Biblia Todo Logo
Bìoball air-loidhne

- Sanasan -

ỊMALAKAYỊ 1 - IBAYỊBỤỤ NYA OHE OLUHYE

1 Ọlẹ ri ẹrụ ọnyẹẹnyẹẹ ọlẹ ká Amkpaa du ịMalakayị tọ ala Isirẹlụ angịnyị nyamwụ.


Ọháha Ọlala nya Amkpaa Ẹ-ẹga nya Ala Isirẹlụ

2 Amkpaa byinu anụ angịnyị nyamwụ yẹkẹẹ, “Anụ hám ụka wuu.” Anụ tị tọọ wo yẹkẹẹ, “Ụgbẹyị ọlẹ ká mẹjẹ ya ahị háng ịnyịlẹhị a tị́ lee?” Amkpaa jam wẹẹnụ yẹkẹẹ, “Aanyịnịna i-bwu igbeene ookpokpo iJekọbụ bala Ịsọ a ri ka-á? Tị yẹ mẹ, m̀ chụ iJekọbụ bala anyị ịtụma nyamwụ nyọka ri angịnyị nyam.

3 M̀ tị nyẹẹkpẹ da Ịsọ bala anyị ịtụma nyamwụ. M̀ yẹ ikiti ọlẹ kị nọ ẹpwa la egwawụ-egwawụ. M̀ pẹhi ọpyị nyamwụ wuu da nya ẹga ọ-ga ri nya iyo ịlẹpwamẹ ịnyịnyị lẹ.”

4 Ó-riri ká ala Ẹdọm, anyị ịtụma nya Ịsọ-ọ́ me irya yẹkẹẹ, “Ịnọ, ị ta epweji nyahị ayịreji. Ahị tị ka wulọọ eji myịmyị lẹ,” aalẹ, Amkpaa Agụgụ tịtị yẹkẹẹ, “Ị̄ ma epweji nyaa nwụ́ kpa abwọ nwụ mẹ. M tị ka tụrwaa beji kpalị-kpalị myịmyị. Alụma ịkịla ka wụrwaa alọpyị onyobyi. Ị ka yaa lala alụma ọlẹ ká Amkpaa ka wụ ẹjẹ ta gbe oyi myị oyi.”

5 Anụ ala Isirẹlụ ka kpẹhị nya ịlọnụ yẹ ẹlẹwẹ. Ọọwa, anụ ka yẹkẹẹ, “Ụmụmẹ nya ọngịrị nya Amkpaa á ba ám Isirẹlụ kem ka. Ọ jẹ kpoye nya ọpyị nya Isirẹlụ.”


Amkpaa Ya Alibyi la Angịkịla iya bala Alụma

6 Amkpaa Agụgụ yẹkẹẹ, “Ọnyị kaa ju adamwụ ihi. Ọnchẹ tị kaa ya ihi ba ayịbamwụ ịnyịnyị. Ee lẹ, am a tị ri adanụ lẹ. Ihi ọlẹ kanụ ya jum a tị́ lee mẹ? Am a ri ayịbanụ lẹ. Ihi ọlẹ kanụ ya bam a tị́ lee mẹ? Anụ angịkịla iya kpakpakpa a wẹẹ hu ẹpẹpẹ jum lẹ. Anụ tị mwọọgịlẹ juwa tọ wo yẹkẹẹ, ‘Anyị ahị tị́ ya ẹpẹpẹ jung kpong-kpong?’

7 Anụ wẹẹ ya ẹpẹpẹ jum bwula ọ-kpa iyo ịlẹ ká ehe họ kaka kịla iya ogidi nyam. Anụ tị jahị kpata juwa tọ wo yẹkẹẹ, ‘Ányị ahị tị́ kpa ihi ju ịgọgọ ọlala nyang ka-a?’ Anụ wo mẹ! Anụ pẹhi ihi ọọwa deeji bwula ọlẹ kanụ wẹẹ ya ogidi nyam nyị́ chịla ọ-kpa ihi ju ka.

8 Anụ kaa kpa iyo ilidu kaka kịla iya ham! Ọ pwoku-u? Anụ kaa kpa iyo ị-chị okuku bala ịlẹ kị jụ ẹdụrụ kaka kịla iya ham! Ọ pwoku-u? Anụ kpa ụma nya iyo ọlịnyị ọhẹ kaka ga ha adịrahụ nyanụ yẹ wẹẹ. Ọ ka myọọ lẹhị-ị? Ọ ka mị-ị họ ang ọlẹ kanụ bịlọọ hanụ-ụ?”

9 Anụ angịkịla iya, anụ bịlẹ Ohe Oluhye kọ yẹhị ahyẹẹrwẹrwa wẹ mẹ-ẹ. Ọ́ ka mị-ị wẹ abwọ ọrịrị nyanụ ka. Abyị nya ọọwa tị ri ịnyanụ.

10 Amkpaa Agụgụ yẹkẹẹ, “Ọ dọmwụ ka hám ó-ri ká ọngọhẹ nyanụ á ka tụ ịnang i-bwu ka Ube Ịgọgọ nyam ku. Ịnọ, ọọwa ka họ ká ọngọngọhẹ nyanụ anụ angịkịla iya ka jẹ-ẹ jụ kele ka tụ ila o-ju apyobwuna-ka ju u-uhye nya ogidi nyam kaka.

11 Bwu ọbaba nya odehe ọhẹ lalaala ka ju ka ọkịla, angịnyị kaa jum ihi. Ị kaa kịla iyanya ịtangare bala iya ipwoku ịkịla ham. Alụma myị ụma wuu kaa jum ihi.

12 Anụ angịkịla iya tị lẹ, anụ jum ẹpẹ, chajị anụ ya ogidi nyam nyị́ kpụ ịngịngịhyẹ kaka. Ang ị-kpụ ịngịngịhyẹ-ka anụ kaa ya kịla iya ham lẹ.

13 Anụ juwa kpa ya yẹkẹẹ, ‘Iya ịkịlaakịla ịlẹ chị aga lẹ pyii!’ Ọọwa, anụ juwa hum tẹbẹlẹ lẹlẹ. Iyo ịlẹ kanụ wu yoyi lee ịlẹ kị chị okuku lee ọ-jụ ẹdụrụ anụ kaa kpa ka kịla iya ham lẹ. Anụ me irya kám ka myị-ị ye ụma nya ang ikịla iya ịlịnyị-ị?

14 Inyiribyi ka ri nya ọngọlẹ kọ myị ọnụ nya iyo ọlahịchịng opwoku ọlẹ kọ la ẹ-ẹpwa nyamwụ ham, kọ tị mwọọgịlẹ kaka hu iyo ọlẹ ká ehe họ kpa ka kịla iya ham. Adịrahụ ọtụka am Amkpaa Agụgụ a ri lẹ. Alụma myị ụma nya odehe ọlẹ wuu ju uhi nyam.”

Igede Bible © The Bible Society of Nigeria, 2019.

Bible Society of Nigeria
Lean sinn:



Sanasan