ỊMAKỊ 1 - IBAYỊBỤỤ NYA OHE OLUHYE

Ẹla Ohe Oyaya nya ịJọn Ọngọ Hụ Enyi Ohe

¹ Ọlẹ a ri ọmwụ ọdada nya ẹrụ ọnyịịla nya iJisọsị ịKịrayịsị Ọnyẹwẹ nya Ohe Oluhye lẹ.

² Ẹrụ ọnyịịla ọọwa dọmwụ jaabwọ ká Ohe Oluhye kpa Ayịsaya ọlọmwụ da ẹ-ẹpwụ nya ụpwụ nyamwụ ene yẹkẹẹ, “Yẹ mẹ! Am Ohe Oluhye ayịdang juwa ka du ọlẹrụ nyam ọhẹ ẹrụ ji ịlahị nyang kaka nwụla iwe-ahụrụ nọ gbeng lẹ.

³ Omyi nya ọngọhẹ lalẹẹ da ọna gboo u-ugbileji yẹkẹẹ, ‘Anụ nwụ ọhịhị nyanụ rịrị kọ pwoku ụgbẹyị nya ọhịhị nya Ọngọlahị mẹ. Kanụ juwa la ọhịhị ọlẹ kọ la kpụrụrụ ị-ịlahị nya Ọngọlahị ọlẹ kọ wẹẹ warị, jaabwọ kị kaa nwụla ụgbẹyị ọchịpwụrụ bwu nya adịrahụ ọtụka-ọtụka nọ gboo mẹ.’ ”

⁴ Ịnyị, ụka ká ụka ọọwa họ jịra lẹ, ịJọn ọngọ hụ enyi Ohe a chị ịlọmwụ ehe u-ugbileji juwa hụ angịnyị enyi Ohe bala o-juwa ya ẹla nya Ohe Oluhye ju angịnyị kị ka yẹ irya da bwu ẹpwụ nya ịhọbịrị ịhọhọ nyaa, chajị ká Ohe Oluhye ka hịnyọhi ịhọbịrị nyaa ịịwa wuu haa, chajị ká ịJọn ka hwaa enyi Ohe ụ-ụwa lẹlẹ.

⁵ Ụka ọọwa, iru nya angịnyị lụmẹ-lụmẹ juwa kele ka ẹga nya ịJọn bwu ọpyị nya iJudiya wuu bala epweji nya iJerusalẹm kaka wo ẹla Ohe nya ịJọn ọọwa. Angịịwa wuu juwa ya ịhọbịrị ịlẹ kị họ dodehe je ịJọn ụ-ụwa. Ọọwa lẹ, ịJọn a juwa hwaa enyi Ohe ẹ-ẹpwụ nya Ihu ịJọdan la ẹnyị nya Ohe Oluhye lẹlẹ.

⁶ ỊJọn ọngọ hụ enyi Ohe kụrụ ịwụrụ ịlẹ kị kpa egbii nya ụnyịrẹ-ịkamẹlụ họ. Ugba nya iyo kem, ị kpa họ ugba ọ-chị ọhị nya ịJọn ọwẹ lẹ. Ang oriri nyamwụ ri ịyịrị ịlẹpwamẹ bala inwa ọnẹnẹ.

⁷ Ụka ká ịJọn juwa ya ẹla nya Ohe Oluhye dodehe lẹ, ọ byi angịnyị ịịwa yẹkẹẹ, “Anụ wo mẹ! Ọngọhẹ juwa ka warị ọlẹ kọ ri ọngọ ọtụka gụm lụmẹ-lụmẹ. Am ayịdang á dọmwụ chịla ị-ịlahị nyamwụ kpụ, m ka hiri kpẹẹ juwa yi ori nya ugbẹtẹ nyamwụ myị́ kpong-kpong ka.

⁸ Am lẹ, enyi ọlam-ọlam, m lẹẹ kpa hụnụ enyi Ohe lẹ. Ma, Olegu Ịgọgọ, ọngọọwa ayịdang a tị ka kpa hụnụ enyi Ohe lẹlẹ.”

Enyi Ohe Ọhụhụ Bala Ọmayẹ nya IJisọsị

⁹ Ụka kọ nọ chẹẹ lẹ, iJisọsị a kele ka ẹga nya ịJọn bwu ịNasareti nya ịGalili lẹ, ịJọn a hwọọ enyi Ohe ụ-ụwa Ihu ịJọdan lẹlẹ.

¹⁰ Ahyaahị ká iJisọsị gba kpehe bwu ẹpwụ nya enyi ọọwa bwaaa lẹ, ọ chẹhị kaka yẹ ká epwoohe wụrụ hwoo lẹ, ọ yẹ Olegu Ịgọgọ juwa hireji bwu uhye la abwụma nya enewulo kaka kwọọ u-uhye lẹlẹ.

¹¹ Ọọwa lẹ, omyi ọhẹ a juwa ya ẹla bwu epwoohe dodehe yẹkẹẹ, “Ahụ ayịdang ri Ọnyẹwẹ nyam ọlẹ ká ẹla nyang hám lụmẹ. Ang myị́ ang nya ọhịhị nyang wuu kpụm ịpyọ lụmẹ.”

¹² Ịnyị, Olegu Ịgọgọ a kpa iJisọsị rụ kele ka ugbileji ahyaahị lẹlẹ.

¹³ IJisọsị hụ u-ugbileji ọọwa lala ụtụrụ ohu-iye gbẹgbịlẹ. Ọọwa lẹ, Ohe Onyobyi a juwa mọọ yẹ ụ-ụwa lẹlẹ. IJisọsị juwa ẹ-ẹpwarịrị nya iyo ịnyẹẹgẹga ịlẹpwamẹ, ma, alegu-ẹrụ nya Ohe Oluhye ịhyẹ bọọ kele kaka myị ẹrụ họọ ụ-ụwa.

IJisọsị Be Ẹkọ Wụrụ Angị Da Urwe Enyi Angị Ine

¹⁴ Ụka kị wu ịJọn ọngọ hụ enyi Ohe ju agba kpá, iJisọsị kele ka ịGalili, juwa ya ẹrụ ọnyịịla nya Ohe Oluhye pyẹ ụ-ụwa je angịnyị.

¹⁵ Ọ byaa yẹkẹẹ, “Ụka họ jịra lẹ! Ụka nya ịpyị nya Adịrahụ nya Ohe Oluhye ju chwẹẹ lẹ. Chajị nya ọọwa lẹ, anụ yẹ irya da kanụ kpa ọkịlẹtụ nyanụ wuu myị la ẹrụ ọnyịịla nya Ohe Oluhye mẹ!”

¹⁶ Ụka ká iJisọsị juwa jẹ tụ ọnụụka nya ihu ọkịlọlọ nya ịGalili da ịnyịnyịịnyị lẹ, ọ chẹhị kaka yẹ anyịnịna alẹng angị imiiye ịhyẹ ịlẹ kị wụrụ ịSayịmọn bala Andụrụ. I juwa kpa ụgbọwụ nyaa da urwe enyi ẹ-ẹpwụ nya Ihu ọtụka ọọwa, chajị, ị ri alurwe enyi.

¹⁷ IJisọsị byaa yẹkẹẹ, “Anụ kẹwẹ kaka bam jẹ mẹ. Am ka họ kanụ ka ri angị da urwe nya angịnyị ogogo kpa wam lẹ.”

¹⁸ Ọọwa lẹ, ahyaahị ká ịSayịmọn bala Andụrụ wo ẹkọ obebe nya iJisọsị ọọwa lẹ, ị tụụbwọ hi ụgbọwụ nyaa ịịwa lẹ, ị ba iJisọsị jẹ ịnyịlẹhị lẹlẹ.

¹⁹ Ụka ká iJisọsị myịmyị jẹ kịlahị chẹẹ, ọ chẹhị kaka yẹ alurwe enyi alẹng imiiye ịkịla ịhyẹ ịlẹ kị ri anyịnịna ịnyịnyị. Ẹnyị nyaa ri iJemsi bala ịJọn, anyị nya iSebidi. I juwa kpa ụgbọwụ nyaa nwụla ẹ-ẹpwụ nya ụmwụ nya enyi ụka ọọwa.

²⁰ Ọọwa lẹ, iJisọsị a be ẹkọ wụrwaa ahyaahị ba ịlọmwụ lẹlẹ. IJemsi bala ịJọn tụụbwọ hi iSebidi adaa ẹ-ẹpwụ nya ụmwụ nya enyi ọọwa bala alurwe enyi ịkịla ịlẹ kịịwa ayịdang diroo-diro ụ-ụwa. Ọọwa lẹ, ị rụ ba iJisọsị jẹ ịnyịlẹhị lẹlẹ.

IJisọsị Ku Olegu Onyobyi Dodehe Hi Ọngọhẹ

²¹ Ụka ọọwa, iJisọsị bala angịnyị nyamwụ kele ka epweji nya ịKapẹnawụm. Ụka ká Ẹnụtụrụ Ọhịnyọ Lụkụrwọ nya ala iJuu warị, iJisọsị kele ka ube ọ-mẹ ẹla nya Ohe Oluhye jẹ nya ala iJuu, juwa mẹ ang jẹ angịnyị ụ-ụwa.

²² Ụka ọọwa, ejiri nya ang ọmẹjẹ nyamwụ ọọwa wu iru nya angịnyị ịlẹ kị juwa ẹ-ẹga ọọwa lẹ, ọ laa ahịbwuu lụmẹ kaka kpoye. Chajị ang ọmẹjẹ nya iJisọsị ayịdang datị hi ịnya ịtịcha ị-mẹ ehile nya iMosisi jẹ ọlẹ kị kaa mẹjẹ. Chajị ọngịrị nya Ohe Oluhye ayịdang, iJisọsị a juwa kpa mẹ ang jẹ lẹ.

²³ Ahyaahị ahyaahị, ọlẹng ọhẹ ọlẹ ká olegu onyobyi juwa wu, kele ka ube ọ-mẹ ẹla nya Ohe Oluhye jẹ nya ala iJuu ọwẹ, juwa chị eko la omyi o-gboo yẹkẹẹ,

²⁴ “Ahyu! Ẹla ịyẹ, a tị́ kpa wẹ ẹga nyahị? Ahụ iJisọsị ọla ịNasareti! Lee, a tị́ juwa tịtọ ká ka tahị ayịreji alẹ lẹ? Am jẹ́ ụma nya ọngọlẹ kaahụ ayịdang ri! Ahụ kpakpakpa a ri Ọnyị ọlịgọgọ nya Ohe Oluhye ọọwa lẹ.”

²⁵ Ụka ọọwa, iJisọsị ya ẹla la ịkata-ịkata ta olegu onyobyi ọọwa yẹkẹẹ, “Ahụ olegu onyobyi ọwẹ, tụ ọnụ nyang pịrị kem, ká gba kpehe bwu ẹpwụ nya ọlẹng ọwẹ lẹẹlẹẹ!”

²⁶ Ịnyị, ụka ká olegu onyobyi ọọwa nịra ọlẹng ọwẹ kpakpakpa nya ịlẹhị-ịlẹhị lẹ, olegu onyobyi ọọwa a chị eko la omyi o-gboo lẹ, ọ gba kpehe bwu ẹpwụ nya ọlẹng ọọwa lẹlẹ.

²⁷ Ụka ká iru nya angịnyị ịlụwa wuu yẹ ụkụrwọ ẹbyẹbyị ọwẹ, ọ laa ịwa wuu ahịbwuu lụmẹ kaka kpoye. I juwa ya ẹla ta awụlẹ yẹkẹẹ, “Ahyu! Ẹla ọlanyị a tị́ lẹẹ ịịlẹ mẹ? Ang ọmẹjẹ onyeewe ịnyị? Anụ yẹ jaabwọ kọọwa ayịdang jẹ́ wẹẹ kpa ọngịrị nya Ohe Oluhye ku alegu inyibyi dodehe ká alegu inyibyi ịịwa jẹ́ wẹẹ ju ihi nyamwụ ịnyịlẹhị alẹ wẹẹ!”

²⁸ Ọọwa lẹ, angịnyị a juwa kpa ụkụrwọ ẹbyẹbyị nya iJisọsị ọwẹ ru ohi ahyaahị tụ ọpyị oloye nya ịGalili wuu da lẹlẹ.

IJisọsị Họ Iru nya Alẹdụrụ Uda

²⁹ Ụka ká iJisọsị bala ịSayịmọn anyị gba kpehe bwu ube ọ-mẹ ẹla nya Ohe Oluhye jẹ nya ala iJuu ọọwa, ị rụ kele ka ẹpwa nya ịSayịmọn bala Andụrụ. Ọọwa lẹ, iJemsi bala ịJọn a baa kele ịnyịnyị lẹlẹ.

³⁰ Ụ-ụwa, ịnịnọ ẹpwa nya iPita nụwa la ẹdụrụ nya ila ọchịchị nya ịlẹhị-ịlẹhị. Ahyaahị ká iJisọsị jẹ pwụ ụwa, ị ya joo chajị nya ẹdụrụ nya ịnịnọ ẹpwa nya iPita ọọwa.

³¹ Ọọwa lẹ, iJisọsị a kele kaka yụbwọ chị ọnyang ọlẹdụrụ ọwẹ lẹ, ọ wulọọ eji lẹ, ẹdụrụ nyamwụ a myị́ iijata-ijata lẹ, ọ juwa myị ẹrụ haa ụ-ụwa lẹlẹ.

³² Ụka ká obyi hi ẹnụ ọọwa ká ẹnụ juwa ka byi, ị kpa iru nya alẹdụrụ la datị-datị bala angịlẹ ká alegu inyibyi wu kele ka ẹga nya iJisọsị.

³³ Ụka ọọwa, alepweji ọọwa wuu, tụ ịlaa kele kaka jịra ị-ịlahị nya ọdọdẹpwa ọlẹ ká iJisọsị anyị ji.

³⁴ Ọọwa lẹ, iJisọsị a haa uda nya ẹdụrụ nyaa ịwẹ wuu la datị-datị bala oku alegu inyibyi ịlẹpwụ nya angịnyị kpehe ịnyịnyị wuu lẹlẹ. IJisọsị á myị ya ẹga da ha alegu inyibyi ịịwa kpụ, ị yoo dodehe kpong-kpong ene kọọ kwaa kpehe kaka. Chajị ịnọ, alegu inyibyi ịịwa ayịdang jẹ́ ụma nya ọngọlẹ ká iJisọsị ri.

IJisọsị Ya Ẹla nya Ohe Oluhye Ị-ịGalili

³⁵ Lụka nya odu nya ewu-ụtụrụ ene ká ahị pyẹ, iJisọsị wuleji gba kpehe hi epweji ọọwa kele ka ugbileji ochinyee ọlẹ ká ọngọngọhẹ á ji kaka, juwa raabwọ ha Ohe Oluhye.

³⁶ Ọọwa lẹ, ịSayịmọn bala angịkịla nyamwụ a rụ kele ka ụwa juwa pịlahị nya iJisọsị ịnyịnyịịnyị lẹlẹ.

³⁷ Ụka kị yẹ iJisọsị lẹ, ị byoo yẹkẹẹ, “Ayịbahị, ọng myị́ ọng wuu jam tịtọ nyang lẹ!”

³⁸ Ma, iJisọsị wẹ byaa yẹkẹẹ, “Ọ chịla kahị ka rụ kele ka epweji ịkịla ịlẹ kị dagaga ju wuu pyii, chajị kam ka ya ẹla nya Ohe Oluhye ju alepweji ịwẹ wuu kpịlọ ịnyịnyị. Chajị ang odudu kam warị wẹ odehe ọlẹ ri kam ka kpa ẹrụ ọnyịịla ọlẹ kaka ya pyẹ, ịnyịnyịịnyị.”

³⁹ Ịnyị lẹ, iJisọsị a juwa jẹ, juwa ya ẹla nya Ohe Oluhye e-ebe ị-mẹ ẹla nya Ohe Oluhye jẹ nya ala iJuu bala o-juwa ku alegu inyibyi dodehe ịnyịnyịịnyị tụ ẹga myị́ ẹga nya ịGalili wuu da lẹlẹ.

IJisọsị Họ Olekpo Ọhẹ Uda

⁴⁰ Ụka ọọwa, ọlẹng olekpo ọhẹ kele kaka ya arụụ kụ eji i-ijata nya iJisọsị, juwa bịlẹ byoo yẹkẹẹ, “Ayịbahị, ó-ri ká ka myị, ịnọ, m jẹ́ ká la ọngịrị ka họm uda nya ekpo nyam ọlẹ myị́.”

⁴¹ Ụka ọọwa, olegu nya ahyẹẹrwẹrwa myị ẹpwụ nya iJisọsị jahị da olekpo ọọwa. Ọọwa lẹ, iJisọsị a kele kaka yụbwọ nyamwụ gu olekpo ọọwa lẹ, ọ byoo yẹkẹẹ, “M myị nya ịlẹhị lẹ. La gogo, alẹ mẹ!”

⁴² Ọọwa lẹ, ekpo nya ọlẹng ọwẹ a myị́ hyọọ cheri-cheri iijata-ijata lẹlẹ.

⁴³ Ụka ká iJisọsị gbile olekpo ọwẹ kọ họ uda wẹ, ụbwọ ụ-ụrụ la ọngịrị-ọngịrị kpá lẹ, ọ tụụbwọ hyoo rụ ka ẹpwa lẹlẹ.

⁴⁴ IJisọsị byi ọngọwẹ yẹkẹẹ, “Rụ mẹ, ẹnwa. A tịrọnụ nya ẹla nya uda ọhọhọ nyang ọwẹ ya je ọngọngọhẹ koo. Ma, kpa ịlọng rụ kpụrụrụ kele ka ẹga nya ọngọkiliya nya Ohe Oluhye kọ wụlang yẹ mẹ. Ká kele kaka hu ọhaha nya iya ọkịlaakịla ha Ohe Oluhye jịra jaabwọ ká ehile nya iMosisi yẹkẹẹ, ọng myị́ ọng ọlẹ ká ekpo nyamwụ nyị́ myị́ lẹ, nyị họ mẹ. Chajị ká ọngọkiliya ọọwa ka ya ekpo ọmyịmyị nyang ọwẹ dodehe je angịnyị wuu mẹ.”

⁴⁵ Ma, ụka ká olekpo ọwẹ ká iJisọsị họ uda rụ bwu ijata nya iJisọsị kpá, ọ kele juwa kpa ẹla ọọwa pyebile tụ ẹga myị́ ẹga wuu da gbee ká iru nya angịnyị kele kaka jịra ẹ-ẹga nya iJisọsị lẹlẹ. Iru ojuju nya angịịwa lụmẹ gbee lẹ, iJisọsị ayịdang á hi ụbwọ jẹ pwụ epweji ọhẹ-lọhẹ ịlẹ kọ juwa jẹ ka la ọgbagbịla myị́ kpong-kpong kaka. Ọọwa lẹ, ụka ká iJisọsị juwa ekilo nya ụgbẹyị wẹẹ lẹ, iru nya angịnyị lụmẹ-lụmẹ a juwa rụ bwu ẹga myị́ ẹga wuu kele ka ẹga nyamwụ ụ-ụwa ịnyịnyịịnyị lẹlẹ.