1 Jọn 1 - Ibani New Testament

Duma Ẹ́gẹ́rẹ́

¹ Súghú saghị sa fịnịnyẹ ma, wa pịghị namaa nyẹ ma, wa pịghị wamịna tọ́rụ́ pa arịmáa nyẹ ma, wa tọ́rụ́ pa dighim pịghị ḅara pa anị lama, mịma anịị duma ẹ́gẹ́rẹ́ ma wa gịẹ pa ọ fịrịma nyẹ.

² Mịị duma ma anị ḅụ die sa, wamịnị anị arịm pịghị anị gbolomanyẹ dughom, pịghị Daḅọ ma na fịnị duma gbámásó gbolomanyẹ dugho ọ pịrị, mịma anịị n pịghị mịẹsị wa níminyẹ.

³ Wamịnị árị pịghị namaa nyẹ ma anị wa pịghị dugho págháma ọ pịrịnyẹ, ọmịnị wamịnị na miẹgbolomáa nyáná bẹ ḅara, mị miẹgbolomáa ma, wa Daḅọ ma na anị nyanam na pịghị ọ Tụwọ Jizọs Krais.

⁴ Wa mịma gịẹárị wámịna bieḅẹlẹ bii bẹ ḅara.

Baá Ma Bie Asọ Nwángị

⁵ Mị́sa wamịnị ọ Tụ́wọ bịpị náa sị dugho págháma ọ pịrị oku ma mịị anị: ḅẹ́ Tamuno anịị baá ma, ọ ḅụ gbẹ́rẹ́ kánákáná sọ ofori.

⁶ Ḅọ́rọ́ wa ḅẹ́ wa ọ nana miẹgbolomáa nyánam, kụ́ma pa kánákánábie ngaa, epele anị wa tiarị nyẹ, ẹ́gẹ́rẹ́ pụghọ ḅụ na pịghị fịrị ḅara ḅụ.

⁷ Kụ́ma wa ḅọ́rọ́ baá ma bie asọ nwángị, ori ma sọ baá ma bie fịnị ḅara, anịsáa wa jụghọ jụghọ na mịẹgbólóma nyánam, ọ Tụwọ Jizọs Krais ọmbịnyẹ́ sii gonyẹ́ gonyẹ́ ḅụ wa sịrịsịarị.

⁸ Ḅọ́rọ́ wa ḅẹ́ sii wámịna ḅụ ofori, wamịnị oḅori pa wa ḅụ sịarị, karakáráma sọ wámịna bie ofori.

⁹ Wa ḅọ́rọ́ wámịna sii kịẹ Tamuno pịrị, ori ọrẹ minini nyẹ warịbẹm, pịghị karakárányẹ ma mịẹ, ọ wámịna sii ḅụ ḅárási wa pịrịbẹm pịghị wa sịrị fiafiama wámịna irima fịrị gonyẹ́ gonyẹ́ ḅụ.

¹⁰ Ḅọ́rọ́ wa ḅẹ́, na wa siinyẹ mịẹgha, wamịnị epeletiḅọ pa Tamuno sịarị, ori ẹ́gẹ́rẹ́ ma sọ wámịna bie ofori.