1 Kọrịntịapụ 3 - Ibani New Testament

Puama Gboloma Againma Sọsị Ma Bie

¹ Karakárányẹ ḅụ, ịyẹa nángwọ́apụ a ine ẹ́gẹ́rẹ́kọọ ọ pịrịbịgha a ẹ́gẹ́rẹ́kọọ tẹ́mẹ́ ma nyánáapụ pịrịbẹ ḅara; a ẹ́gẹ́rẹ́kọọ ọ pịrịbẹm sọ́ḅọ́rọ́ ọmịnị mị tuminikiriapụ na pịghị káláawọ ọmịna minini Krais ḅụ.

² A ndomingi pa ọ siḅebẹm, tụ́ma fị́nyẹghaa tegó na ọ tẹ́lẹ́ma anị pịrịgha, mị́sa sọ na ọ tẹ́lẹ́ma anị pịrịgha,

³ Tegó, ọ pa duma kọọarị mị tuminikiriapụ duma kọọarị ḅara. Nyẹ́mọ́ni ọmịna ogboku bie fịnị sáá, ọ pịghị jụghọ jụghọ na kamkoro sáá, anị diegha ḅẹẹ ọmịnị mị tuminikiri bẹapụ, duma kọọarị n duma kọọarị ḅara?

⁴ Ọmịna ḅụ gbẹ́rẹ́ḅọ dughoarị sáá ḅẹẹ, <> jụghọ dughoarị <> ọ tuminikiriapụ nyẹ mịẹḅara pa nyẹ mịẹghaa?

5 Anịsáa tụọ ḅọ́rọ́ Apọlọs, Pọl ori tụọ? Wamịnị papa Tamun fịrịnwangịapụ Tamuno pa ọ daa tụụma sị o goo minini nyẹ. Wamịnị papa Tamuno fịrịnwangịapụ, pịghị mị fịrị ma ḅụ ḅọ́rọ́ ọmịnị ḅo Krais ḅụ minimam.

⁶ Ịrị mgbọ́lụ ma dipim, Apọlọs mingi pa anị saram, kụ́ma Tamuno anị mịẹḅọ sị anị senị́ị́.

⁷ Dipiḅọ na mingi saraḅọ na nyẹ́ḅụ ofori Tamuno ori anị nyẹ́ḅụ fịnịḅọ, tegó ori anị mịẹsị dipinyẹ ma sẹ́nịarịḅọ.

⁸ Dipiḅọ na mingi saraḅọ ma ogboku kịrịnyẹ ofori; Tamuno ọ́rụ́ḅọ ọ́rụ́ḅọ fịrị ḅụ ḅọ́rọ́ gbẹ́ẹ̄ nyẹ pa n ḅọ gbẹ́bẹm.

⁹ Wamịnị kị́nị́mamgba wamịnị gbẹ́rẹ́ fịrịnaapụ fịrịnwangị Tamuno pịrịarị, ọmịnị ma anịị Tamuno duakiri. Ọmịnị anị pịghị Tamuno wárị ma.

¹⁰ Tamuno pa i pịrị dienyẹ ma ḅụ ḅọ́rọ́ a opuma nyẹ́nimi wárịnámáḅọ fịrị nwángịm. A kiri sughum sị sughu isé sị jụghọ anị ọgọnọ námáarị. Kụ́ma ọ́rụ́ḅọ ọ́rụ́ḅọ amịna ḅụ ẹbị n ḅọ námáarị ḅara.

¹¹ Tegó gbẹ́rẹ́ḅọ sọ ine jẹ́ súghúisebịgha Tamuno isemaa anganyẹ ma sima. Anị súghúise ma anịị Jizọs Krais.

¹² Jẹ́apụ odoḅala anịgha pị́naḅala anịgha nyẹ́la onwo pa kiri sughu sị ine súghúise dapịrị ma ọ́gọ́nọ namabẹm, isiapụ sịị anịgha osuka anịgha ányị́nyá pa anị ọgọnọ námabẹm.

¹³ Tumḅọ nwángị fịrị fịnị ḅara, kị́nị́ anị árịbẹm Krais ḅo ḅẹ́rẹ́kọ bẹ éné. Anị éné ma ḅụ fịnị ọ́rụ́ḅọ ọ́rụ́ḅọ fịrị ḅara diepághámabẹm; fịnị ma anị daádighibẹm sị tụ́ma sị anị fịnị ḅara die.

¹⁴ Ḅọ́rọ́ súghúise nyẹ ma ọ́gọ́nọ n nama nyẹ ma fịnị ma daatulutulu, nyẹ ma namaḅọ ma gbẹ́ẹ̄ nyẹ nyánáḅobẹm.

¹⁵ Kụ́ma ḅọ́rọ́ nama ḅọ ma fịrị dọ́ghụdọ́ghụ, anịsáa n ḅọ faá kọọbẹm; kụ́ma ori ma wárịnámáḅọ ma ḅọ́rọ́ma nyánábẹm, soḅọ́rọ́ ọ fịnị ḅarabie sághị págháḅom.

¹⁶ Tụ́mányẹẹ ọ nimim ḅẹẹ ọmịnị Tamunowarị Tamuno Tẹ́mẹ́ pịghị ọmịna ḅụbie ngam.

¹⁷ Tamunowarị gulugulumaḅọ gonyẹ́ gonyẹ́ Tamuno n ḅọ gulugulumabẹm Tamunowarị ma tọ́ntọ́m; ọmịnị anịị Tamunowarị ma.

¹⁸ Ọmịnị oḅori pa ọmịna ḅụ sị ma. Ḅọ́rọ́ o kórómam mḅẹ́ḅẹ́ ḅẹẹ tuminikiri asọ ḅụ ọ nyẹ́nimim ọ tụ́ma oḅori sọọ sị ọmịnị ibima nyẹ́nimi bẹ ḅara.

¹⁹ Tegó mị tuminikiriapụ pa nyẹ́nimi nyẹ sị nyẹ anịị papanyẹ Tamuno tórúku tegó, Tọ́ndiri ma dugho ḅara, <>

²⁰ Jẹ́ tọ́ndiri pịghị dughom ḅẹẹ, <>

²¹ Anịgosi gbẹ́rẹ́ḅọ sọ bịpịkpọ ma tumḅọ ine mịẹbẹnyẹ ḅụ. Karakárányẹ ḅụ nyẹ gonyẹ́ gonyẹ́ ọ́ ọmịna nyẹ.

²² Ḅọ́rọ́ Pọl, Apọlọs, Pita, mị tuminikiri, duma na fịị na, mị́sa biri nyẹ na pịghị tórúku ju nyẹ mịnanyẹ mamgba ọmịna nyẹẹ.

²³ Ọmịnị Krais túminị́, Krais sọ pịghị Tamuno nyẹẹ.