ, si wa fịị́ siiamịẹnyẹ pịrị, sị duma karakárányẹ ma pịrị, ori oju kii ḅụ ḅọ́rọ́ anị ọ ḅụ gwọọ nyanamaá nyẹ.

²⁵ Asọ irimáa ánáná fịnị ḅara anị ọ fịnị ḅára, kụ́ma mị́sa ọ pịghịma ḅo ọmịnị Ánánákúrúḅọ na pịghị o mịná biebẹ duma Kokoarịḅọ ma pịrịmam.