1 Kọrịntịapụ 10 - Ibani New Testament

Nnị Kárá Tamuno Gboloma Birinụ́nụ́

¹ I jẹa miniapụ, a dọ́ghụm ọ pa biekóróma, wámịna tádọ́apụ Mosis duaapụ ma ḅụ pághányẹ. Oḅuto ma nnị kị́nị́mamgba gbẹm n warị gbẹ́rẹ́nyẹ sọ n laagha ḅara ḅụ Ányị́nyá tọ́rụ́ ma sáḅá.

² Anị fịnị ḅara sọ́ḅọ́rọ́ nnị oḅuto ma na tọ́rụ́ ma na pa mingi pa n saram Mosis ọḅụduaapụ ḅara.

³ Kị́nị́mamgba gbẹ́rẹ́ tẹ́mẹ́ fịtúrú ma fịịm

⁴ pịghị gbẹ́rẹ́ tẹ́mẹ́ iru ma ḅuu. Nnị n duanwángi tẹ́mẹ́ okpodapịrị ma ḅụ mingi ḅuum, anị okpodapịrị ma anịị Krais ḅụgbọrụ.

⁵ Kụ́ma, anịsọ Tamuno tẹ́mẹ́ ḅẹlẹ nyáná n ḅụ tọghaapụ pịrịgha, anịgo nna dua elesiri ma ḅụ galagala famam.

⁶ Mịnanyẹ mamgba kiriakị pa wa diem birinụ́nụ́ ḅara ḅụ ḅẹẹ siinyẹ wa pụghọ tárị ma anị ánị túminị́ ma tárị ḅara,

⁷ anịgha mú n kárá tamuno tẹ́ghẹ̄, nna ḅụ jẹ́apụ mịẹḅara ma. Tọ́ndiri ma dugho ḅara ma ḅẹẹ, <>

⁸ Wamịnị ama nwángị duma kọọbịgha, nna ḅụ jẹ́apụ kọọ ḅara, anịgosi gbẹ́rẹ́ éné túminị́ a mmẹẹ́ pughu tẹ́rẹ́ faá si a ndẹ́ẹ na oyia si sóghóró korom sị fịị.

⁹ Wa Kị́nị́nyánáḅọ ma daádighibịgha, jẹ́apụ ọ daádighi ḅara sị ododó ma warị n gbọḅáa.

¹⁰ Ọmịnị saghị n búrúnbúrúbịgha jẹ́apụ nbúrúnbúrú ḅara sị fịị sookumuapụ ma warị n guluguluma.

¹¹ Mịnanyẹ ma n ḅụ págháam sị jẹ́apụ anị pa nyẹ dáwọ bẹ ḅara, n pịghị gịẹ kórómam pa wámịna biri nụ́nụ́m. Tegó wa dúma kọọarị sáá ma kunema sa biri.

¹² Ị ḅọ́rọ́ sị ḅẹẹ ị́ ibima sẹ́fị́nịarị ịḅụ ẹbị, sị ịbịghịbịgha ḅara.

¹³ Ị arịmáa daádighi gonyẹ́ gonyẹ́ anịị túminị́ sámámgba arịarị daádighi ma. Tamuno o minini nyẹ mịẹbẹm, o minibịgha sị ị́yẹ́ ịnyọ ine daabịgha daádighi ḅoo ị láa. O wáriso sị anị daádighi ma ḅo ọ laarị sáá ọ pịghị ịnyọ pa ọ pịrịbẹm ọ pa ine anị inema, ọ pịghị asọ findibẹm ọ pa ine mangị págháaḅo.

¹⁴ Anịgosi, ị́yẹ́ ibi nangwọapụ ọmịnị ọ ḅụ fófóoma nkára tamuno tẹ́ghẹ̄ ḅụ.

¹⁵ A ẹ́gẹ́rẹ́kọọ sịbịbie nyánáapụ pịrịm ọmịnị ḅara na ḅẹ́rẹ́kọọ ọ ḅụ pịrị a dughonyẹ ma ḅụ.

¹⁶ Wamịnị iru ḅụ sá, n pa Tọ́ntọ́ fị́nyẹ pịrịarị ọmọngọ ma bie, warị imiẹḅa pa Tamuno ḅẹ́, wa diekiri nyánáarị Krais ọmbịnyẹ́ ma ḅụ. Wa pịghị fịtúrú ma puu fị sá, wa pịghị diekiri nyánáarị Krais oju ma ḅụ.

¹⁷ Gbẹ́rẹ́ fịtúrú kpo ma imi gosi, wamịnị kị́nị́mamgba karakárányẹ ḅẹẹ wa dụḅam wamịnị gbẹ́rẹ́ oju, wamịnị kị́nị́mamgba gbẹ́rẹ́ fịtúrú ma diem.

¹⁸ O kóróma nyána Izirẹlịawọ pịrị, n pa igwagwaá fị́nyẹ ma fịịapụ ma diekiri nyánam ẹ́bẹ ọ́gọ́nọ n nwángị Tamuno pịrị fịrị ma ḅụ.

¹⁹ A mịma dugho ḅara ma anị dugho ḅẹẹ n gwaa pa n kárá tamuno pịrị igwaa ḅẹnyẹ ḅẹnyẹ ḅụ imi anịgha ḅẹ́ n kárá tamuno ḅẹnyẹ ḅẹnyẹ ḅụ imii?

²⁰ Ọkọ fịnịgha! Mị a dughoarị nyẹ ḅẹ́ Tamuno nímighaapụ ma ẹ́bẹ ọ́gọ́nọ n gwáa igwáa ma, n gwaa pa sitẹ́mẹ́ pịrịm, n gwaa pa Tamuno pịrịgha. A pịghị bigha ḅẹẹ ọmịnị na sitẹ́mẹ́ na mịẹgbólóma nyẹ nyána.

²¹ Ọmịnị ine Kị́nị́nyánáḅọ ọmọ́ngọ ḅụ ḅuubịgha pịghị sitẹ́mẹ́ ọmọ́ngọ ḅụ ḅuu, ọmịnị ine Kị́nị́nyánáḅọ nyẹ́fị ịkasị ḅụ nyẹ́fịbịgha na pịghị oru nyẹ́fị ịkasị ḅụ nyẹ́fị.

²² Wa dọghụ ḅẹẹ Kị́nị́nyánáḅọ ma ḅoo nyẹ́mọ́ni? Wa sị ḅẹẹ wa kụ́rọ ọ nẹ́ngị?

Jẹ́apụ Mịẹsị Nnị Bịghị Bẹnyẹ Mịẹma

²³ Anịị n dugho ḅara ḅẹẹ, <> Anịma karakáram, kụ́ma nyẹ gonyẹ́ gonyẹ́ sọ́nyẹ ḅụ sọ́gha

24 Ọmịna ḅụ gbẹ́rẹ́ḅọ sọ amịna ḅụ ibi dọ́ghụ́ma kụ́ma jẹ́apụ ḅụ ibi dọghụ.

²⁵ Ọmịnị ine nama dẹrị fẹ ḅụ ọmịnị árị nama gonyẹ́ gonyẹ́ pẹébẹm, nyẹ gbiláagha pa, i biebẹ tẹ́mẹ́ gosi.

²⁶ Ḅẹẹ Tọ́ndiri ma dughom ḅẹẹ, <>

²⁷ Ḅọ́rọ́ mininighaḅọ i siim ḅẹ́ ḅoo nyẹ́fị, i warị mini sị muu, n pa gbánā ị pịrịnyẹ gonyẹ́ gonyẹ́ fịị, ḅụḅáláḅálá pa ị tẹ́mẹ́ pịrịbẹnyẹ gbíla ma.

²⁸ Kụ́ma ḅọ́rọ́ kị́nị́ dugho ị pịrị pịrịị ḅẹẹ, <> Anịsáa, ị anị fị́nyẹ ma fịbịghaa nyẹ dugho ị pịrịḅọ ma gosi, na pịghị ị biebẹ tẹ́mẹ́ gosi

²⁹ Anịma anị i biebẹ tẹ́mẹ́gha, kụ́ma isi tumḅọ ma biebẹ tẹ́mẹ́. Anịsáa kị́nị́ gbilabẹm tegósi jụghọ sịbị ḅẹ́rẹ́kọ bẹ ị́yẹ́ ḅara na sịbị nyáná ma gosi?

³⁰ A ḅọ́rọ́ ịmịẹḅam pa Tamuno pịrị iyẹ fị́nyẹ gósi, tumḅọ tegósi i dughosima bẹ a ịmịẹḅam pa pịrị fị́nyẹ gósi?

³¹ Anịgosi ọ mịẹnyẹ gonyẹ́ gonyẹ́, ḅọ́rọ́ ọ nyẹ́fị anịgha ọ nyẹ ḅụụ, nyẹ gonyẹ́ gonyẹ́ mịẹ Tamuno boma ḅụ.

³² Duma kọọ ị ḅụḅáláḅálá dighi gbẹ́rẹ́ḅọ sọ pịrịbịgha ḅara Juuapụ anịgha Juughaapụ anịgha Tamuno sọsị ma.

³³ Pa a mịẹḅara mịẹ, a asọ dọ́ghụm sị a kị́nị́mamgba tẹ́mẹ́ mịẹ ḅẹlẹma, a mịẹarịnyẹ, gonyẹ́ gonyẹ́ ḅụ, ị́yẹ́ angaá ibi pa biekoromagha pa, kụ́ma kị́nị́mamgba ibi sị n dụaḅọ́rọ́ma nyána bẹ ḅara.