1 Kọrịntịapụ 16 - Ibani New Testament

Nnị Daa Tamuno Túminị́ Pịrị Igbii

¹ Mị́sa a dugho ọ pịrị nnị daa Tamuno túminị́ pịrị daaigbii ma gbolomanyẹ: Galesia ḅụ fịnị sọsị ma, ọmịnị a dugho n pịrị ḅara mịẹ.

² Párị éné wiki gonyẹ́ gonyẹ́ ḅụ, ọ́rụ́ḅọ ọ́rụ́ḅọ gbẹ́rẹ́ igbii bịpị si warịị, n ḅọ nyáná igbii láa ḅara ḅụ, sị anị keke warị, sị a ḅo bẹ sa ọmịnị jẹ́ daaigbii daabịgha ḅara.

³ A ḅo láa sáá, a nnị gboloma ábálálá gịẹ pa ọ tọ pághámaḅoapụ ma pịrịbẹm, si nnị ọmịna diepịrịnyẹ ma na pa Jerusalem fịrịma.

⁴ Anị ḅọ́rọ́ i nana sụsụ ḅẹ́ a muu, nnị i nana muubẹm.

Pọl Mịẹ Dọghụnyẹ

⁵ A Masidoniya bie ḅọ́rọ́ muu so sa, a sima ọ dámáḅobẹm tego Masidoniya bie anịị a ḅọ́rọ́ muu bẹnyẹ.

⁶ Didigha, a kẹ́lẹ́ ọ nana dii fịnịbẹm anịgha ọ nana oḅuu sáá ma fama, ọmịnị ine ḅárásua ị pịrịbẹ ḅara a muu bẹ angaá gonyẹ́ gonyẹ́ ḅụ.

⁷ A mị́sa tọ́rụ́ pa ọmịnị arịị dọghụgha, sị ḅụọ sẹgha kị́nị́ árị pa ọmịnị arịị, a bim a sááfáma kẹ́lẹ́ ọmịnị na fịnị, ḅọ́rọ́ Kị́nị́nyánáḅọ mini minii.

⁸ Kụ́ma a mịnga Ẹ́fịsọs ḅụ fịnịbẹm ákị muu Pẹntịkọs éné láa, saḅa ḅọ́rọ́ álálị́ ḅọ́rọ́fáma sáá,

⁹ tegó opu ḅụ́pọ́, pa ibifịrị nwángị bẹ ḅụ́pọ́ findi i pịrịmam, kụ́ma tọgha asọ mgbẹsẹapụ imii.

¹⁰ Ḅọ́rọ́ Timoti ḅọ ḅoo, árị ḅẹ́, ori ọmịnị na fịnị samamgba ọ gbẹ́rẹ́ ḅáláfama nyẹ arịbịgha, ḅẹ́ ọ Tamuno fịrị ma nwángịarị ịrịsọ nwángịarị ḅara.

¹¹ Gbẹ́rẹ́ḅọ sọ o dighisima ma, kụ́ma ọ ḅárásua ọ pịrị sị ori ọrẹ munyẹ muu diin ḅụ, ọ pịghịma i damaḅo bẹ ḅara, a ori na i jẹa mininiapụ ma tọ́rụ dighiarị.

¹² Mị́sa wámịna jẹa mininiḅọ Apọlọs gbolomanyẹ: A kụrọma dugho ọ pịrịm ḅẹ́ ori na isi mininiapụ ḅo ọmịnị arịị. Mị́sa ma o muu dọghụgha, kụ́ma o muubẹm ori asọ árị sáá.

Pọl Kunema Againma Na Kunema Sịbịpị

¹³ Ọ tọ́rụ́ kiri láa, sẹ kụrọ minini ma ḅụ, ọ tẹ́mẹ́ kụrọapụ sọ; ọ kụrọ fịnịị.

¹⁴ Nyẹ gonyẹ́ gonyẹ́ mịẹ, ḅẹlẹma ḅụ.

¹⁵ Ọ kọkọ Stefanasi na ọwarịapụ gbolomanyẹ nimi, nnị anịị parị mininiapụ Akaya ḅụ, n pịghị nna ḅụ saghịm fịrịnwangị Tamuno túminị́ ma pịrịmam. A ọ tẹ́ghẹ̄m, mịná owiapụ

¹⁶ ọ nwọfịnị túminị́ sịbịdá ma dua, na pịghị nnị na mịị fịrị ma nwangịarịḅọ gonyẹ́ gonyẹ́.

¹⁷ I bieḅẹlẹm Stefanasi, Fotunatọs na Akaikosi ḅo láa sáá, wa pálịma sị ọmịnị ine pa wa pịrịgha nyẹ, nnị pa wa pịrịmam.

¹⁸ Nnị pịghị wámịna tẹ́mẹ́ sị suumam nnị ọmịna tẹ́mẹ́ sị warị suu ḅara. Nwọfịnị owiapụ ọmịnị nnị pa kuu soma.

¹⁹ Esiya ḅẹrẹtọ yọ ḅụ fịnị sọsị mamgba nna sịbịpị fịrịmam. Akwila na Pirisiliya na pịghị nna wárị donaarị sọsị ma tẹ́mẹ́ láa sịbịpị fịrịmam.

²⁰ Mịnga fịnị wa jẹa mininiapụ mamgba fịrịmam ḅẹ a o bii. Ọ jụghọ jụghọ ḅolo Tamuno ma ẹ́rẹ́ ḅụ.

²¹ Irịị Pọl i ḅara na mịná sịbịpị ma gịẹm.

²² Kị́nị́nyánáḅọ ma ḅẹ́lẹ́maghaaḅọ gonyẹ́ gonyẹ́ gbonyẹ n ḅọ sịbị ọgọnọ. Yei Kị́nị́nyánáḅọ Ḅoo!

²³ Kị́nị́nyánáḅọ Jizọs tọ́rụ́kụrụkụ́rụ́ ọmịnị na fịnị.

²⁴ Ị́yẹ́ ḅẹlẹma ọmịnị Krais Jizọs bie fịnịapụ ma na fịnịị. Anị ọkọ fịnị.