1 Kọrịntịapụ 8 - Ibani New Testament

Nnị Pa Igwagwaá Pa Nnị Kárá Tamuno Pịrị Fị́nyẹ

¹ Mị́sa ọ gịẹnyẹ ma gbolomanyẹ anịị nnị pa igwagwaá n kárá tamuno pịrị fị́nyẹ. Karakárányẹ ḅẹẹ, wamịnị kị́nị́mamgba nyẹ́nimim, n dugho ḅara, anị fịnị ḅara ọkọ fịnị níminyẹ mịẹ mịẹm jẹ́apụ sághị opuamịẹnyẹ mịẹ; kụ́ma ḅẹlẹma tumḅọ mịẹm n ḅọ sẹnị.

² Sịḅọ ḅẹẹ ọ nyẹ nimim, karakárá ma nimigha ọ nimi na ibiḅara.

³ Kụ́ma Tamuno ḅẹlẹma ḅọ Tamuno sọ pịghị n ḅo nimim.

⁴ Anịsáa, n pa igwagwaá n kara tamuno ma pịrị fị́nyẹ ma fịị gbolomanyẹ, wa nimim ḅẹ́ n kárá tamuno sẹ tuminikiri ófórigha nyẹ pịrịm; wa nimim ḅẹ́ gbẹ́rẹ́ Tamuno ngéré anịị iminyẹ.

⁵ Tọgha nyẹ n pa <> pa sị nyẹ ine imibẹm sobie na kiribie tọgha tọgha <> na tọgha tọgha <> bii ḅara ma,

⁶ kụ́ma wamịnị gbẹ́rẹ́ Tamuno ngéré anịị wa nyánányẹ, Daḅọ ma, ori nyẹ gonyẹ́ gonyẹ́ tẹ́mẹ́ḅọ, wa pịghị duma ọ pịrịm, wa pịghị gbẹ́rẹ́ Kị́nị́nyánáḅọ nyanam Jizọs Krais, ọ ḅụ ḅọ́rọ́ anịị nnị nyẹ gonyẹ́ gonyẹ́ tẹ́mẹ́nyẹ, ọ ḅụ ḅọ́rọ́ anịị wa pịghị dumanyẹ.

⁷ Kụ́ma kị́nị́mamgba mị karakárányẹ ma nimigha jẹapụ n kárá tamuno ma opuma nkeḅemam gosi, nnị ọkọfịnị fị́nyẹ ma fịarị sáá, n siim ḅẹẹ nnị n pa igwagwaá fị́nyẹ fịarị, nna tẹ́mẹ́bie kụrọgha gosi, nnị siim ḅẹẹ nnị pilemam.

⁸ Fị́nyẹ, anị fịnị ḅara ine wa kikiama Tamuno fịnị angaá ḅobịgha, wa ḅuuma nyẹ ofori wa ḅọ́rọ́ fịghafịgha, anịgha wa ḅọ́rọ́ fịfị wa anị bie sọnyẹ́ nyanagha.

⁹ Ọ ḅụ ẹbị minima sị ọ nyáná ḅara na sịbị nyána ma mịẹsị minini ma ḅụ kụrọghaapụ bịghịkoro.

¹⁰ Didigha ḅọ́rọ́ tẹ́mẹ́ kụrọghaḅọ mịnyẹ ma ḅụ ị́yẹ́ arịị, ịrị mịnanyẹ ma <> nyẹ́fịarị oru warị bie; mịma anị mịẹbịgha sị n ḅo sághị n pa igwagwaá fị́nyẹ fịị?

¹¹ Anịsáa mịị tẹ́mẹ́kụ́rọgha mịná owitụ́wọ ma Krais ọ sịbị goo fịịḅọ ma, warị fịị faabẹm ịrị ma níminyẹ gosi!

¹² I mịị ḅara ma pa siinyẹ pa ị jẹa mininiḅọ miẹsima sáá sị mịẹsị nna tẹ́mẹ́ oḅuú, Krais anịị ị mịị sii ma pa mịẹarịḅọ.

¹³ Mịma goo, ḅọ́rọ́ a fịarịnyẹ mịẹbẹm sị i jẹa mininiḅọ siinyẹ bie sọọ a mịnị jẹ́ pa nama pẹẹ́bịgha, sị a mịnị jẹ́ pa mịẹbịgha sị i jẹa mininiḅọ ma bịghị.