1 Kọrịntịapụ 5 - Ibani New Testament

Yáakuu Ḅụ Ofori Nwángị Sọsị Bie

¹ Mị́sa nnị opuma anị dughoarị ḅẹẹ yáakuu ḅụ ofori nwángị kọọma opuma kiriakịarị ọmịna ogboku bie, ọmịnị sọsị bie fịnịapụ, anị si láa ḅara, Tamuno nímighaapụ ma sọ ine ọkọfịnị nyẹ miẹbịẹghaa. Nnị dugho i pịrịm ḅẹẹ jẹa owiapụ nna daa taa na múnoarị!

² Anịsáa ị́yẹ́ opuamịẹnyẹ anị tegósi sughuu? Anịmanakaragha biesii ịḅụ biibiegháa? Ọkọfịnị nyẹ ma mịẹḅọ ma ọmịnị n ḅọ deesi ọmịna mịẹgbólóma ḅụ.

³ Karakárányẹ ḅẹẹ a ọ́ nana ofori ojumẹnị ḅụ kụ́ma tẹ́mẹ́ ḅụ a ọ nana imi, Jizọs Krais ẹrẹ ḅụ a pịghị ḅẹ́rẹ́kọọ pẹ́lẹ́mam mịma mịẹḅọ sịbị, sọ́ḅọ́rọ́ a aningáa imim.

⁴ O kobirimaẹrẹ wámịna Nyánáḅọ Jizọs ẹ́rẹ́ ḅụ a pịghị ọ nana imi ḅara tẹ́mẹ́ ḅụ wámịna Nyánáḅọ Jizọs kụ́rọ ma sọ imi,

⁵ anị tumḅọ ma sághị Satanị pịrị sị ori ojumẹnị ma guluguluma sị tẹ́mẹ́ ma ḅọrọma nyána bẹ ḅara Kị́nị́nyánáḅọ Jizọs pịghịma ḅo bẹ éné.

⁶ Ị́yẹ́ bịpịkpọ ma ibighaa, ọ mịị kaḅụ ma nimigha dughonyẹ ḅẹẹ, kálá yisti tụ́wọ anịị fịtúrú kpo ma gbọrụ sughumaarị nyẹ?

⁷ Olom yisti ma inwima si, anịị siiamịẹnyẹ ma, anịsáa i ḅo ịwọḅọ dighibẹm yisti nyanagha nyẹ ọ su karakáráma fịnị ḅara. Tegó n Krais pa igwagwaá wa pịrịmam wámịna Sáḅáḅọ́rọ́ ánáná ḅara.

⁸ Anịgosi o ḅo wa álálị ma wárị, mịnị olom yisti ma pa anị warịgha anịgha siiamịẹnyẹ na sii sịbịbie nyẹ́gha, kụ́ma fíafía na karakárá fịtúrú yisti bie ófórigha fịtúrú.

⁹ A gịẹ ọ fịrịmam ḅẹ́ ọmịnị yáakuu ḅụ ofori nwángị kọọarịapụ na gbolomanyẹ nyáná ma.

¹⁰ A Tamuno nímighaapụ ḅẹẹgha ḅẹ́ nnị yáakuu ḅụ ofori nwángị kọọarị anịgha oputọ́rụ́apụ nyáná anịgha fúrúapụ anịgha n kárányẹ tẹ́ghẹ̄arịapụ. Ọ ḅọ́rọ́ mịná túminị́ ma ḅụ ḅụ sighima bẹ mḅẹ́ḅẹ́, mịma ọ gbẹ́rẹ́ sáá mị tuminikiri ma wárịsóbẹm.

¹¹ A dughoarịnyẹ anị ḅẹẹ ịrịị ọ nana mịẹgbólómanyẹ nyánáma, Krais ḅụ mininiḅọ pa amịna ḅụ sịḅọ. Kụ́ma n ḅọ yáakuu ḅụ ofori nwángị kọọarị anịgha opu tọ́rụ́ nyánam anịgha n ḅara pa kárányẹ tẹ́ghẹ̄arị, anịgha n ḅọ kị́nị́ dughosima ḅọ, anịgha iru ḅụ tọ́rụ́ ḅáma ḅọ, anịgha fúrúḅọ. Anị tumḅọ ma anị ibighaa ịrị ọ nana kpọrọfịnị sị nyẹ́fịị.

¹² A tẹ́ fịrị nyána mú sọsị ma bie oforighaapụ sịbị ḅẹ́rẹ́kọọ? Anị ọmịnị fịrị bẹ ọ sọsị ma bie fịnịapụ sịbị ḅẹ́rẹ́kọm.

¹³ Tọ́ndiri ma bie n gịẹ kórómam, <>