1 Jọn 5 - Ibani New Testament

Minini Tamuno Tụwọ Ma Ḅụ

¹ Mininiḅọ gonyẹ́ gonyẹ́ ḅẹ́ Jizọs ori anịị n Pulo pa Sịbị Saraḅọ, anịḅọ ma anịị Tamuno Tụwọ, Daḅọ ma ḅẹlẹma ḅọ gonyẹ́ gonyẹ́ pịghị ọ Tụwọ ḅẹ́lẹ́mabẹm.

² Wa ḅọ́rọ́ Tamuno ḅẹlẹma nḅẹḅẹ́ sị ori ólóghó koko, mị ḅara ma wa nimibẹm ḅẹ́ wamịnị Tamuno ma awọ.

³ Wámịna Tamuno ḅẹlẹma dughoarị ḅẹ́ wamịnị ori ólóghó ma kokoarị. Ori ólóghó pịghị opuma wámịna ḅụ ikugha,

⁴ ḅẹ́ Tamuno tụwọ sọmáaḅọ gonyẹ́ gonyẹ́ tuminikiri ma sọḅasọḅam. Wámịna minini anị mịẹsị wamịnị ine tuminikiri ma sọḅaarị nyẹ.

⁵ Tụọ ine tuminikiri ma Sọ́ḅa bẹ? Anịị mininiḅọ ngéré ḅẹ́ Jizọs anị Tamuno Tụwọ.

Jizọs Krais Onyésẹ̄ḅọ

⁶ Jizọs Krais anịị ori mingi sara mingi ma na ori fịị ọmbịnyẹ́ pa ḅoḅọ. O mingi ḅụ ngéré ḅogha, kụ́ma mingi ma na ọmbịnyẹ́ ma na, Tẹ́mẹ́ ma pịghị dugho pághámaarị ḅẹẹ mịma karakárányẹ tegó Tẹ́mẹ́ ma karakáram.

⁷ Tẹ́rẹ́apụ anị onyẹ́sẹ nyẹ:

⁸ Tẹ́mẹ́ ma, mingi ma, na ọmbịnyẹ́ ma na, mịná tẹ́rẹ́ ma gbẹ́rẹ́ dugho págháma nyẹ nyánam.

⁹ Wa túminị́ dugho págháma nyẹ mininim, kụ́ma Tamuno dugho págháma nyẹ ma kụrọḅam, tegó mịma anịị Tamuno dugho págháma nyẹ ọ Tụwọ gbolomanyẹ.

¹⁰ Anịgo Tamuno Tụwọ ma ḅụ mininiḅọ gonyẹ́ gonyẹ́ mịị dugho págháma nyẹ ma nyánam nna tẹ́mẹ́bie, kụ́ma Tamuno mininighaapụ ọ pa epeletiḅọ sọmam, tegó na nnị mininigha Tamuno dughonyẹ ọ Tụwọ ḅụ.

¹¹ Dugho págháma nyẹ ma anịị: ḅẹ́ Tamuno gbámásó duma pa wa pịrịmam, mịị duma ma ọ Tụwọ bie anịị anị pịghị fịnịnyẹ.

¹² Tụwọ ma nyánáḅọ gonyẹ́ gonyẹ́ mịị duma ma nyánam; Tamuno Tụwọ ma nyánághaḅọ duma nyanagha.

Kunema Againma

¹³ A mịị diri ma gịẹ ọ pịrịarị, ọ mịnị Tamuno Tụwọ ma ẹ́rẹ́ ḅụ mininiapụ ḅẹ́, ọ nimi bẹ ḅará ḅẹ́ ọ gbámásó duma nyánam.

¹⁴ Mịị wa nyáná tẹ́mẹ́kụ́rọ wamịnị Tamuno fịnị ngaa ḅoarị sa ḅẹ́, ọ tọ́ọ kọ́rọ́ma sị wa binyẹ gonyẹ́ gonyẹ́ ọ pa wa pịrịbẹm.

¹⁵ Ọ wa náa nam wamịnị ọ ḅara nyẹ bi sa gonyẹ́ gonyẹ́, wa pịghị nimiḅara ma ḅẹ́ mịma karakárányẹ, wa pịghị nimim ḅẹ́ wa binyẹ gonyẹ́ gonyẹ́ ọ pa wa pịrịpịrịm.

¹⁶ Ḅọ́rọ́ kị́nị́ amịna mị́naḅọ árị, siinyẹ mịẹ, kụ́ma mị siinyẹ ma fịị dighiḅogha, anị ibim ị Tamuno tẹ́ghẹ̄ n ḅọ pịrị, ine duma pa nḅọ pịrịbẹḅọ. Mịma gbolomaapụ anịị nna sii n dighi mú fịị bie suughaapụ kụ́ma fịị dighiḅọ bẹ sii imi, a ḅẹgha ḅẹ́ ị Tamuno ma tẹ́ghẹ̄ anịma gbólómanyẹ.

¹⁷ Irima nyẹ gonyẹ́ gonyẹ́ anị sii, kuma sii imi tumḅọ dighi mú fịị bie suabịgha nyẹ.

¹⁸ Wa nimim ḅẹ́ Tamuno Tụwọ sọmaaḅọ gonyẹ́ gonyẹ́ sámámgba siinyẹ mịẹ mịẹbịgha, Tamuno Tụwọ ma n kokowarịarị, sii tumḅọ ma sọ ine nyẹ pa n lámábịgha.

¹⁹ Wa nimim ḅẹ́ wamịnị Tamuno awọ, tuminikiri gbọrụ ma sọ sii tumḅọ ma sughubie imi.

²⁰ Wa pịghị nimim ḅẹ́ Tamuno Tụwọ ma ḅomam sị akanyaḅo pa wa pịrịmam, si wa karakárá Tamuno ma nimi, wa karakárá Tamuno ma na gbẹ́rẹ́ḅụ ḅụ imii ọ Tụwọ Jizọs Krais ma na gbẹ́rẹ́ḅụ ḅụ imi. Mịị karakárá Tamuno ma, mịị pịghị duma gbámásó.

²¹ Ị́yẹ́ ibi awọ ọmịnị ọḅụ fóofóoma n kárá tamuno ḅụ.