ISIKẸLỤ 1 - IBAYỊBỤỤ NYA OHE OLUHYE

Ọyị Ọyẹyẹ A-arụrụ Ọhọhẹ nya ISikẹlụ ( 1:1—7:27 ) Ẹchị-adịrahụ nya Ohe Oluhye

¹ Ẹnụtụrụ ọharụ nya ọya ohene nya ẹka iwo ịta nya ụka ọhẹ, m̀ kụ ụ-ụwa ọ-ọnụ nya ihu ịKẹbaa ta ala iJuu ịlẹ kị wu nya alagba kpa ka ịBabịlọn. Uhye-ọgba wụrụ gbodoo, ọọwa m̄ yẹ ang ịlẹ bwu ẹga nya Ohe Oluhye lẹ.

² M̀ ya ang ịịwa ẹ-ẹpwụ nya ẹka ọharụ nyọlẹ kị wu Adịrahụ iJehoyachin kpa rụ nya ọlagba.

³ Ẹnụ ọọwa, kam juwa ọ-ọka nya Ihu ịKẹbaa ọ-ọpyị nya ịBabịlọn, Amkpaa ya ẹla tam am Isikẹlụ ọngọkiliya ọnyị nya iBusi. Ụka ọọwa, Amkpaa wẹ ka juwa tam lọngịrị nyamwụ.

⁴ Ụka kam hu ẹhị hwaa, m̀ yẹ ká igbachịwụ ọtụka-ọtụka ọhẹ juwa nyi bwu oye nya ẹtẹ yahị da warị. Apya juwa chị hwoó-hwoò-hwoó bwu ẹpwụ nya egbamwụ ọtụka ọlẹ kọ juwa wẹ tuu tụ ịgbachịwụ ọọwa da. Ila ọlẹ kọ juwa wuru bwu ẹpwụ nya egbamwụ juwa hụ́ myịrị-myịrị dagaga ju lala oje.

⁵ M̀ ya ang ịlọhịhị ine ịhyẹ kị me angịnyị-ehe ẹ-ẹpwarịrị nya egbamwụ ọọwa.

⁶ Ọnyọnyọọnyị nya ang ịlọhịhị ịwẹ tị ju ahị ine bala achwọ ine.

⁷ Ata nyaa rụ pyapyaapya. Ị ju achụ lala ịnya ẹna. Ịwa ayịdang hụ́ myịrị-myịrị lala oje ọnyọmịla.

⁸ Ị ju ụbwọ nya ọngịnyị-ehe ookpokpo e-ekpeleji nya ụchwọ ọnyọnyọọnyị jịra i-ine.

⁹ Achwọ nyaa wuu pyẹ maaa la iteeju nyaa gu awụlẹ. Ị juwa jẹ kịlahị-ịlahị lawụlẹ la o-ji kpata ene ka.

¹⁰ Ọnyị myị ọnyị nya ang ịlọhịhị ịwẹ ju ahị ịdatị-datị ine. Ahị nya ọngịnyị ehe kụ ka ịlahị, ahị nya ugẹbẹ kụ ka upwuriri, ahị nya ẹna kụ ụpụpịla, ahị nya ọchịnụ idu kụ ka ẹkpẹ.

¹¹ Achwọ imiiye nya ọnyọnyọọnyị nyaa pyẹ maaa kaka gu achwọ nya ịkịla ịlịkịka imimiiye nyaa. Ị wa achwọ imiiye ịkịla ju ba ịlaa ị-ịnyịrọ.

¹² Ị kaa jẹ ka ịkịla ọnyị myị ọnyị ká olegu kpaa jẹ yahị da ka la o-ji ịlaa kpata abwọhẹ ene ka chajị ọnyọnyọọnyị nyaa ju ahị ịkịka ine.

¹³ Ịngịhyẹ juwa ẹ-ẹpwarịrị nya ang ịlọhịhị ine ịwẹ kọ lala ịtọọchị ọlẹ kọ juwa hụ́ myịrị-myịrị, juwa jẹ kele-warị. Ila nya ịtọọchị ọọwa chị ahị ịraapya chị, ọ juwa chị apya kpowu-kpowu chị ịnyịnyị.

¹⁴ Ang ịlọhịhị ine ịwẹ juwa chị chụrwa kele-warị lagaga ọtụka-ọtụka lala apya-à chị.

¹⁵ Ụka ọlẹ kam kwẹhị yẹ angị ịhihi ine ịwẹ, am yẹ ang lala ata nya oje ine kị juwa ịkịka nya ihihi ọnyọnyọọnyị.

¹⁶ Jaabwọ ọlẹ ka angị ị mata nya ije iwa la bala ang ịlẹ kị kpa haa ri, ịwa inine wuu la ụmụma, ịwa wuu hu myịmyị myịrị lala ẹjwọ ọkpịnya. Ụ-ụwa ẹpwụ nya ọnyị myị ọnyị nyaa, ịmyịmyị hang ịkịla juwa ẹpwẹpwụ nyaa lala ata nyoje.

¹⁷ Ụka ọlẹ kaangị hihi ịwẹ a jẹdịyẹ, ang ị mata nyije nyaa ịwẹ kaa ji daka ụpa ookpokpo wuu lawụlẹ, ang ị mata nyije ịwẹ a ka pyi da ka ẹga ịkịla datị ka.

¹⁸ Ugbọọnụ nya angị mata nyije ịwẹ wuu luhye ịmyịmyị wejiri, ịwa wuu ju egbahị dagaga ju.

¹⁹ Ụka ọlẹ kaangị lahị-lahị ịwẹ a jẹdịyẹ, ata nyang ịwẹ ka jẹdịyẹ ịnyịnyị ma ụka ọlẹ kị hu hwaa bwịpyị ata nyang ịwẹ ka hu hwaa ịnyịnyị.

²⁰ Ẹga myị ẹga ọlẹ ka olegu á ka, ang ịhịhị ịwẹ kaa kele ịnyịnyị ata nyang ịrụnyẹ ịwẹ ka hu hwaa ịnyịnyị dịraa chajị ọlegu nyang ịlahị-lahị ịwẹ juwa ẹ-ẹpwụ nya ata nyang ịrụnyẹ ịwa.

²¹ Ụka myịụka ọlẹ kaangị hihi ịwẹ a jẹdịyẹ lee ị godayị lee ị hụ ka uhye-ọgba ata nyang ịrụnyẹ ịwẹ kaa họọ ịnyịnyị chajị olegu nyang ihihi ịwẹ juwa ẹpwụ nyaa.

²² Angịlẹ kị juwa uhye nya egbeju nya ang ịhihi ịwẹ me uhye-ọgba nya ịnaawụ ọkịlele. Ị juwa hu myịrị myịrị lala ajwọ ịkpịnya.

²³ Ị pyachwọ nyaa maa ụwa ekpeleji nyọlẹ kọ kụraa egbeju wẹẹ. Ị nịra achwọ nyaa ịhye kpaa kaa gwawụlẹ ị ya achwọ ihihi imiiye nyaa ke ịnyịrọ nyaa.

²⁴ Ụka ọlẹ kị juwa hụ, am kaa wo iru nya achwọ nyaa lala iru nya ukpenyi bala jaabwọ ọlẹ ka Ohe Agụgụ kaa kpu ịkpala bala iru nya ịsọja ịtang ayịreji ụka ọlẹ kị kpụba ị mwachwọ nyaa wuu bịlaa.

²⁵ Ọọwa lẹ, omyi ọhẹ a warị bwu uhye nyang oluhye nya egbeju nyaa ọwẹ lẹ ịwa wuu a godayị keem lẹ, ị mwachwọ nyaa bịlaa lẹlẹ.

²⁶ Ịngịhyẹ juwa uhye-ọgba nya egbeju nyaa kọ me ẹchị-adịrahụ ọlẹ kị kpa ẹjwọ nya ịsafaya họ. Ang ọlẹ kọ hụhụ ẹ-ẹchị ọọwa me ọngịnyị ehe.

²⁷ Am yẹ nyori ọka uhye-ọgba nya ẹgẹlẹ kọ me ọhii nyamwụ ọ me angọlojoje ọlẹ kọ juwa hụ myịra myịra. Ịngịhyẹ lala ịla dagaga jwoo. Ogbo ọlẹ kọ dagaga juwa wuu lẹ ọlụmẹ.

²⁸ Abwụma nya ogbo ọlẹ kọ dagaga jwoo lala ọwọ ọlẹ kọ kaa chị ẹnụ ọlẹ ka Ohe a denyi. Ọwẹ a ri ehe ọchị chị nya ogbo nya Ọngọlahị lẹlẹ. Ụka ọlẹ kam chẹhị kaa yọọ, am ya ahị kụreji ọọwa lẹ am wo omyi nya ọngọhẹ kọ juwa ya ẹla lẹlẹ.