1 Kọrịntịapụ 11 - Ibani New Testament

¹ Ọmịnị i ḅụọ dua, irịsọ Krais ḅụọ duaarị ḅara.

Sịbịgbẹ Tẹ́ghẹ́arị Sáá

² A o túminim tegó sáá mamgba ọmịnị i pa biekórómáarị, ọ pịghị a sághị ọ pịrị dienyẹ ma duaarị.

³ Kụ́ma a biim ḅẹẹ sị ọmịnị akanyaḅo ḅẹẹ Krais ma, ori ma sịbịdá owitụ́wọ gonyẹ́ gonyẹ́ pịrịm, deeḅọ ma sịbịdá ọ taá pịrịm, Tamun ma ori ma pịghị sịbịdá Krais pịrịm.

⁴ Anịgo tẹ́ghẹ̄arị owitụ́wọ anịgha ikiakoroarịḅọ susi Tamuno pịrịarịḅọ sị ọ sịbị gbẹ́ẹ̄ Krais ḅụgịrịrịmaarị.

⁵ Susi Tamuno kubiri ogbo ḅụ amịna sịbị findi sị tẹ́ghẹ́arị ọ́rụ́ḅọ gonyẹ́ gonyẹ́ anịgha ikiakoroarị, ọkọfịnị ḅo a dee pa ḅụ́gịrịrị ḅụ suuarị, kịrịnyẹ ofori árị na n sịbị koro ọ́rụ́ḅọ.

⁶ Ḅọ́rọ́ ọ́rụ́ḅọ a sịbị gbẹẹgha, anị ibiḅam ḅẹẹ a gbẹ́rẹ́ sáá sịbị ma kịrịm. Anị kọkọ ḅụ́gịrịrịma nyẹ ḅẹẹ ọ́rụ́ḅọ a sịbị kọọrọm anịgha a sịbị kịrịị, anịgosi árị a sịbị gbẹ́ẹ̄.

⁷ Owitụ́wọ ọ sịbị gbẹ́ẹ̄ na ibighaa tegó, ọ Tamuno fíafía náa ori fịnị ḅara diearị. Kụ́ma ọ́rụ́ḅọ owitụ́wọ fiafiama diearị.

⁸ Nnị ọ́rụ́ḅọ ḅụ owitụ́wọ tẹ́mẹ́gha kụ́ma owitụ́wọ ḅụ anịị nnị ọ́rụ́ḅọ tẹ́mẹ́ nyẹẹ.

⁹ Anịgha nnị owitụ́wọ tẹ́mẹ́ ọ́rụ́ḅọ goo kụ́ma nnị ọ́rụ́ḅọ tẹmẹm owitụ́wọ gosi.

¹⁰ Sookumuapụ ma gosi anị ibim ḅẹẹ ọ́rụ́ḅọ a sịbị gbẹ́ẹ̄ nyẹ nyána, sị pa die ḅẹẹ árị a dee sughubie imii.

¹¹ Ḅọ́rọ́ owitụ́wọ ófórigha ọ́rụ́ḅọ ófórigha, ọ́rụ́ḅọ pịghị ofori ofori, owitụ́wọ ofori.

¹² Ḅẹẹ owitụ́wọ ḅụ anịị nnị ọ́rụ́ḅọ tẹ́mẹ́ pághámaḅo nyẹ anị gbẹ́rẹ́ ḅara ma ọ́rụ́ḅọ anị pịghị owitụ́wọ yii nyẹ; Tamuno anị pịghị nyẹ gonyẹ́ gonyẹ́ ḅara saghị ḅoarịḅọ.

¹³ Ọmịnị ọ ḅára na kọọ anị karakárá ḅẹẹ ọ́rụ́ḅọ Tamuno tẹ́ghẹ̄arị warị a sịbị findi warị anị gbẹ́gha pa.

¹⁴ Tegó, tuminikiri nyẹ fịnị ḅara kọkọ pa o die ḅẹẹ nángwọ sịbị núme owitụ́wọ sịbị ó ḅụ́gịrịrịma nyẹ.

¹⁵ Kụ́ma ọ́rụ́ḅọ ḅụ, anịị a mịẹ fiafiama árịnyẹ, Árị nángwọ sịbị núme ma n pa a pịrịm ḅẹẹ a pa a ḅụ gbẹ́ẹ̄.

¹⁶ Kụ́ma mịma na nụná bẹḅọ, a dugho ọ pịrị sị ọ mịẹbẹnyẹ anị ḅẹẹ, wamịnị anịgha Tamuno sọsị mamgba jẹ́ Tamuno tẹ́ghẹ̄ ḅara nyanagha.

Kị́nị́nyánáḅọ Tọ́ntọ́ Fị́nyẹ Ma

¹⁷ Mị́sa a pa ọ pịrị dọghụ againma ma ḅụ, a ọ tuminigha tegó ọmịna susi Tamuno pịrị kobiri anị mịẹarị siinyẹ anị ibi nẹngịm.

¹⁸ Párị nyẹ, n dugho ọ pịrịmam ḅẹẹ puama ọmịnị ogboku bie imi o ḅo kobirimaẹrẹ sọsị ḅara ḅẹẹ ọ tẹ́ghẹ̄, mịma a pịghị kálá ḅara pa anị mininim.

¹⁹ (Pighi bẹnyẹ anị bie ofori, puama ọmịna ogboku bie fịnịbẹm sị karakáráma ḅụ fịnịapụ ma nnị ibima nna árị bẹ ḅara).

²⁰ Ó ḅo kobiri sáá, Tọ́ntọ́ fị́nyẹ ma anịị ọ fịarị nyẹ́gha,

²¹ ọ nyẹ ma fịarị sáá, ọ́rụ́ḅọ ọ́rụ́ḅọ amịna fị́nyẹ fịịarị gbẹ́rẹ́ḅọ sọ kurugha pa, mịma gosi jẹ́apụ ḅurutarị ḅụ imi, jẹ́apụ ịrụ ḅuu tọ́rụ́ḅáma.

²² Ọ́ warị nyánágha ọ fị sị pịghị ḅuu bẹ angaá ọ Tamuno sọsị ma dighisima bẹ sị bẹnyẹ bẹnyẹ nyánágháapụ ma pa ḅụ́gịrịrị bie sua bẹ? A tẹ́ dugho ọ pịrịbẹ mịma gbolomanyẹ? A ọ túminị́ bẹ? A ọkọ mịẹbịgha!

²³ A Kị́nị́nyánáḅọ ḅara daaḅom, a pịghị ḅọ́rọ́ma ọ pịrịarị dienyẹ ma, ḅẹẹ Kị́nị́nyánáḅọ Jizọs nnị ọ dẹrịfị éné dii ma ḅụ, ọ fịturu mpara akịm.

²⁴ Ịmịẹḅam pa Tamuno ma pịrị, anị puu warị ḅẹẹ, <>

²⁵ Anị gbẹ́rẹ́ ḅara ma n fị́nyẹ ma fị sọọ sáá ori ọmọngọ ma sághị akịm warị ḅẹẹ, <>

²⁶ Mịma dughoarị ḅẹẹ ị mị fịtúrú ma fị sáá gonyẹ́ gonyẹ́ pịghị mị ọmọngọ ma ḅụ ḅụụ sa gonyẹ́ gonyẹ́ i Kị́nị́nyánáḅọ ma fịị dugho pághámaarị akị mú o ḅo bẹ sáá láa.

²⁷ Anịgosi ḅọ́rọ́ kị́nị́ Kị́nị́nyánáḅọ fịtúrú ma fịfị na pịghị ori ọmọngọ ma bie ḅuu ḅuu anị ḅụgbẹ́gha ḅara i siinyẹ pa Kị́nị́nyánáḅọ oju ma na ọmbịnyẹ́ mịẹm.

²⁸ Anị ẹrẹ́sị, ibima párị ịḅụ peele dighi, anịsáa fịtúrú ma fị pịghị ọmọngọ ma bie ḅụụ.

²⁹ Ị ḅọ́rọ́ Kị́nị́nyánáḅọ ma oju sẹ́pịrịnyẹ ma lighilighiḅogha lighilighiḅogha i fịtúrú ma fịarị sa na pịghị ọmọngọ ma bie ḅuuarị sáá, i ḅẹ́rẹ́kọọ akuoo ịḅụ pịrịarị i fịị pịghị ḅụụ sáá.

³⁰ Anị ọ ḅụ tọghaapụ goo obikiri ḅụ iminyẹ jẹapụ ịnyọ ḅụ oforighaapụ sọnyẹ, tọghaapụ pịghị fịịmam.

³¹ Wa ḅọ́rọ́ párị wa ḅụ peele dighi bẹ ọkụ́ma, wa Tamuno ḅẹ́rẹ́kọọ siri ḅụ sọbịgha.

³² Kụ́ma Kị́nị́nyánáḅọ wa sịbị ḅẹ́rẹ́kọm pịghị fomḅara pa wa fom, sị n tuminikiriapụ na wa sua ḅẹ́rẹ́ ḅárásiapụ sọmabịgha ḅara.

³³ Anịgo, i jẹa mininiapụ okobirimaere ḅẹẹ ọ Kị́nị́nyánáḅọ ḅupiri fị́nyẹ ma fịị, o jụghọ jụghọ kúru

³⁴ Ọmịna bie fị́nyẹ táarịarịḅọ imi imi n ḅo tarị nyẹ fị wárị, sị Tamuno ḅẹ́rẹ́kọọ ma n ḅo sịbị gbanabịgha ḅara o kobirimaẹrẹ. Isi angaá ḅẹ́rẹ́ ma a ḅo láa sáá a ọ daatụ́ghụ́mabẹm.