1 Kọrịntịapụ 2 - Ibani New Testament

¹ A ọ damaḅoo sáá ị́yẹ́ mịná owiapụ, si a ḅọghu Tamuno karakáráma dugho wásámáa, a kporo ẹ́gẹ́rẹ́ na opu nyẹ́nimi ẹ́gẹ́rẹ́ kọọgha.

² A ọ́ nana fịnị sáá, a tẹ́mẹ́bie dighim ḅẹẹ a ị́yẹ́ kóróma pa ḅẹnyẹ ḅẹnyẹ ḅụ warịbịgha kụ́ma, Jizọs Krais na pịghị ori fịị, mgbẹsẹ sị́ ma ọ́gọ́nọ.

³ A ọ damaḅo sáá, ịnyọ ịḅụ ofori ḅáláfa mịẹm si ị́yẹ́ oju mamgba sẹ́ghịm.

⁴ Iyẹ dienyẹ ma na ị́yẹ́ oku a tuminikiri níminyẹ ḅẹlẹ ẹ́gẹ́rẹ́ pa anị kọọgha, kụ́ma Tẹ́mẹ́ ma anị kụ́rọ diem anị túminị́ ḅụ koro bẹ ḅara.

⁵ Anịsáa, ọmịna minini túminị́ nyẹ́nimi ḅụ sẹrẹrẹgha kụ́ma Tamuno ọ́gọ́nọ ḅụ.

Tẹ́mẹ́ Ma Ḅara Sághị ḅo Níminyẹ

⁶ Wa opu nyẹ́nimi oku ma dugho wásáma minini ḅụ sẹ́nịmaapụ ma pịrịm. Kụ́ma mị opu níminyẹ ma anị mị tuminikiri opu niminyẹgha anịgha mị tuminikiri táarịapụ opu níminyẹ nna kụ́rọ ḅoo papanyẹ soarị nyẹ.

⁷ Kụ́ma wa dugho wásámaarị opu níminyẹ ma anịị Tamuno ḅọghu opu níminyẹ ma, n pa tuminikiriapụ ḅọghuma nyẹ, ọ sẹlẹakị nyẹ nịị n tuminikiri ma tẹ́mẹ́gha sáá wámịna ipine goo.

⁸ Tuminikiri táarịapụ ma ḅụ gbẹ́rẹ́ḅọ sọ mị níminyẹ ma nimim, n ḅọ́rọ́ nimi ọkụma nnị ipine nyáná Kị́nị́nyánáḅọ ma ḅaupálịbịgha.

⁹ Anị fịnị ḅara, anịị Tọ́ndiri ma dugho ḅara, <>

¹⁰ Kụ́ma wamịnị anịị Tamuno, ọ Tẹ́mẹ́ ḅụ ḅọ́rọ́ mịnanyẹ ma diepágháma pịrịapụ Tẹ́mẹ́ ma nyẹ gonyẹ́ gonyẹ́ dọghụ pághámaḅoarị Tamuno tẹ́mẹ́bie fịnị póghóló ḅọghunyẹ.

¹¹ Tegó gbẹ́rẹ́ḅọ sọ ine tumḅọ tẹ́mẹ́bie fịnịnyẹ nimibịghaa, tumḅọ ma tẹ́mẹ́ sima, Tamuno Tẹ́mẹ́ ngéré anịị Tamuno tẹ́mẹ́bie fịnịnyẹ nimiḅọ.

¹² Na wa mị tuminikiri tẹ́mẹ́ ma nyánaḅogha; tụ́ma wa Tamuno fịrịma Tẹ́mẹ́ ma nyanaḅomam, si wa Tamuno igbii ákịgha pa, pa wa pịrịnyẹ gonyẹ́ gonyẹ́ nimi bẹ ḅara.

¹³ Anịgosi wa tuminikiriapụ pa wa die níminyẹ pa ẹ́gẹ́rẹ́ kọọgha, kụ́ma Tẹ́mẹ́ ma pa wa die ẹ́gẹ́rẹ́, wa tẹ́mẹ́nyẹ ma karakárá puu findi Tẹ́mẹ́ ma nyánáapụ pịrịị.

¹⁴ Tẹ́mẹ́ ma nyánághaḅọ gonyẹ́ gonyẹ́ ine Tamuno Tẹ́mẹ́ ḅara ḅoo dienyẹ ma daákịbịgha. Ọkọfịnị tumḅọ ine nnị akanyaḅogha, n ḅo ḅụ anị ofori ofori nyẹ kịkam, tegó Tẹ́mẹ́ ma ḅụ ngéré anịị wamịnị ine dienyẹ ma akanyaḅo bẹnyẹ.

¹⁵ Tẹ́mẹ́ ma nyánáḅọ anịị ine nyẹ gonyẹ́ gonyẹ́ ḅụ ḅẹ́rẹ́kọọ bẹnyẹ, kụ́ma gbẹ́rẹ́ḅọ sọ ine ọ ḅụ ḅẹ́rẹ́kọbịgha.

¹⁶ N gịẹ kórómam Tọ́ndiri ma bie ḅẹẹ, <> Kụ́ma wamịnị Krais Tẹ́mẹ́ nyánáapụ wámịna bie.