1 Kọrịntịapụ 4 - Ibani New Testament

Krais Fịrịmaapụ

¹ Túminị́ Krais fịrịnwangịapụ ḅara pa wamịnị akị na ibim, n Tamuno ori ḅọghu karakáráma pa pịrịapụ ḅẹ́ nnị anị pa túminị́ die.

² Fịrịnwangịapụ nyánáḅọ gonyẹ́ gonyẹ́ amịna nyánáḅọ ori nyánányẹ saghị ḅárasúamáa ḅọ, anịị ori ine ḅụ tẹ́mẹ́ gbánā bẹ fịrịnwangịḅọ.

³ Kụ́ma ịrị ọkụma, a balagha ḅọ́rọ́ ọmịnị i sịbị ḅẹ́rẹ́kọarị anịgha jẹapụ i sịbị ḅẹ́rẹ́kọarị tuminikiriapụ ḅẹ́rẹ́kọ́wárị; irịsọ a pịghị ḅẹ́rẹ́kọ ịḅụ pịrịgha.

⁴ I tẹ́mẹ́bie fiafiam, kụ́ma anị dughoghaa ḅẹẹ na a jẹ́ éné siinyẹ mịẹghaa. Kị́nị́nyánáḅọ ma ori anịị i sịbị ḅẹ́rẹ́kọḅọ

⁵ Anịgosi gbẹ́rẹ́ḅọ sịbị sọ ḅẹ́rẹ́kọ ma sáá ma na laagha sáá. Kúruu, ákị múu Kị́nị́nyánáḅọ ma ḅoo sáá láa, ọ kánákánábie ḅọghunyẹ ma pa baá bie pághámaḅobẹm, túminị́ kúkúbie fịnị ḅọghunyẹ ma. Anịsáa anị túminị́ nna ḅụ gbẹ́ẹ̄ túminí nyánáḅọ bẹnyẹ Tamuno ḅara.

⁶ Anịgo, i jẹa miniapụ, ọmịna sịbị goo, a mịị nyẹ ma pa ịḅụ na Apọlọs mịẹm, wamịnị mmẹapụ pa anị kịkamanyẹ pa ọ dáwọ́ ma sị ọmịnị ine mị ẹ́gẹ́rẹ́ ma dughonyẹ nimi bẹ ḅara, <> Ọmịna ḅụ gbẹ́rẹ́ḅọ sọ isiḅọ pa bịpịkpọ ma sị isi ngaḅọ dighisimaa.

⁷ Tụọ imie sị ị ibiḅaa jụgho nẹ́ngị? Ị nyánányẹ gonyẹ́ gonyẹ́ Tamuno pa i pịrịghaa? Nnị ḅọ́rọ́ pa ị pịrị pịrịị, ị tegósi bịpịkpọ bẹ, ḅọ́rọ́ i nyánányẹ ma n die i pịrịnyẹ́gha?

⁸ Mị́sa ọ binyẹ gonyẹ́ gonyẹ́ ọ nyáná? Mị́sa ọmịnị ámányánáapụ sọmam? Wamịnị ámányánáapụghaa n ḅẹ́sọ. Dighi anị ịḅụ ḅẹ́lẹ bẹ ḅara ḅọ́rọ́ mị́sa ọmịnị ámányánáapụ, sị wamịnị sọ ọ́ nana ámányánáapụ sọ bẹ ḅara.

⁹ Ḅẹẹ mị́sa anị ịḅụ fịnị ḅara sọ́ḅọ́rọ́ Tamuno wamịnị nfịrịmaapụ ma pa kunema angaá ma ḅụ wárim, n sịbị ḅẹ́rẹ́pẹ́lẹ́máapụ ḅara ḅẹẹ nnị n kpọ ḅáabẹm kị́nị́mamgba tórúku, sị tuminikiri gbọrụ sookumuapụ na tuminikiriapụ árị bẹ ḅara.

¹⁰ Krais goo, wamịnị oḅoriapụ sọọm; kụ́ma ọmịnị nyẹ́nimiapụ sọọm Krais ḅụ! Wamịnị ịnyọ wa ḅụ ofori, kụ́ma ọmịnị ọ kụrọm! Nnị wa dighisimam kụ́ma nnị o dighi sóghólomam!

¹¹ Ḅo mị gbẹ́rẹ́ sáá ma láa, ḅuru wa tarịarị, wámịna pụghọ pịghị sámụ́nọm; káákáá bịtẹ anị wa suarị nyẹ; n wa fomum; wa ngá angaá nyánágha;

¹² Wa wámịna ḅara pa ịnyọsua fịrị nwángịm. Nnị nyẹ karị wa pịrị sáá, wamịnị n karịibimam; nnị wa pa tọ́rụ́siarị ma sáá, wa ngịrịma nyánam;

¹³ Nnị wa wiri sáá, wamịnị ibi ẹ́gẹ́rẹ́ pa n pagharam. Wa tuminikiriapụ ịlọ́lị kpo nẹngịgha; ḅoo mị́sa ma láa, wamịnị anị tuminikiri nyẹ́ḅụ ófórigha nyẹ!

¹⁴ A mịma gịẹ ọ pịrịarị ḅẹẹgha ḅẹ́ a ọ ḅụ́gịrịrịma dọ́ghụm kụ́ma a againma pa ọ pịrịbẹ ḅara a ḅẹlẹma awọ ḅara.

¹⁵ Ḅọ́rọ́ Krais bie, ọ túminị́ gbẹ́rẹ́ pughu na sọ́nọ́a ndẹ́ẹ nyanam dighidighiapụ ḅara, ọ tọgha daapụ nyanagha Krais Jizọs ḅụ, a dugho wásáma ọ pịrị ibi oku ma ḅụ ḅọ́rọ́ a daá sọ ọ pịrịmam.

¹⁶ Anịgosi a ọ tẹ́ghẹ̄m ḅẹẹ ọmịnị i daa a nyẹ mịẹ ḅara mịẹ.

¹⁷ Anịma gosi a Timoti pa ọ fịrịmaarị a ibima ḅẹlẹma tụwọ, ibima kụrọ sẹ ḅo Krais asọ ma ḅụ, ọ pa o biekórómabẹm ị́yẹ́ dumafịnị ḅara Krais Jizọs ḅụ mịma anịị a pịghị diearịnyẹ sọsị gbọrụ pịghị ngámámgba ḅụ.

¹⁸ Ọmịna ḅụ jẹapụ sághị opuamịẹnyẹ mịẹarị tegó ọ siim ḅẹẹ a mịnị ọ fịnị angaá ḅobịgha.

¹⁹ Ḅọ́rọ́ Kị́nị́nyánáḅọ mini mini, a ọ fịnị angaá ḅoobẹm ḅọlọghaa sáá ḅụ, anịsáa a i ḅara pa dọghụ pághámaḅobẹm, mịná opuamịẹnyẹapụ ma nyáná kụrọ, mịnị n dughonyẹ ngéréghaa.

²⁰ Ḅẹẹ Tamuno amadakiri ma, ẹ́gẹ́rẹ́ bịpị ngéré ḅụ ofori, kụ́ma kụrọ ḅụ.

²¹ I tẹ́ angaá nyẹ ḅẹlẹma? Ị́yẹ́ ḅoo ma a fom nyẹ́ akuoo anịgha ḅẹlẹma na diin tẹ́mẹ́?