1 Kọrịntịapụ 7 - Ibani New Testament

Yaa Gbolomanyẹ

¹ Mị́sa ḅo tọ́rụ́ pa ọ gịẹ i pịrịnyẹ ma ḅụ su. Anị ibim ḅẹẹ owitụ́wọ táa yagha.

² Kụ́ma yáakuu ḅụ ofori nwángịma opuma bim gosi, owitụ́wọ gonyẹ́ gonyẹ́ amịna táa nyáná, ọ́rụ́ḅọ gonyẹ́ gonyẹ́ sọ amịna dee nyánáa.

³ Deeḅọ amịna fịrị nwángịbẹm deeḅọ ḅara, táaḅọ ma sọ árị fịrị nwángịbẹm táaḅọ ḅara.

⁴ Táaḅọ ma árị oju ma fịnị árị ngéré pịrịgha kụ́ma fịnị deeḅọ ma sọ pịrịm, anị gbẹ́rẹ́ ḅara ma deeḅọ ma ori oju ma fịnị ori ngéré pịrịgha kụ́ma fịnị táaḅọ ma sọ pịrịm.

⁵ Ḅuru ḅara ma, o ḅuru pa jụghọ jụghọ ḅáma ma, ḅọ́rọ́ ọmịnị mmẹapụ mininigha ḅẹẹ mịẹ kálá sáátụọ ḅụ ọ fofoobẹm sị ọmịnị sáá ngúmá sị ine tẹ́ghẹ̄ anịsáa ma ḅọ́rọ́maẹrẹ ọ sághị deeḅọ na táaḅọ fịrịnwangị. Mị ḅara ma Satanị ọ dadighibịgha ḅara ọmịnị ine ḅụ ọlọgha gosi.

⁶ A mịma dughoarị ólóghó ḅara ḅụghaa, kụ́ma nnị i wárịso sị a dughonyẹ.

⁷ Tụ́manyẹ, anị iḅụḅẹ́lẹ́bẹm ọmịnị kị́nị́mamgba a fịnị ḅara fịnịị. Ọ́rụ́ḅọ ọ́rụ́ḅọ amịna dienyẹ nyánam Tamuno ḅara, gbẹ́rẹ́ḅọ mị dienyẹ ma, jụghọ anị dienyẹ ma.

⁸ Mị́sa ọmịnị ẹ́rẹ́ yaagha anịgha ama yaaghaapụ na dee fịịmaá ẹ́rẹ́, a ḅẹm ḅẹẹ anị ibibẹm ḅọ́rọ́ nnị a fịnị ḅara fịnị, yaagha ḅụ.

⁹ Kụ́ma ḅọ́rọ́ nnị ine ḅụ ọlọgha mḅẹ́ḅẹ́ nnị mú yaa, anị ibiḅam nnị yaa tụ́ma mịnị ine ḅụ ọlọgha ma ḅụ fịnị oju dọ́ghụ́ma ḅara pa n dọ́ghụ́ma nakaragha.

¹⁰ Ẹ́rẹ́ na ama yáapụ, a ólóghó nyána ọ pịrịm, i ḅara sághịḅogha, kụ́ma Kị́nị́nyánáḅọ ḅara; ọ́rụ́ḅọ jẹ́ éné jẹ́ éné a dee warịsobịgha.

¹¹ Kụma á ḅọ́rọ́ ọkọ mịẹmịẹ a dee yaághaḅọ sọọ, anịgha mú a dee na ḅẹ́rẹ́fáma. Deeḅọ sọ amịna táa sịghịbịgha.

¹² A dugho isiapụ ma pịrịm (irị, ḅụgbọrụ, Kịnịnyánáḅọgha): ḅọ́rọ́ Krais asọ duaarị mịná owitụ́wọ táa nyanam mininighaḅọ sị pa mịnị sị ọ nana ngáarị, ori jẹ́ éné jẹ́ éné a sịghịbịgha.

¹³ Ḅọ́rọ́ Krais asọ duarị mịná ọ́rụ́ḅọ mininigha owitụ́wọ yaa yaa, ọ warị mịnị sị pa ánáná ngáarị, a jẹ́ éné jẹ́ éné ọ sịghịma.

¹⁴ Ḅẹẹ mininigha deeḅọ ma nnị Tamuno pa n daakị bẹ ḅara ḅụ wárịm nna minini taa ḅụ ḅọ́rọ́ pịghị mininigha táaḅọ ma nnị Tamuno pa a daakị bẹ ḅara ḅụ wárịm nna minini deeḅọ ma ḅụ ḅọ́rọ́. Ḅọ́rọ́ mịma ọkọ fịnịgha, nna awọ Tamuno nímighaapụ fịnị ḅara anịị n fịnị bẹ ḅara; kụma mị́sa anị fịnị ḅara ma nnị Tamuno n daakị bẹ ḅara ḅụ imi.

¹⁵ Anị fịnị ḅara ma, ḅọ́rọ́ Krais ḅụ mininigha taáḅọ ma anịgha deeḅọ ma ḅẹẹm n ḅọ so dọ́ghụm, anị wárịso anị ọkọ fịnị. Anị ọkọ koro sáá, minini ọ́rụ́ḅọ ma, ḅọ́rọ́ deeḅọ anịgha táaḅọ, ólóghó n ḅo ọlọgha. Tamuno wa sịmam ḅẹẹ wa ḅo diin ḅụ ngaa.

¹⁶ Ị tọ́rọ́ pa nimi, Krais asọ duarị táaḅọ ḅẹẹ ị dee ịḅụ ḅọ́rọ́ dụaḅọ́rọ́ma nyánábịgha? Anịgha ị tọ́rọ pa nimi Krais asọ duarị deeḅọ ḅẹẹ ị itáa ịḅụ ḅọ́rọ́ dụaḅọ́rọ́ma nyánábịgha.

Tamuno Ị́ Sị Ḅara Pa Fịnịị

¹⁷ Ọ́rụ́ḅọ ọ́rụ́ḅọ pa mú duma kọọ Tamuno die n ḅo pịrịnyẹ ḅụ ḅọ́rọ́, n ḅọ pịghị fịnị ḅara Kị́nị́nyánáḅọ ma n ḅọ sị sáá. Mịị a tọ kọ́rọ́ma ólóghó sọsị gbọrụ mamgba ḅụ.

¹⁸ Ḅọ́rọ́ n tọ́ngọ̄ pẹ́lẹ́máa owitụ́wọ, Tamuno sịbịpị ma mini ákịmam, ọ mịnị asọ dọghụma ọ ḅara warị tọ́ngọ pẹ́lẹ́ ilíghíma ma si bẹ ḅara, Ḅọ́rọ́ n tọ́ngọ̄ pẹ́lẹ́gha owitụ́wọ Tamuno sịbịpị ma miniakịmam, ori asọ dọghụma ọ ḅara warị tọ́ngọ̄ pẹ́lẹ́ bẹ ḅara.

¹⁹ Ḅọ́rọ́ n tumḅọ tọ́ngọ̄ pẹ́lẹ́m anịgha n pịghị anị pẹ́lẹ́gha, anị mịẹnyẹ ofori; nyẹ mịẹnyẹ ḅẹẹ tumḅọ Tamuno ólóghó kokom.

²⁰ Ọ́rụ́ḅọ ọ́rụ́ḅọ n ḅọ fịnị ḅara fịnị n ḅọ Tamuno ma oku ma miniakị sáá.

²¹ Ịrịị ómóniḅọ, Tamuno i sị sáá? Báláma kụma ịrị asọ árị sị ịḅụ nyáná ḅo bẹ nḅẹḅẹ́ ọkọ mịẹ.

²² Ḅẹẹ Kị́nị́nyánáḅọ sị maá ómóniḅọ ma n ḅo anịị Kị́nị́nyánáḅọ ḅụ ḅụ nyánámáaḅọ, anị gbẹ́rẹ́ ḅara ma amịna ḅụ nyánámáaḅọ sị Krais sịḅọ, n ḅọ anịị Krais ómóniḅọ.

²³ Tamuno nyẹ́la nyẹ pa ọ fẹm; anịgosi ọmịnị omoni sọọ túminị́ pịrịma.

²⁴ I jẹa mininiapụ, ọ́rụ́ḅọ ọ́rụ́ḅọ Tamuno na fịnịị nnị ḅo fịnị gbẹ́rẹ́ ḅara ma Tamuno ma n ḅọ sị sáá, pa Tamuno na mịẹgbólóma nyánáarị.

Dee Anịgha Ẹ́rẹ́ Yaaghaapụ Na Dee Fịịapụ

²⁵ Mị́sa o gịẹnyẹ ma owiḅọ nimigha anịgha ọ́rụ́ḅọ nimigha gbolomanyẹ. A Kị́nị́nyánáḅọ ḅara saghị ḅo ólóghó nyanagha, Kụ́ma a i tẹ́mẹ́ dughom Kị́nị́nyánáḅọ lolomakúkúbie ḅụ ḅọ́rọ́ túminị́ ine ḅụ tẹ́mẹ́ gbánā bẹḅọ ḅara.

²⁶ Mị́sa págháarị ḅẹ́rẹ́ ma gosi, a siim ḅẹ́ anị ibiḅam ḅẹẹ owitụ́wọ fịnị ọ fịnị ḅara.

²⁷ Ị taa yaa yáá? A sịghịị dọghụma, i taa yaagha yaagha? Anịsáa taa dọghụma.

²⁸ Kụ́ma i yaa yáá i mịẹ siinyẹ ofori; owiḅọ nimigha ọ́rụ́ḅọ dee yaa yaa a gbẹ́rẹ́ siinyẹ sọ mịẹghaa. Kụ́ma yáapụ tọgha tuminikiri ḅụḅáláḅálá árịbẹm, mịma anị a binyẹ anị ḅárábie a ọ dụapághámaḅo.

²⁹ I jẹa mininiapụ, a dughoarị nyẹ anịị ḅẹẹ, sáá ma ịrụm, mị́sa sághị bịpị muu, taa nyánáapụ duma kọọ sọ́ḅọ́rọ́ n táa nyanagha;

³⁰ kururuapụ duma kọọ sọ ḅọ́rọ́ n kururugha, bieḅẹlẹapụ duma kọọ sọ ḅọ́rọ́ nna bieḅẹlẹgha; nyẹ fẹapụ duma kọọ sọ ḅọ́rọ́ nnị fẹ nyẹ ma nna nyẹ́gha,

³¹ Tuminikiri ngọ pa fịrịnwangịarịapụ sọ́ḅọ́rọ́ mịnanyẹ ma gbẹ́rẹ́ sáá nna sáá mamgba akịịghaa. Ḅẹẹ mị tuminikiri ma anị fịnị ḅara ma, mịnị fịnị ḅọlọbịgha.

³² A bibẹm ḅẹẹ i mịnị ḅụḅáláḅálá pa ịḅụ pịrịma. Taa yaagha owitụ́wọ ma Kị́nị́nyánáḅọ fịrị ma anị ọ pa ọḅụ ḅáláḅálámáarị nyẹ, tegó ori asọ dọghụarị ọ ḅara warị Kị́nị́nyánáḅọ bie mịẹ ḅẹlẹma bẹ ḅara.

³³ Kụ́ma táa yaa owitụ́wọ tuminikirinyẹ anị ọ pa ḅụḅáláḅálá pa ọ ḅụ pịrịarịnyẹ, tegó o biim ḅẹẹ ori ọ taa bie mịẹ ḅẹ́lẹ́maa;

³⁴ anịgo mmẹẹ́ angaá ọ nụ́nụ́arị. Dee yaagha ọ́rụ́ḅọ anịgha owitụ́wọ nimigha ọ́rụ́ḅọ tụwọ Kị́nị́nyánáḅọ fịrị ma anịị a pa ḅụḅáláḅálá pa a ḅụ pịrịarịnyẹ; tegó a biim ḅẹẹ a nyẹ gonyẹ́ gonyẹ́ saghị Tamuno pịrị árị oju na a tẹ́mẹ́ na; kụma deeyaa ọ́rụ́ḅọ tuminikirinyẹ anịị a pa a ḅụ́ḅáláḅálámaarị nyẹ tegó árị a dee tẹ́mẹ́ miẹḅẹ́lẹ́ma dọ́ghụm.

³⁵ A mịma dughoarị tegó a ḅárásua ọ pịrị dọ́ghụm, A asọkiki ọ pịrị dọghụgha. Tụ́ma a biim ḅẹẹ ọ karakárá pịghị mịẹna ibi nyẹ mịẹsị ọ pịghị nyẹ kọmagha ḅara ḅụ ọmịna ḅụgbọrụ pa Kị́nị́nyánáḅọ fịrị ma pịrịị.

³⁶ Yaa pa nna ḅụ ọlọmaapụ deeḅọ na táaḅọ ḅara; kụ́ma na mininigha ḅẹẹ nnị nwọgha sáá ḅụ yaabẹm: ḅọ́rọ́ owitụ́wọ ma arịḅom ḅẹẹ ọmịnị ine ọ ḅụ ọlọgha ọ́rụ́ḅọ tụwọ ma fịnị angaá, warị árị ḅo ḅẹẹ nnị yaa na ibim, nnị mú yaa ọ bii ḅara, siinyẹ ofori anị bie.

³⁷ Kụma ḅọ́rọ́ gbẹ́rẹ́ owitụ́wọ tumḅọ o sumaagha pa ḅẹẹ ori ọkọ mịẹ, ọ tẹ́mẹ́bie tọ́ọ pẹ́lẹ́mam ḅẹẹ ọ yaabịgha, ọ pịghị ine ibima ḅẹrẹtọ ori oju gbọrụ pịrị pịrị, si pịghị tọ́ọ pẹ́lẹ́mam ọ mịẹ dọghụnyẹ, ori ibiḅara mịẹm, ḅọ́rọ́ ọ ḅẹẹ ori ọ́rụ́ḅọ tụwọ ma yaabịgha.

³⁸ Anịgo mú taa yaa ḅo ibima mịẹm kụma mini taa yaaghaḅọ ibima miẹḅam.

³⁹ Deeyaa ọ́rụ́ḅọ a dee dumafịnị sáá gonyẹ́ gonyẹ́ a ḅara na a sịbị nyánágha kụ́ma ḅọ́rọ́ a deefịị fịị, anịsáa árị ine a yaa dọghụḅọ yaabẹm anịị ori Krais asọ duarịḅọ mḅẹ́ḅẹ́.

⁴⁰ Anị i tẹ́mẹ́ fịnị ḅara a bieḅẹ́lẹ́ḅabẹm, a ḅọ́rọ́ á fịnị ḅara fịnịị, a pịghị nimim ḅẹ́ mịị againma ma Tamuno ma Tẹ́mẹ́ ḅara sághị ḅom.