1 Kọrịntịapụ 14 - Ibani New Testament

Tẹ́mẹ́ Ḅara Saghị ḅo Dienyẹ

¹ Ḅẹlẹma asọ ma dua, pịghị ibima Tẹ́mẹ́ dienyẹ ma dọghụ, kụ́ma ẹ́rẹ́so ḅa nyẹ ma anịị ikiakoro dienyẹ ma.

² Kịrị ḅẹ́lẹ̄ pa ẹ́gẹ́rẹ́ kọọarịḅọ gonyẹ́ gonyẹ́ ẹ́gẹ́rẹ́ túminị́ pịrịgha kụ́ma ẹ́gẹ́rẹ́ Tamuno pịrịm, tegó gbẹ́rẹ́ḅọ sọ ori akanyaḅogha. Ori ḅọghu karakárányẹ dughoarị Tẹ́mẹ́ ma kụ́rọ ḅụ ḅọ́rọ́.

³ Kụ́ma ikiakoroarịḅọ gonyẹ́ gonyẹ́ ẹ́gẹ́rẹ́ túminị́ pịrịarị sị pa ịnyọ pa nna ḅụ sua, nna tẹ́mẹ́ kụ́rọ́ma na pịghị nna bie diinma.

⁴ Jẹ́ ḅẹ́lẹ̄ pa ẹ́gẹ́rẹ́kọarịḅọ gonyẹ́ gonyẹ́ ịnyọ pa n ḅọ ḅụ ngéré ḅụ suarị, kụ́ma ikiakoroarịḅọ gonyẹ́ gonyẹ́ ịnyọ pa sọsị gbọrụ ma ḅụ suarị.

⁵ A biibẹm ḅẹẹ ọmịnị kị́nị́mamgba kịrị ḅẹ́lẹ̄ pa ẹ́gẹ́rẹ́kọọ kụ́ma anị i ḅụḅẹ́lẹ́ḅabẹm ḅọ́rọ́ ọmịnị kị́nị́mamgba ikiakoro. Ḅẹẹ ikiakoroarịḅọ ma nyẹ ḅụ sọ kịrị ḅẹ́lẹ̄ pa kọọarịḅọ ma nẹngịm ḅọ́rọ́ kị́nị́ ofori sị n ḅoo kọọ ẹ́gẹ́rẹ́ ma dughofindi sị pa sọsị gbọrụ ma mịẹ sẹnịmaa.

⁶ Anịgoo i jẹa mininiapụ, a ọ damaḅo ḅo a tẹ́ sọnyẹ sọ ọ pịrịbẹ a ḅọ sághị kịrị ḅẹ́lẹ̄ pa ẹ́gẹ́rẹ́kọọ sáá? Ḅọ́rọ́ a ine diepágháma nyẹ anịgha akanyaḅo anịgha ikiakoronyẹ anịgha againma ẹ́gẹ́rẹ́ akuogha.

⁷ Dúma ḅụ ófóri núme suu nyẹ ma dighi ipilepile anịgha ọdụ, tumḅọ tọ́rọ pa núme pụghọ ma nimi bẹ ḅọ́rọ́ nnị ofurogha sị nnị ibima anị pụghọ náa?

⁸ Ọdụ ma anị tụ́ma ḅara pa fieghaa sáá tumḅọ tọ́rọ́ pa tẹ́lẹ́ma ọ́mụ́gbi pịrịị bẹ?

⁹ Anị gbẹ́rẹ́ ḅara ma, tumḅọ tọ́rọ́ pa ị́yẹ́ akanyaḅo bẹ ḅọ́rọ́ i kịrị ḅẹ́lẹ̄ pa kọọ ẹ́gẹ́rẹ́ nnị anị nagha, ị́yẹ́ ẹ́gẹ́rẹ́ ma ẹmẹẹ́fábẹm fọ́rụ́ bie.

¹⁰ Tọgha tọgha ama ẹ́gẹ́rẹ imi tuminikiri ma bie nna bie, anịsọ oku nyanagha nyẹ oforii.

¹¹ Kụ́ma ḅọ́rọ́ a n fiearị ẹ́gẹ́rẹ́ ma nagha nagha anị ẹ́gẹ́rẹ́ ḅẹlẹ ma pa ẹ́gẹ́rẹ́ kọ́ọ́arịḅọ ma ịrị ọ ḅụ biaḅọ dighibẹm ori sọ ịḅụ biaḅọ dighibẹm.

¹² Anịị tarịarị ḅara ma, sị ị Tẹ́mẹ́ ma pịrịarị dienyẹ ma nyána, árị ḅẹẹ i ibima n pa fịrị ḅụ suam ḅárásua sị sọsị ma mịẹ sẹ́nịma bẹnyẹ.

¹³ Kịrị ḅẹ́lẹ̄ pa ẹ́gẹ́rẹ́ kọọarịḅọ tẹ́ghẹ̄ na ibim ḅẹẹ n ḅo ine n ḅọ kọọ ẹ́gẹ́rẹ́ ma daadugho.

¹⁴ A ḅẹ́lẹ̄ ḅụ tẹ́ghẹ̄ tẹ́ghẹ̄, i tẹ́mẹ́ anịị tẹ́ghẹ́arị nyẹ, kụ́ma ikúkúbie gbẹ́rẹ́nyẹ sọ mịẹgha.

¹⁵ Anịsáa, a tẹ́ mịẹbẹ? A ị tẹ́mẹ́ pa tẹ́ghẹ̄bẹm; a ị tẹ́mẹ́ pa núme suubẹm; kụ́ma a pịghị ị kúkúbie pa núme suubẹm.

¹⁶ Í ịmịẹḅam pa Tamuno ḅẹẹarị sáá tẹ́mẹ́ ḅụ ngéré, anịsáa pápáapụ ọ nana tẹ́ghẹ̄arịapụ ma n tọ́rọ pa ine <> ḅẹẹ ị́yẹ́ ịmịẹḅam tẹ́ghẹ̄ ma pịrịbẹ? Asọ ofori n ḅara warị nimi bẹ ḅara i dughoarị nyẹ.

¹⁷ Ḅọ́rọ́ ḅẹ́ dii ḅẹẹ ị́yẹ́ ịmịẹḅam tẹ́ghẹ̄ ma i tẹ́ghẹ̄ Tamuno pịrịarịnyẹ ma opuma ibii sọ, isiḅọ ma anị sọ ọ pịrị sọnyẹ oforii.

¹⁸ A ịmịẹḅam pa Tamuno ḅẹm ḅẹ́ a kịrị ama ḅẹ́lẹ̄ pa ẹ́gẹ́rẹ́kọọ ọmịnị mamgba nẹngịm.

¹⁹ Kụ́ma sọsị bie, a biibẹm a sọ́nọ́ a ẹ́gẹ́rẹ́kọọ túminị́ akanyaḅo bẹnyẹ sị pa nyẹ pa jẹ́apụ die, sị ḅẹ́lẹ̄ mmẹẹ́ a ndẹ́ẹ oyia si findi kọọ nakaragha.

²⁰ Ị jẹa mininiapụ ọmịnị awọamaapụ kịkama ọmịna kóróma ḅụ, siinyẹ gbolomanyẹ ḅụ ọmịnị awọamaapụ kịka, kụ́ma ọmịna kóróma ḅụ ọ sẹnịapụ dighi.

²¹ Tọ́ndiri ma bie n gịẹ kórómam ḅẹẹ, Kị́nị́nyánáḅọ dughom ḅẹẹ, <>

²² Anịgo kịrị ama ḅẹ́lẹ̄ pa ẹ́gẹ́rẹ́kọọ anịị ọ́ pa ilíghíma sua mininighaapụ ma pịrịnyẹ, mininiapugha, ikiakoro ma anịị mininiapụ nyẹ, mininighaapụ nyẹ́gha.

²³ Ḅọ́rọ́ sọsị gbọrụ ma ḅo kobirim, sị kị́nị́mamgba warị sághị kịrị ḅẹ́lẹ̄ pa ẹ́gẹ́rẹ́kọọ, ḅọ́rọ́ jẹ́ pápáapụ anịgha mininighaapụ wárị sọ ḅo, nnị n ḅẹẹbịgha ḅẹ́ ọmịnị kị́nị́mamgba ọ nọmụarị?

²⁴ Kuma ḅọ́rọ́ kị́nị́mamgba ikiakorom sị jẹ́ mininighaapụ sọ ḅo sáá anịgha pápáapụ, n naarị nyẹ ma ḅụ ḅọ́rọ́ nna siiamịẹnyẹ ḅo pághábẹm nnị pịghị nna sịbị ḅụ ḅẹ́rẹ́kọbẹm n náanyẹ ma ḅụ ḅọ́rọ́.

²⁵ Nna tẹ́mẹ́bie n kórómanyẹ ma ḅo pághábẹm, n pịghị sịbị tuubẹm sị Tamuno ma tẹ́ghẹ̄ nna sii kiẹarị angaá sị dughoarị ḅẹẹ, <>

Nyẹ Fịnị ḅara Sọsị Ma Bie

²⁶ Mịị a dughoarị nyẹ ị́yẹ́ amịnáapụ. O kobirimaẹrẹ tẹ́ghẹ̄ ḅụ, gbẹ́rẹ́ḅọ núme nyánam, jụghọ oku nyanam kịrị ẹ́gẹ́rẹ́ ḅẹ́lẹ̄ ḅụ, jụghọ pa n dughonyẹ ma dughofindi. Nnị nyẹ gonyẹ́ gonyẹ́ mịẹbẹm pa sọsị ma mịẹ sẹnịmaa.

²⁷ Ḅọ́rọ́ kị́nị́ kịrị ama ḅẹ́lẹ̄ pa ẹ́gẹ́rẹ́ kọọarị mmẹapụ anịgha siḅaá tẹ́rẹ́apụ ẹ́gẹ́rẹ́ẹ́, gbẹ́rẹ́ḅọ gbẹ́rẹ́ḅọ, kị́nị́ pịghị daadugho nyánam.

²⁸ Ḅọ́rọ́ daadughoḅọ ofori oforii, ẹ́gẹ́rẹ́arịḅọ ma bịpị gbẹ́ẹ̄ sọsị ma bie sịị ẹ́gẹ́rẹ́kọọ ọḅụ na Tamuno pịrịị.

²⁹ Mmẹẹ́ anịgha tẹ́rẹ́ ikiakoroapụ ẹ́gẹ́rẹ́ẹ́, isiapụ warị anị sịbị ḅẹ́rẹ́kọọ.

³⁰ Ḅọ́rọ́ diepágháma nyẹ ḅo kpọrọfị́nị́ḅọ pịrị pịrị, parị ẹ́gẹ́rẹ́arịḅọ ma bịpị gbẹ́ẹ̄.

³¹ Ọmịnị kị́nị́mamgba ine ikiakorobẹm, gbẹ́rẹ́ḅọ gbẹ́rẹ́ḅọ, kị́nị́mamgba nyẹ́dáwọ bẹ ḅara sị pịghị tẹ́mẹ́kụ́rọ nyáná.

³² Ikiakoroapụ ma tẹ́mẹ́ ikiakoroapụ ma sughubie imi.

³³ Tamuno ori galagalaḅọgha kụ́ma diin Tamuno. Anị fịnị ḅara Tamuno túminị́ sọsị mamgba ḅụ.

³⁴ Ẹ́rẹ́ámáapụ ma bịpị gbẹ́ẹ̄ sọsị sọsị bie. Nnị kụ́rọ pa n pịrịgha ḅẹẹ nnị ẹ́gẹ́rẹ́ẹ́, kụ́ma sughubie fịnị, ólóghó ma dugho ḅara.

³⁵ Nnị ḅọ́rọ́ nyẹ gbíla pághámaḅo dọghụ nnị nna dee gbilaa wárị, tegó anị ḅụ́gịrịrịmanyẹ ọ́rụ́ḅọ ẹ́gẹ́rẹ́ sọsị bie.

³⁶ Tamuno ẹ́gẹ́rẹ ma anị ọmịna ḅara sághị ḅoo? Anịgha ọmịnị ngéré anịị anị ḅo ḅụ láapụ?

³⁷ Siḅọ fịnịfị́nị́ị́ ḅẹ́ n ḅọ ikiakoroḅọ anịgha ibima tẹ́mẹ́ dienyẹ ma nyánam, anị tumḅọ ma nimi ḅẹ́ a gịẹárị nyẹ ma anịị Kị́nị́nyánáḅọ ma tọ ólóghó.

³⁸ Mịma dighi tọ́rụ́siḅọ, ori ma sọ nnị o dighi tọ́rụ́sibẹm.

³⁹ Anị ẹrẹ́sị, i jẹa mininiapụ, ikiakoro ọ pụghọ tarị, pịghị kịrị ḅẹ́lẹ̄ pa ẹ́gẹ́rẹ kọọ tọ ma.

⁴⁰ Kụ́ma nyẹ gonyẹ́ gonyẹ́ mịẹ gbụ́nụ́nụ́ma na pịghị karakárá ḅara.