1 Kọrịntịapụ 12 - Ibani New Testament

Tọ́ntọ́ Tẹ́mẹ́ Ḅara Ḅo Dienyẹ

¹ Mị́sa Tẹ́mẹ́ dienyẹ ma gbólómanyẹ i jẹa mininiapụ a bighaa ḅẹ́ ọ nimigha ḅụ fịnị.

² Ọ kọkọ nimi ḅẹẹ na ọ Tamuno nimigha sáá, n tọgha tọgha asọ ḅụ ọ daá irimam sị o muu duma nyánágha n kárányẹ tẹ́ghẹ̄.

³ A dọ́ghụm o nimi ḅẹ gbẹ́rẹ́ḅọ sọ Tamuno tẹ́mẹ́ pa ẹ́gẹ́rẹ́ kọọarị ḅo jẹ́ éné jẹ́ éné dughobịgha ḅẹẹ, <> gbẹ́rẹ́ḅọ sọ ḅẹẹbịgha ḅẹẹ, <> ḅọ́rọ́ Tọ́ntọ́ Tẹ́mẹ́ ma n ḅo daatụ́ghụ́magha.

⁴ Tọ́rụ́kịrịkị́rị́ Tẹ́mẹ́ dienyẹ imi; kụma gbẹ́rẹ́ Tẹ́mẹ́ ma anịị anị pịrịarịnyẹ.

⁵ Tọ́rụ́kịrịkị́rị́ fịrịnwangị ḅara imi; kụ́ma gbẹ́rẹ́ Kị́nị́nyánáḅọ ma anịị anị n fịrịnwangị pịrịarịḅọ.

⁶ Tọ́rụ́kịrịkị́rị́ fịrịnwangị ḅara imi n pa fịrịnwangịarị nyẹ; kụ́ma gbẹ́rẹ́ Tamuno ma anịị ịnyọ pịrị sị n pa nna fịrị ma nwángịarị nyẹ.

⁷ Ọ́rụ́ḅọ ọ́rụ́ḅọ n Tẹ́mẹ́ ma pịrịm ḅẹẹ anị anị ḅụ diepágháma, sị kị́nị́mamgba anị ḅụ sọ́nyẹ nyáná.

⁸ Tẹ́mẹ́ ma pa gbẹ́rẹ́ḅọ pịrịarị opu níminyẹ oku, mị gbẹ́rẹ́ Tẹ́mẹ́ ma níminyẹ oku pa jụghọ pịrịm,

⁹ mị gbẹ́rẹ́ Tẹ́mẹ́ ma minini pa gbẹ́rẹ́ḅọ pịrịm ọ warị pa jụghọ pịrị kị́nị́ gwọọ kụ́rọ,

¹⁰ Tẹ́mẹ́ ma pa gbẹ́rẹ́ḅọ pịrịm sị n ḅọ ine ḅụ́gbérépuma fịrị nwángịị, jụghọ ikiakoro, jụghọ tẹ́mẹ́ kịrịkị́rị́ ma nimiḅo, jụghọ ine kịrị ama ḅẹlẹ pa ẹ́gẹ́rẹ́kọọ, jụghọ ine nimi Tọ́ntọ́ Tẹ́mẹ́ ma ḅara sághị ḅo dienyẹ na Tọ́ntọ́ Tẹ́mẹ́ ḅara sághịḅogha dienyẹ, jụghọ n ḅo kọọ ẹ́gẹ́rẹ́ ma daadugho.

¹¹ Kụ́ma mị gbẹ́rẹ́ Tẹ́mẹ́ ma ngéré anịị mịnanyẹ mamgba mịẹarịnyẹ anị ọ ḅụ́ḅẹlẹḅara, ọ tọ́rụ́kịrịkị́rị́ dienyẹ pa ọ́rụ́ḅọ ọ́rụ́ḅọ pịrịm.

Gbẹ́rẹ́ Oju Kụ́ma Angaá Angaá Nyanam

¹² Nganga ma gbẹ́rẹ́ oju ḅara ma kụ́ma nganga nyánam, ḅẹ́ oju mamgba karakárányẹ ḅẹ́ n dụḅam nnị pa gbẹ́rẹ́ oju ma, anịị Krais sọ fịnị ḅara.

¹³ Anị gbẹ́rẹ́ ḅara ma, wamịnị kị́nị́mamgba ḅọ́rọ́ Juuapụ anịgha Juughaapụ, ómóniapụ anịgha ḅara na nna sịbị nyánáapụ, mị gbẹ́rẹ́ Tẹ́mẹ́ ma mingi pa wa sara mị gbẹ́rẹ́ oju ma ḅụ suumam, Tamuno anị gbẹ́rẹ́ Tẹ́mẹ́ ma pa wamịnị kị́nị́mamgba tẹ́mẹ́bie suamam.

¹⁴ Oju ma anị ḅụgbọrụ gbẹ́rẹ́ angaá ngéré anị mịẹghaa, kụ́ma tọgha angaá.

¹⁵ Ḅọ́rọ́ ḅụọ ma ḅẹẹbẹm ḅẹẹ, <<Ịrị ḅaragha gosi, ịrị oju ma ḅụ ḅọgha,>> anịma mịẹbịgha sị anị mịnị oju ma ḅụ gbẹrẹḅọgha.

¹⁶ Ḅọ́rọ́ biri ma ḅẹẹbẹm ḅẹẹ, <<Ịrị tọ́rụ́gha gosi ịrị mịnị oju ma ḅụ gbẹrẹḅọgha,>> anịma mịẹbịgha sị anị mịnị oju ma ḅụ gbẹrẹḅọgha.

¹⁷ Ḅọ́rọ́ oju gbọrụ ma anịị tọ́rụ́ ngéré, anị tọrọ́ pa nyẹ náa bẹ? Ḅọ́rọ́ anị biri ngéré nyánam anị tọrọ́ pa fụrụnyẹ náa?

¹⁸ Anị fịnị ḅara ma, Tamuno kịrịkị́rị́ angaá ma suam oju ma bie, ori anị dọghụ ḅara.

¹⁹ Ḅọ́rọ́ nnị mamgba gbẹ́rẹ́ angaá, oju ma tẹ́ angaá fịnị bẹ?

²⁰ Anị fịnị ḅara ma, anị ọrụ ọrụ ọrụ nyánam, kụ́ma gbẹ́rẹ́ oju ma.

²¹ Anịgo, tọ́rụ́ ma ine ḅara ḅẹẹbịgha ḅẹẹ, <> Anịgha sịbị ma anị ine ḅụọ ḅẹẹ, <<Ḅẹ́, a ị bigha!>>

22 Anịmanakaragha oju ma ḅụ ịnyọ nyánágha nyẹ ma anịị opuma nyẹ ḅụ sọ́nyẹ.

²³ Oju ma ḅụ wa pa nyẹ́sịghaapụ ma anị wamịnị opuma sáá nyána pịrịnyẹẹ anịsáa oju ma ḅụ tọ́rụ ḅụ ibighaa angaá nyẹ ma wamịnị ibiḅara pa anị didighim,

²⁴ opuma fíafía párángáa ma bigha nyẹ. Tamuno sọ ọ ḅara na oju ma pa sua gbólómamam sị o kuu nẹ́ngị kuu pa oju ma ḅụ, kuu biiapụ pịrị.

²⁵ Anịgosi puama ofori oju ma ḅụ, kụ́ma mị kịrịkị́rị́ angaá ma gbẹ́rẹ́ ḅẹlẹma nyána jụghọ jụghọ pịrịm.

²⁶ Oju ma ḅụ ḅọ́rọ́ gbẹ́rẹ́ angaá tọ́rụ́siarịarị isi párángáa ma anị na tọ́rụ́siarị ma arịm n ḅọ́rọ́ gbẹ́rẹ́ angaá túminim, isi angaá apụ ma anị na bieḅẹlẹm.

²⁷ Ọmịnị kị́nị́mamgba anịị Krais oju ma, ọ́rụ́ḅọ ọ́rụ́ḅọ anịị gbẹ́rẹ́ angaá oju ma ḅụ.

²⁸ Sọsị ma bie Tamuno túminị́ tọọmam, párị nfịrịmaapụ, mmẹẹ́ kárámáapụ ikiakoroapụ, tẹ́rẹ́ kárámáapụ nyẹ́dieapụ; anịsáa ḅụ́gbérépuma fịrịnwangịapụ, mịnaapụ ma duaapụ anịị n kị́nị́ gwọọ kụrọ pa pịrịapụ anịgha ḅárásua jẹapụ pịrịapụ, túminị́ daatụ́ghụ́ma, tọ́rụ́kịrịkị́rị́ ḅẹ́lẹ pa ẹ́gẹ́rẹ́kọariapụ.

²⁹ Nnị kị́nị́mamgba nfịrịmaapụ? Nnị kị́nị́mamgba ikiakoroapụ? Anịgha nnị kị́nị́mamgba nyẹ́dieapụ? Nnị kị́nị́mamgba kụrọ nyáná sị pa ḅụ́gbérépuma fịrịnwangị?

³⁰ Anịgha pa obi gwọọ anịgha kịrị ama ḅẹ́lẹ̄ fie, anịgha kụrọ nyána pa n ḅo fie nyẹ daadugho.

³¹ Kụ́ma ọmịnị ọ tẹ́mẹ́ mamgba pa ibiḅaa dienyẹ ma igbanịị. Mị́sa, a pịghị ibiḅaa mị mamgba nẹ́ngịma nyẹ pa ọ diebẹm.