1 Kọrịntịapụ 6 - Ibani New Testament

Ḅẹ́rẹ́kọ Siri Mininiapụ Ogbobie

¹ Ḅọ́rọ́ jụghọ amịna jẹ́ Krais asọduaḅọ na ḅẹ́rẹ́ nyánam, nnị tegó Tamuno nímighaapụ ma dama mú bẹ ḅẹẹ n ḅẹ́rẹ́kọ n sịbị anịmanakaragha Tamuno tọ́ntọ́apụ ma wárịso sị n ḅẹ́rẹ́ ma kọọ.

² Ó nimigha ḅẹẹ ọmịnị Tamuno túminị́ sịbị ḅẹ́rẹ́kọbẹm? Anị ọkọfịnị sáá, ḅọ́rọ́ ḅẹ́ ọmịnị tuminikiri ma sịbị ḅẹ́rẹ́kọbẹm, mị nyẹ́ ḅụ ófórigha nyẹ́ ma anịị ọmịnị ine anị sịbị ḅẹ́rẹ́kọbịgha nyẹ?

³ Ó nimigha mọ ḅẹẹ wamịnị sookumuapụ ma sịbị ḅẹ́rẹ́kọbẹm? Anịsáa, mị tuminikirinyẹ ma ḅụ anịị wamịnị ine ḅẹ́rẹ́kọbịgha nyẹ!

⁴ Ḅọ́rọ́ ọkọfịnị ḅẹ́rẹ́ koro koro, o mú sọsị ma bie fịnịkiri nyánágháapụ ḅẹẹ ma ḅẹ́ nnị anị ḅụ ḅẹ́rẹ́kọọ?

⁵ A mịma dugho pa ọmịna ḅụgịrịrịmamam. Ḅẹẹ gbẹ́rẹ́ nyẹ́nimiḅọ sọ ofori mọ ọmịna kobiri ogbo ine ḅẹ́rẹ́kọ bẹḅọ ori amịnáapụ Krais asọ duarịapụ ma ogbobie?

⁶ Kụma anịmanakaragha, ị jẹa mininiḅọ mú jụghọ pa ḅẹ́rẹ́kọ́wárị múm, mịma kiriakịarị angaá anịị mininighaapụ ma tórúku!

⁷ Bẹnyẹ ḅẹẹ ọ jụghọ jụghọ na ḅẹ́rẹ́kọ wárị ḅụ ḅẹ́rẹ́ nyánam, anịma dughoarị ḅẹẹ ọ gbẹ́rẹ́ sáá bịghịmam, Anịmanakaragha anị ibi ḅábịgha ḅẹẹ nnị ị́yẹ́ irimam? Anị ibi ḅábịgha ḅẹ́ ị́ inoma fịịm?

⁸ Tụ́ma ọmịnị jụghọ jụghọ miẹsimaarị pịghị jụghọ jụghọ inomáarị, ọmịna mịnaapụ ma sọ ọ pa nnị mịẹm.

⁹ O nimigha ḅẹẹ siinyẹ mịẹarịapụ ma Tamuno amadakiri ma nyánáḅobịgha, ọmịnị oḅori pa ọ ḅụ sima, n kárányẹ tẹ́ghẹ̄arịapụ, anịgha yáakuu ḅụ ofori nwángị kọ́arịapụ anịgha amịna jẹ́ owiapụ na munoarịapụ

¹⁰ anịgha furuapụ anịgha oputọ́rụ́apụ anịgha iru ḅụụ tọ́rụ́ ḅámaapụ, anịgha jẹ́apụ dughosimaapụ anịgha ngarafịapụ mịnaapụ ma gbẹ́rẹ́ḅọ sọ Tamuno amadakiri ma nyánáḅobịgha.

¹¹ Ọmịna ḅụ jẹ́apụ anịị ọ fịnị ḅara; kụ́ma nnị ọ mịẹ fiáfiámamám sii ḅụ; nnị o fóofóo ma Tamuno pịrịmam; Kị́nị́nyánáḅọ Jizọs Krais ma ẹ́rẹ ḅụ nnị o mịẹ karakárámamam; na pịghị wamịna Tamuno ma Tẹ́mẹ́ pa.

Ọmịnị Ọmịna Oju Pa Tamuno Boma

¹² A ine a mịẹ dọghụnyẹ gonyẹ́ gonyẹ́ mịẹbẹm, kụ́ma nyẹ gonyẹ́ gonyẹ́ sọ́nyẹ ḅụ ofori. A ine dughobẹm ḅẹẹ, a ine a mịẹ dọghụnyẹ gonyẹ́ gonyẹ́ mịẹbẹm kụ́ma a minibịgha gbẹ́rẹ́nyẹ sọ i pa anị ómóniḅọ mịẹ.

¹³ Gbẹ́rẹ́ḅọ ḅẹẹbẹm ḅẹẹ, <> Kụ́ma Tamuno mịná mmẹẹ́ ma gulugulumabẹm, ojumẹnị ma anịị tumḅọ pa yáakuu ḅụ ofori nwángị kọọ bẹ nyẹ́gha, kụ́ma nnị anị pa fịrịnwangị Tamuno pịrịị. Tamuno anịị pịghị oju ma siḅearị ḅọ

¹⁴ Tamuno ori kụrọ pa Kị́nị́nyánáḅọ ma saghịmam fịị ḅụ. Anị gbẹ́rẹ́ ḅara ma ọ pịghị wa sághịmabẹm fịị ḅụ.

¹⁵ O nimigha ḅẹ́ ọmịna oju ma anịị Krais oju ma bẹ gbẹ́rẹ́ angaá? A Krais oju ma gbẹ́rẹ́ angaá akị bẹ sị anị pa sẹfịḅọ ma oju gbẹ́rẹ́ angaá mịẹbẹ? Jẹ́ éné jẹ́ éné!

¹⁶ Anịgha o nimigha ḅẹẹ amịna ḅụ pa sẹfịḅọ na gbolomaḅọ, n ḅọ á nana gbẹ́rẹ́ oju nyánámam? Tọ́ndiri ma dughom, tọ́rụ́ ḅuruḅurumagha ḅara ḅụ ḅẹẹ, <>

¹⁷ Kụ́ma amịna ḅụ pa Kị́nị́nyánáḅọ na gboloma ḅọ ọ nana gbẹ́rẹ́nyẹ sọọm tẹ́mẹ́bie.

¹⁸ Mangịị soo yáakuu ḅụ ofori nwángị ḅụ. Tumḅọ mịẹarị sii mamgba nna oju na mịẹnyẹ nyanagha, kụ́ma yáakuu ḅụ ofori nwángị kọḅọ siinyẹ pa amịna oju mịẹm.

¹⁹ O nimigha mọ ḅẹ́ ọmịna oju anị Tọ́ntọ́ Tẹ́mẹ́ ma Tamuowárị, ọmịna bie ngaaḅọ, Tamun pịghị pa ọ pịrịḅọ? Ọmịnị ọmịna ḅụ nyánágha kụ́ma Tamuno anịị ọ nyánányẹ.

²⁰ Ori igbii bịpị pa ọ fẹm, anịgo ọmịna oju ḅụ ọ Tamuno boma.