ỊMATIYU 1 - IBAYỊBỤỤ NYA OHE OLUHYE

Ego Ogbegbe nya Adịda Igogo nya IJisọsị

¹ Ọlẹ ri ego nya ọmama nya iJisọsị ịKịrayịsị. IJisọsị bwu imwawụ nya iDevidi ọnyị nya Ebiraham.

² Ebiraham ma Ayịsiki. Ayịsiki ma iJekọbụ. IJekọbụ ma iJuda bala anyị alẹng ịkịla.

³ IJuda ma ịPẹrẹsị bala iSera. Ẹnyị nya ịnaa ri ịTamaa. ỊPẹrẹsị ma iHesirọn. IHesirọn ma Aram.

⁴ Aram ma Aminadabụ. Aminadabụ ma ịNasọn. ỊNasọn ma ịSalịmọn.

⁵ ỊSalịmọn ma iBowasị. Ịnịna nya iBowasị ri iRehabụ. IBowasị ma Obẹdị ọlẹ ká ịnamwụ ri iRutu. Obẹdị ma iJesi.

⁶ IJesi ma Adịrahụ iDevidi. IDevidi ma iSolomọn. Ịnịna nya iSolomọn a ri ahụ nya Uriya ọlẹ ká iDevidi nu ye lẹ.

⁷ ISolomọn ma iRehobowam. IRehobowam ma Abija. Abija ma Asa.

⁸ Asa ma iJehosafatị. IJehosafatị ma iJoram. IJoram ma Usiya.

⁹ Usiya ma iJotam. IJotam ma Ehasị. Ehasị ma iHesekaya.

¹⁰ IHesekaya ma ịManasẹ. ỊManasẹ ma Emọsị. Emọsị ma iJosaya.

¹¹ IJosaya ma iJekonaya. IJosaya myịmyị ma anyị alẹng ịkịla ịnyịnyị, lụka ọlẹ kị wu ala Isirẹlụ kpa rụ bwu ẹwụ kele ka ọpyị nya ịBabilọn.

¹² Ụka kị wu ala Isirẹlụ kpa rụ ka ịBabilọn kpá, iJekonaya ma iSiyalitẹlụ. ISiyalitẹlụ ma iSerubabẹlụ.

¹³ ISerubabẹlụ ma Abiyudu. Abiyudu ma Eliyakim. Eliyakim ma Asọọ.

¹⁴ Asọọ ma ịSadọkọ. ỊSadọkọ ma Achim. Achim ma Eliyudu.

¹⁵ Eliyudu ma Eliyesa. Eliyesaa ma ịMatan. ỊMatan ma iJekọbụ.

¹⁶ IJekọbụ ma iJosẹfụ. IJosẹfụ ọọwa a ye iMeri ọlẹ kọ ri ịnịna nya iJisọsị ọlẹ kị wụrụ ịKịrayịsị lẹ. Etu nya ịKịrayịsị ri ọngọlẹ ká Ohe Oluhye chụ, ya ida nyamwụ wụ.

¹⁷ Adịda igogo nya iJisọsị bwu ụka nya Ebiraham gbee pwụ ụka nya iDevidi la adịda igogo angị iwo kụrụ ine. Adịda igogo nya iJisọsị bwu ụka nya iDevidi gbee pwụ ụka ọlẹ kị wu ala Isirẹlụ kpa rụ bwu ẹwụ kele ka ịBabilọn la adịda igogo angị iwo kụrụ ine ịnyịnyị. Adịda igogo nya iJisọsị bwu ụka nya ẹwụ nya ala ịBabilọn ọọwa gbee pwụ ụka nya ọmama nya ịKịrayịsị ayịdang myịmyị la adịda igogo iwo kụrụ ine.

Ego nya Ọmama nya IJisọsị ỊKịrayịsị

¹⁸ Ịịlẹ, ọmama nya iJisọsị ịKịrayịsị a la lẹ: Ụka ọọwa, iJosẹfụ juwa ya ẹla nyọka ye iMeri ye. Ma, ene kị ka tụ iMeri da wẹ ẹpwa nya iJosẹfụ kpá lẹ, iMeri juwa la ẹnyị bwula ọngịrị nya Olegu Ịgọgọ lẹ.

¹⁹ IJosẹfụ ri ọngọ họ ang ọnyịịla lẹ, ọ chị eje nyọka da awụlẹ oyeye nyamwụ bala iMeri yi ịbaa-ịbaa, chajị kọ ka chị oyoyi ju iMeri u-ugbọdọda ka.

²⁰ Ụka ká iJosẹfụ juwa kpa irya nya ẹla ọọwa me ẹ-ẹpwụ nyamwụ wẹẹ lẹ, olegu-ẹrụ nya Ọngọlahị ọhẹ a kele ka ẹga nya iJosẹfụ ẹ-ẹpwụ nya ụlaa kaka byọọ yẹkẹẹ, “IJosẹfụ, ọnyị nya iDevidi ee, wo mẹ. A ju uhi chajị nyọka ye iMeri ye nya ahụ nyang o-oluhye nya ẹnyị ọwẹ kọ kpa wẹ ka. Chajị, ẹnyị ọjẹjẹ nya iMeri ahụ nyang ọwẹ bwula ọngịrị nya Olegu Ịgọgọ.

²¹ Ọnyị ọlẹng, iMeri a ka ma lẹ. A ka wụrụ ẹnyị nyamwụ iJisọsị Chajị, ọwa ka chị angịnyị nyamwụ da bwu ẹpwụ nya ịhọbịrị ịhọhọ nyaa wuu lẹlẹ.”

²² Ẹlẹwẹ ri ọ-họ jịra nya ẹla ọlẹ ká Ọngọlahị ya bwu ọnụ nya ọlọmwụ nyamwụ onyogo yẹkẹẹ,

²³ “Anụ wo mẹ, ọnyị onjwo ịyang ọlẹ kọ jẹ́ ọlẹng ẹnẹnẹhẹ lẹka, ka jẹnyị. Ọ ka ma ọnyị ọlẹng. Ị ka wụrụ ẹnyị nya ọnyị ọọwa, Ịmanẹlụ, ọlẹ ká etu nya Ịmanẹlụ ri Ohe Oluhye jam ẹ-ẹpwarịrị nyahị.”

²⁴ Ụka ká iJosẹfụ chị ahi-une, ọ họ jaabwọ ká olegu-ẹrụ nya Ọngọlahị byọọ ụ-ụlaa. Ịnyị, iJosẹfụ a ye iMeri nya ahụ nyamwụ ịnyịlẹhị lẹlẹ.

²⁵ Ma, iJosẹfụ á tị nọ ta iMeri ahụ nyamwụ ka, gbee kọ ya ẹnyị nya ọgbanyẹ nyamwụ ọọwa ma ọnyị ọlẹng. Ọọwa lẹ, iJosẹfụ a wụrụ ẹnyị nya ọnyị ọọwa, iJisọsị lẹlẹ.