1 Jọn 4 - Ibani New Testament

Tẹ́mẹ́ Gonyẹ́ Gonyẹ́ Daádighi

¹ Ị́yẹ́ ibi nangwọapụ, ọ tẹ́mẹ́ gonyẹ́ gonyẹ́ minini ma, kụ́ma tẹ́mẹ́ mamgba daádighi pa nimi ḅọ́rọ́ nnị Tamuno ḅara saghị ḅo, tegó tọgha tọgha epele ikiakoroapụ tuminikiri ma sọmam.

² Mịị anịị ị Tamuno Tẹ́mẹ́ ma lighilighiḅo bẹ ḅara: dugho tẹ́mẹ́ gonyẹ́ gonyẹ́ ḅẹ́ Jizọs Krais ojumẹnị sua sị tuminikiri ḅomam, anị tẹ́mẹ́ ma Tamuno ḅara saghịḅom.

³ Kụ́ma mininigha tẹ́mẹ́ gonyẹ́ gonyẹ́ ḅẹ́ Jizọs Krais ojumẹnị sua tuminikiri ḅomam, anị tẹ́mẹ́ ma Tamuno ḅára saghị ḅo Tẹ́mẹ́ ma nyanagha. Nnị ḅọ nyáná tẹ́mẹ́ anịị Krais iruonaḅọ tẹ́mẹ́. Ọ kọkọ náa ḅẹ́ anị ḅobẹm, anị mị́sa tuminikiri imii.

⁴ Ọmịnị ị́yẹ́ ibi awọ, ọ Tamuno ju saghịḅom, ọ pịghị epele ikiakoroapụ ma sọḅamam, tegó ọmịna bie fịnị Tẹ́mẹ́ ma anị kụ́rọ tuminikiri ma bie fịnị túminị́ bie fịnị tẹ́mẹ́ ma nẹngịm.

⁵ Mịị epele ikiakoroapụ ma tuminikiri gboloma ḅẹ́rẹ anịị n dughoarị nyẹ, tuminikiriapụ ma warị pịghị nnị pughu, tegó nnị anịị tuminikiri bẹapụ.

⁶ Wamịnị Tamuno ju saghịḅom, Tamuno nimiḅọ gonyẹ́ gonyẹ́ wa pughu pughum, Tamuno ju saghị ḅoghaapụ wa púghú pughugha. Mịị ḅara ma anịị wa karakárá ma Tẹ́mẹ́ lighilighi ḅoarị ḅara epeleti tẹ́mẹ́ ḅụ.

Tamuno Ori Anịị Ḅẹlẹma

⁷ Ị́yẹ́ ibi nangwọapụ, o ḅo wa jụghọ jụghọ ḅẹlẹma, tegó ḅẹlẹma Tamuno ḅara saghịḅom. Kị́nị́ ḅẹ́lẹ́maarịḅọ gonyẹ́ gonyẹ́ anịị Tamuno Tụwọ ma pịghị Tamuno ma nimim.

⁸ Ḅẹlẹma ḅẹ́lẹ́maghaḅọ gonyẹ́ gonyẹ́ Tamuno nimigha, tegó Tamuno ori anịị ḅẹlẹma.

⁹ Tamuno ọrẹ ḅẹlẹma diepágháma wa pịrịm, ori ọrẹ kpọ́kpọ́ gbẹ́rẹ́ Tụwọ pa tuminikiri ma fịrịmam sị wamịnị ọ ḅụ ḅọ́rọ́ duma nyáná bẹ ḅara.

¹⁰ Mịma anịị ḅẹlẹma sẹ́pịrịnyẹ: ḅẹgha ḅẹ́ wa Tamuno ma ḅẹ́lẹ́mamam, kụ́ma ori wa ḅẹ́lẹ́mam, warị ọ Tụwọ fịrịma sị ọ ḅụ ḅọ́rọ́ wa siiḅụḅarasi nyáná bẹ ḅara.

¹¹ Ị́yẹ́ ibi nangwọapụ, ḅọ́rọ́ Tamuno mị ḅara ma pa wa ḅẹ́lẹ́mam, wamịnị sọ jụghọ jụghọ ḅẹlẹma na ibim.

¹² Gbẹ́rẹ́ḅọ so na Tamuno arịgha, kụ́ma wa ḅọ́rọ́ jụghọ jụghọ ḅẹlẹma, wamịnị na Tamuno na gbẹ́rẹ́ḅụ ḅụ imi. Ori ḅẹlẹma pịghị anị ḅụ mịẹ kpainmamam wámịna bie.

¹³ Wa ibima nimim ḅẹ́ wamịnị ori na gbẹ́rẹ́ḅụ ḅụ imi, ori sọ pịghị wamịnị na gbẹ́rẹ́ḅụ ḅụ imii, ori ọrẹ Tẹ́mẹ́ pa wa pịrịmam gósi.

¹⁴ Wa pịghị árịmam, pịghị dugho págháma ḅẹ́ Daḅọ ma ọ Tụwọ fịrịmamam ḅẹ́ o ḅo tuminikiri Dụaḅọ́rọ́maḅọ sọ.

¹⁵ Dugho págháma ḅọ gonyẹ́ gonyẹ́ ḅẹ́ Jizọs ori anị Tamuno Tụwọ ma, Tamuno na gbẹ́rẹ́ḅụ ḅụ imii, Tamuno ma sọ pịghị nḅọ na gbẹ́rẹ́ḅụ ḅụ imii.

¹⁶ Wa nimim pịghị minini Tamuno nyáná wa pịrị ḅẹlẹma. Tamuno ori anị ḅẹlẹma. Ḅẹlẹma ḅụ ngaaḅọ gonyẹ́ gonyẹ́ Tamuno na gbẹ́rẹ́ ḅụ ḅụ imii, Tamuno sọ nḅọ na gbẹ́rẹ́ ḅụ ḅụ imim.

¹⁷ Mịị ḅara ma, ḅẹlẹma anị ḅụ mịẹ kpainmamam wámịna bie, wa pịghị ine tẹ́mẹ́kụ́rọ nyánábẹm ḅẹ́rẹ́kọ éné ma, tegó mị tuminikiri ma ḅụ, ọ fịnị ḅára anịị wa fịnị ḅara.

¹⁸ Ḅáláfa ofori ḅẹlẹma ḅụ; kụ́ma kpain ḅẹlẹma ḅáláfa kaa sịsịm. Mịma dughoarị ḅẹ́, ḅáláfaarịḅọ gonyẹ́ gonyẹ́ ḅẹlẹma na anị ḅụ mịẹ kpainmagha n ḅọ duma bie, tegó ḅáláfa fomḅara ḅụ saghịḅom.

¹⁹ Wa ḅẹlẹma nyanam tegó Tamuno parị wa ḅẹ́lẹ́mam.

²⁰ Bẹḅọ fịnịfịnị ḅẹẹ, <> anịsọ n ḅọ mị́naḅọ na tarịgha ḅụ fịnị, anị tumḅọ ma epeletiḅọ. Tegó ine amịna mị́naḅọ, n ḅọ tọ́rụ́ pa árịarịḅọ ḅẹ́lẹ́maghaḅọ ine n ḅọ na arịgha Tamuno ma ḅẹ́lẹ́mabịgha.

21 Mịị Krais tọ́ọ wa pịrị ólóghó ḅẹ́ Tamuno ḅẹlẹma ḅọ gonyẹ́ gonyẹ́ pịghị amịna mị́naḅọ ḅẹ́lẹ́mabẹm.