1 Kọrịntịapụ 13 - Ibani New Testament

Ḅẹlẹma

¹ A ine túminị́ ḅẹlẹ fiebẹm na pịghị sookumuapụ ḅẹlẹ, kụ́ma a ḅẹlẹma nyanagha nyanagha, ị́yẹ́ ẹ́gẹ́rẹ́ ma anị papa biripụ́ma akwa anịgha opuma fiearị gbom dighimam.

² A ine ikiakoro dienyẹ ma nyánábẹm, a ine akanyaḅo nyánábẹm, sị ḅọghunyẹ gonyẹ́ gonyẹ́ akanyaḅo; a ine minini mamgba nyánábẹm a pa ine opu tụ́ndụ́ sumasi bẹnyẹ, kụ́ma a ḅẹlẹma nyanagha nyanagha, ịrị papanyẹ.

³ A ine a nyánányẹ gonyẹ́ gonyẹ́ die gálágálámabẹm pịghị ị́yẹ́ oju saghị pịrị ḅẹẹ nnị anị dọ́ghụ́ma, kụ́ma a ḅẹlẹma nyanagha nyanagha anị mịẹ i pịrị ibi ófóri.

⁴ Ḅẹlẹma nyánáḅọ ngịrịma nyánam, anị pịghị kị́nị́ balam, anị kị́nị́ nyẹ mọnịghaa, anịgha ḅụ sághị sóghólóma anịgha bịpịkpọ.

⁵ Ḅẹlẹma sị ḅara pa duma kọ kọgha anịgha anị ḅụ anị ḅụ nimi, álála iganịgha, anị n pa anị mịẹsị gịẹ kórómagha.

⁶ Ḅẹlẹma, bieḅẹlẹ nyáná siinyẹ pịrịgha, kụ́ma bieḅẹlẹ nyána karakáráma pịrịm

⁷ Ḅẹlẹma ngịrịma nyána nyẹ gonyẹ́ gonyẹ́ pịrịm, nyẹ gonyẹ́ gonyẹ́ mininim, nyẹ gonyẹ́ gonyẹ́ ḅụ tọ́rụ́ dighinyẹ nyánam, inema nyána nyẹ gonyẹ́ gonyẹ́ pịrịm.

⁸ Ḅẹlẹma fịnị gbámásom, ikiakoro imi, kụ́ma mịnanyẹ mamgba fịnị gbámásogha, kịrị ọwụ pa ẹ́gẹ́rẹ́kọọ dienyẹ imi, kụ́ma mịma sọ bibẹm níminyẹ imi kụ́ma anị ḅo ḅọ́rọ́bẹm.

⁹ Wámịna níminyẹ dienyẹ ma na ikiakoro dienyẹ ma mpara mpara ḅụ imi,

¹⁰ Kụ́ma kpain kárámá angaá nyẹ ma ḅo sáá anịsáa mpara mpara angaá nyẹ ma ẹmẹẹ́fábẹm.

¹¹ A ị́rụ́ sáá, a kálátụwọ ḅara pa ẹ́gẹ́rẹkọm, a kálátụwọ ḅara pa sịbịbie kiẹm, pịghị kálátụwọ ḅara pa nyẹ akanyaḅo. Mị́sa a ḅo tumḅọ láa sáá, a mịnị kálátụwọ ḅara pa duma kọọgha

¹² kụ́ma mị́sa wa tẹ́mẹ́ dighinyẹ ḅụ ḅuruḅuru ma árịarị, anịsáa, wa ḅo árịbẹm tọ́rụ́ na tọ́rụ́ na. Mị́sa a níminyẹ mpara mpara ḅụ imi; anịsáa anị ḅo karabẹm, Tamuno káara ḅara pa ị nimiḅara.

¹³ Mị́sa mịná tẹ́rẹ́anyẹ ma imi: minini, tọ́rụ́ dighinyẹ na ḅẹlẹma, kụ́ma nna ḅụ nyẹ mamgba nẹ́ngị nyẹ anịị ḅẹlẹma.