ỌWỤRỤỤ-WỤRỤ 1 - IBAYỊBỤỤ NYA OHE OLUHYE

¹ Ụpwụ ọlẹ ri chajị nya ọwụrụụ-wụrụ nya iJisọsị ịKịrayịsị ọlẹ ká Ohe Oluhye ya họọ chajị kọ ka mọọ jẹ anchẹ nyamwụ. Ang ịịwa juwa ka họ jịra lụka o-kpii lẹ. ỊKịrayịsị ya ang ịịwa du olegu-ẹrụ nya Ohe Oluhye ọhẹ ẹrụ kpa kaka mẹjẹ ịJọn ọnchẹ nyamwụ.

² ỊJọn ọọwa ayịdang a lẹẹ ri ibeenu nya ẹla nya Ohe Oluhye ọọwa bala o-ya ibeenu oriri nya ẹla nya ịlẹhị ọlẹ ká iJisọsị ịKịrayịsị ayịdang ya dodehe u-uhye nya ẹla ọọwa ịnyịnyị, jaabwọ ká ịJọn kpẹhị nya ịlọmwụ yẹ ang ịịwa wuu kaka ba lẹ.

³ Ahị ọwawa juwa ha ọng myị́ ọng ọlẹ kọ ka myị-ị juwa wa ala ịlẹ kị yẹ ọmwụ nyaa ẹ-ẹpwụ nya ụpwụ ọlẹ dodehe. Ahị ọwawa juwa ha angịlẹ wuu kị ka juwa kpa ụrụ nya ịlaa wo ala ịlẹpwụ nya ụpwụ ọlẹ wuu kị ka myị-ị juwa kpa họ ụkụrwọ ẹ-ẹpwụ nya ihi ojuju ịnyịnyị. Chajị, ụka ọlẹ ká ala ịịwa wuu ka họ jịra lẹ, ọ hi kpii lụmẹ lẹ!

Ọnụ Ọ-da Chị Ala Ịchọọchị Irwiye

⁴ Ụpwụ ọlẹ jam bwu ẹga nyam am ịJọn kele ka ẹga nya ịchọọchị irwiye ịhyẹ ịlẹ kị juwa e-epweji la datị-datị wuu ọ-ọpyị nya ala Echiya. Ká ọnahị bala okpunyi nya Ohe Oluhye ọlẹ kọ juwa hịhị lẹẹlẹẹ kọ tị juwa hịhị ene-ene, kọ tị ka juwa hịhị pyịyọọ pwụ ụka ọlịlahị ọlẹ kọ juwa warị bala okpunyi nya olegu ọ-họ ụkụrwọ achẹ irwiye nya Ohe Oluhye ọlẹ kọ juwa ị-ịlahị nya ẹchị Adịrahụ nya Ohe Oluhye, a juwa tanụ mẹ.

⁵ Ká ọnahị bala okpunyi nya iJisọsị ịKịrayịsị ọngọlẹ kọ ri ibeenu ọchịla o-hu ọkịlẹtụ ha nya Ohe Oluhye bala o-ri Ọnyị nya ọgbanyẹ-ọgbanyẹ ị-ịlahị nya Ohe Oluhye ha angị gbugbu ịlẹ wuu kị wuleji bwula igu juwa hịhị myịmyị bala o-ri adịrahụ ọgbahị nya ịdịrịhụ ilodehe ọlẹ wuu a juwa tanụ ịnyịnyị mẹ. Ahị ayịdang há iJisọsị ịKịrayịsị ọọwa lụmẹ. Ịnyị a du kọ kpa ịwọ nyamwụ hụ́ụhị wuu cheri-cheri bwu ẹpwụ nya ịhọbịrị ịhọhọ nyahị wuu lẹ.

⁶ Ọọwa lẹ, ọ huuhi ịdịrịhụ ta ịlọmwụ ị-ịpyị adịrahụ nyamwụ bala o-huuhi alegbeju ikịla iya nyamwụ ịlẹ kahị ka juwa kịla iya ha Ohe Oluhye nyamwụ bala Adamwụ lẹlẹ. IJisọsị ịKịrayịsị ọọwa, ogbo wuu bala ọngịrị wuu a ka juwa ha pyịyọọ pwụ ụka myị́ ụka lẹlẹ. Amẹn.

⁷ Anụ yẹ mẹ! IJisọsị ịKịrayịsị ọọwa tụbwọọ juwa ka warị bwu ẹpwụ nya egbamwụ lẹ. Ụka ọọwa, ugbẹhị nya alodehe wuu ka yọọ, tụ angịlẹ kị kpa ụbwọ nyaa gwọọ ụwangga ekilo ịnyịnyị. Ọọwa lẹ, alepwoja myị́ epwoja nya odehe ọlẹ wuu a ka juwa jida bala ọ-ka juwa bida nya ịlẹhị-ịlẹhị, chajị nyamwụ lẹlẹ. Ee, ịnyị, ọ ka la ịnyịlẹhị lẹlẹ. Amẹn.

⁸ Am kpakpakpa a ri Alụfa bala Ọmẹga lẹ. Am a ri ọmwụ ọdada bala ọ-chị eju nya ang wuu lẹ. Ịnyị, Ọngọlahị Ohe Oluhye Agụgụ ọlẹ kọ juwa hịhị lẹẹlẹẹ, kọ tị juwa hịhị ene-ene, kọ tị ka juwa hịhị pyịyọọ pwụ ụka ọlịlahị ọlẹ kọ juwa ka warị, kọ ri Ohe Oluhye Agụgụ ọtụka wuu, a ya lẹ.

Jaabwọ Ká ỊJọn Bwu Yẹ IJisọsị A-arụrụ

⁹ Am ayịdang a ri ịJọn ọnyadanụ ẹ-ẹpwụ nya ịKịrayịsị bala ọngọlẹ kọ juwa bá akama nya ịKịrayịsị bá yẹ tanụ lẹ. Am ri ọngọhẹ lẹpwụ nya ịdịrịhụ ịlịpyị adịrahụ nyamwụ tanụ ịnyịnyị bala o-ri ọngọ juwa la ugbodu ojuju onyudiyo nya ịKịrayịsị tanụ ịnyịnyị lẹ. I wum kpa kele kaka dụwa ọ-ọpyị ọkịlọlọ ọtụka ọhẹ ọlẹ ká enyi dokoko ju kị wụrụ ẹnyị nyamwụ ịPatimosi. Chajị nya ẹrụ ọnyịịla nya Ohe Oluhye ọ-kpa ya pyẹ bala ibeenu oriri chajị nya ẹnyị nya iJisọsị, a du kị wum kpa kele lẹ.

¹⁰ Ịnyị, la ẹnụtụrụ nya Ọngọlahị ọlẹ kọ ri ẹnụ nya ịchọọchị ọhẹ lẹ, Olegu Ịgọgọ a chị kụrụm ụ-ụwa lẹ, m juwa wo omyi ẹla ọhẹ a-arụrụ gboo ẹ-ẹkpẹ nyam lala omyi nya opyike lẹlẹ.

¹¹ Omyi ọọwa byim yẹkẹẹ, “ỊJọn, aa da ang ịlẹ wuu ká ẹhị nyang wẹẹ yẹ ju ẹpwụ nya ụpwụ ká ya du kịla ala ịchọọchị irwiye ịlẹ mẹ. Da du kịla ala ịchọọchị nya ala Ẹfẹsọsị bala ịchọọchị nya ala ịSịmaana bala ịchọọchị nya ala ịPẹẹgamọm bala ịchọọchị nya ala ịTayatịra bala ịchọọchị nya ala ịSaadisi bala ịchọọchị nya ala iFiladẹlịfịya bala ịchọọchị nya ala ịLawodisiya ịnyịnyị mẹ.”

¹² Ọọwa lẹ, am ịJọn a jahị nyam kpata da nyọka chẹhị kaka yẹ ọngọlẹ kọ juwa ya ẹla ọọwa tam lẹlẹ. Ịnyị, ụka kam jahị kpata lẹ, m chẹhị kaka yẹ ang ị-ya itinika rịrị irwiye ịhyẹ ịlẹ kị kpa okpoko ịgọm-ịgọm kem họ, godayị rịrị ụ-ụwa lẹlẹ.

¹³ Ẹ-ẹpwarịrị nya ang ị-ya itinika rịrị ịịwa, m chẹhị kaka yẹ ọlẹng ọhẹ ọlẹ kọ godayị rịrị ụ-ụwa lala Ọnyị nya ọngịnyị ehe. Ọ kụrụ awụrụ ogbileji ọtụka-ọtụka. Ọ ya ugba ọ-chị ọhị ọlẹ kị kpa okpoko ịgọm-ịgọm kem họ, chị dagaga ju ẹchẹmẹ nyamwụ ịnyịnyị.

¹⁴ Egbeju nyamwụ bala inyi olegbeju nyamwụ pwo owuru keri-keri lala owu onyoowuru bala o-pwo owuru tang-tang lala ekpawẹ ihule-hule ịlẹ ká ohe kaa do lụka nya ogo ọtụka-ọtụka ọlẹ kị wụrụ “isinoo”. Egbahị ịlẹpwụ ẹhị nyamwụ juwa wuru bee lala ẹlẹlẹ nya ila ọtụka-ọtụka.

¹⁵ Apatẹ ị-ba ọpyị nyamwụ juwa yẹ jiro-jiro lala oje ọnyọmịla ọlẹ kị hyahya ẹ-ẹpwụ nya ila nya utiyo kpá wuu, ene kịị mọọ hịla-hịla. Omyi ẹla ọlọnụ nyamwụ, juwa họ anụ lala iru okuu ọtụka-ọtụka nya enyi ịlẹpwụ nya ịba ịtụka-ịtụka ịlẹ kị juwa mwụ bwu uhye nya ọgbọdọ hireji.

¹⁶ Ọ kpa ịdịchụ irwiye ịhyẹ ụ-ụwa u-upwuriri nyamwụ. Oge oliri monyo-monyo ọhẹ ọlẹ kọ la ahị imiiye gba kpehe bwu ẹpwụ ọnụ nyamwụ. Ahị nyamwụ wuu juwa hụ́ myịrị-myịrị nya ịlẹhị-ịlẹhị lala ụka ọlẹ ká ẹnụ kaa juwa chị pẹẹ la ọngịrị nyamwụ wuu.

¹⁷ Ịnyị, ụka kam yẹ ọngọọwa lẹ, m chabwọ da keji a-ata nyamwụ lala am nyaa gbugbu kẹhị-kẹhị taa lẹlẹ. Ma, ọwa ayịdang nịra upwuriri nyamwụ kpaa kaka nịrọm lẹ, ọ byim yẹkẹẹ, “A juhi ka, ẹnwa. Am kpakpakpa a ri ọhọhẹ-ọhọhẹ bala ohyẹẹkpẹ-ẹkpẹ ọọwa lẹlẹ.

¹⁸ Am kpakpakpa a ri ọngọọwa ọlẹ kam juwa la ọhịhị ene-ene, kam gbu lẹ. Ma, tị yẹ mẹ. M wuleji bwula igu, m myịmyị jam hịhị pyịyọọ gbe oyi myị́ oyi lẹ. [Amẹn.] Am kpakpakpa a ri ọngọ kpa ẹlẹlẹ nya ịgbọgọlọ nya ọnụ ụgbẹyị nya igu ọ-nwụ ọngịnyị nwụ bala ịnya ọnụ ụgbẹyị nya ejegu ayịdang kpangga lẹlẹ.

¹⁹ ỊJọn, aa da, ang ịlẹ kị họ kpá ene-ene lẹ bala ịlẹ kị wẹẹ họ lẹẹlẹẹ bala ịlẹ wuu kị juwa ka họhọ ị-ịlahị wẹẹ, ju ẹ-ẹpwụ nya ụpwụ jịra, jaabwọ ká wẹẹ yaa wuu chị ọnụ mẹ.

²⁰ Ọlẹ a ri etu nya ang ọkpịbaa okpori-kpori chajị nya ịdịchụ irwiye ịlẹ ká yẹ u-upwuriri nyam bala ang ọ-ya ila nya otinika rịrị irwiye ịlẹ kị kpa okpoko ịgọm-ịgọm kem họ ịnyịnyị lẹlẹ. Ịdịchụ irwiye ịịwa a ri alegu-ẹrụ nya Ohe Oluhye ịlẹ kị juwa kpẹhị rịrị ịchọọchị irwiye ilepweji datị-datị ịlọpyị nya Echiya lẹ. Ang ị-ya itinika rịrị irwiye ịịwa, a tị ku ọmwakpa nya ịchọọchị irwiye ịịwa ayịdang ịnyịnyị lẹlẹ.”