Ụpwụ nya Etu 1 - IBAYỊBỤỤ NYA OHE OLUHYE

Apyobuna nya Etu

¹ Ịlẹ ri etu ịlẹ ká iSolomọn ọnyị nya iDevidi Adịrahụ nya ala Isirẹlụ da.

² Etu ịlẹ ri ọ-ka mẹ ẹla ọjẹjẹ bala irya ọnyịịla jẹ ọngịnyị bala ọ-ka da ụbwọ nyọka jẹ ọdawụlẹ nya etu ịịwa kpori-kpori.

³ Ị ka mẹjẹ ọngịnyị jaabwọ kọ ka hị lẹla ọjẹjẹ bala ọ-ka la kpẹẹkpẹẹ ju ahị ọdahile ẹ-ẹpwụ nya ẹla ọkpakpa ọhọhọ.

⁴ Ị ka họ ká ọngọ jẹ ẹla lụmẹ lẹka ka jẹ ẹla, ị ka họ ká alụjụ ka jẹ ang bala ọ-họ ẹla lirya.

⁵ Etu ịlẹ ka họ ká angị jẹ ẹla ka jẹ gụ ọọwa, ọ ka mẹ ụgbẹyị jẹ angịlirya

⁶ chajị kị ka jẹ ọdawụlẹ nya etu ọdada bala ala ịkpịta bala ogbibyi ịlẹ ká ọngọ jẹ ẹla kaa kpa ya ẹla.

Ubwọ O-gbile Alụjụ ụ-ụrụ

⁷ Ihi o-ju Amkpaa ju à ri ọmwụ ọdada nya ẹla ọjẹjẹ lẹ. Ọmẹjẹ bala ẹla ọjẹjẹ wụ aluchi ẹjẹ.

⁸ Ọnyị nyam ee, wo ẹla ọmẹjẹ nya adang, ā tị nyẹẹkpẹ da ang ọlẹ ka ịnang wẹẹ mẹjẹng ka.

⁹ À tị́ jẹ lẹ, ọmẹjẹ nyaa ka họ ká abwẹla nyang ka há jaabwọ ká okpo ọkụrụ egbeju lee ang odoomyi kaa gba ụ́hị nyang kpehe.

¹⁰ Ọnyị nyam ee, ó-ri ká alọhọbịrị-ị́ juwa pịrịng, ā myị ẹla jwaa koo.

¹¹ Ọhẹka ị ka bying yẹkẹẹ, “Kẹwẹ kahị kaka kụ ịnya gbe ọngịnyị kahị nwọọ mẹ, ị́ da ẹla da ka, ahị nwaa nya ịpyọ ọkpụhị kpụ odu me.

¹² Ị wẹẹ jẹdịyẹ kwangkwang lọkpịra-kpịra ị-ịnyịrọ, ahị tị gyaa du ọnụ nwaa kẹhị-kẹhị jaabwọ ká iworu kaa ye egu mile.

¹³ Ang-ụdụ bala ang ịkịla ịlẹ kahị ka wụwụ wuu, ahị ka kpa kaka myị ẹpwa nyahị.

¹⁴ Kẹwẹ kaka yẹjulahị mẹ, ang myị ang kahị ye, à ka la bwu ụwa ịnyịnyị.”

¹⁵ Ọnyị nyam ee, ā ba ụma nya angịnyị ịlịịwẹ jẹ koo, cheji ba hwẹ̀ẹẹ hyaa.

¹⁶ Ọọ hwaa kokooko nyọka họ ang onyobyi, ịị nwụlanọ nyọka nwụ ọngịnyị ụka wuu.

¹⁷ Á da ori chahị ju ọchịnụ ọlẹ ká tịtọ ká ka wu, ọ kaa kpa ịlọmwụ cheji ba ori ọọwa.

¹⁸ Angịnyị ịlịịwẹ juwa da ụnya gbe ịlaa, ịwa-ịwa-à tị ka ẹ-ẹpwụ nya ụnya ọọwa lẹ.

¹⁹ Ịịwẹ ọhịhị nya angị rụnyẹ ba ụdụ ọkpụkpụ bwula agbụrụ ọhọhọ à kaa la lẹ— ang ịlẹ kị la kaa kpa ọhịhị nyaa ụ-ụbwọ.

²⁰ Ẹla ọjẹjẹ lalẹẹ dakọ ụ-ụgbẹyị, ọ juwa ya ẹla gboo i-ikpọdọda,

²¹ ọ juwa chị ẹkọ wụrụ angịnyị ka ụgbẹyị-uche, bala ẹga ká angịnyị kaa tọ awụlẹ juwa byaa yẹkẹẹ:

²² “Anụ aluchi ee, anụ tị ka nụwa ẹ-ẹpwụ nya uchi nyanụ tata ka ba anyị? Anụ angị kpa ang ọjẹjẹ ju ẹpẹ, anụ tị́ ka kịnyaa tata ka ba anyị? Anụ aluchi-í ka tịtọ nya ẹla ọjẹjẹ kaka-á?

²³ Anụ wo alibyi ọlẹ kam wẹẹ ya tanụ mẹ, m̀ ka junu irya lẹla ọjẹjẹ bwu ọkịlẹtụ nyam, kam ka mẹ ang ịlẹ kam jẹ jẹẹnụ.

²⁴ M̀ wụrụụnụ kpá, anụ tị pwa ẹkọ nyam, m̀ danụ ọwụraba kpá, ọngọngọhẹ-ẹ́ tị dọnụ wẹm ka.

²⁵ Anụ nyẹẹkpẹ da ẹla ọmẹjẹ nyam, anụ pwa ọnwụrịrị nyam ọlẹ kam ya hanụ.

²⁶ Ajị nya ọọwa lẹ, m̀ ka hụlọ ẹhụ junu ẹnụ nya akama, m̀ ka kpanụ họ ụka ká uhi onyobyi-obyi ka junu.

²⁷ Uhi onyobyi-obyi ọọwa ka wẹ tuuu lala igbachịwụ, akama ọọwa ka dagaga junu lala ugbọchịrị, ọjụjụ bala uhila nya ajụjụ ka chịnụ ọgụ.

²⁸ “Ụka ọọwa, anụ ka chị eko wụrụm am ẹla ọjẹjẹ, ḿ tị ka wẹẹnụ ka, anụ ka tịtọ nyam kekeeke tụ ẹga myị ẹga da, ánụ tị ka yẹm ka.

²⁹ Ang ọjẹjẹ wụụnụ ẹjẹ, ánụ tị myị ju Amkpaa ihi ka.

³⁰ Anụ nyẹẹkpẹ da irya ịlẹ kam kaa junu, anụ pwa ụbwọ ọlẹ kam kaa gbileenu ụ-ụrụ.

³¹ Lẹẹlẹ, anụ ka hya ugbe nya ang onyobyi ọhọhọ nyanụ ri, abwẹla nyanụ ka jụụnụ ẹdụrụ.

³² À tị́ jẹ lẹ, angị jẹ ang gbuu-ka nyẹẹkpẹ da ẹla ọjẹjẹ kpa igu wẹ ịlaa, aluchi ka ta ayịreji chajị nya abwọ-agịla nya ịlaa.

³³ Ọngọlẹ kọ tị ke ụrụ lam ka la okpunyi, ọ ka hụ kem, uhi nya ang ọtịpyọ ọhẹ-lọhẹ-ẹ́ ka jwọọ ka.”