IJOCHUWA 1 - IBAYỊBỤỤ NYA OHE OLUHYE

Ohe Oluhye Da IJochuwa Ehile

¹ Ụka ká iMosisi ọnchẹ nya Amkpaa gbu kpá, Amkpaa ya ẹla ta iJochuwa ọnyị nya iNun. IJochuwa à ri ọngọ da ụbwọ nya iMosisi lẹ.

² Amkpaa byi iJochuwa yẹkẹẹ, “IMosisi ọnchẹ nyam gbu lẹ. Nwụlanọ lẹẹlẹẹ, kaahụ bala ala Isirẹlụ wuu ā kpoye nya Ihu ịJọdan kele ka ọpyị ọlẹ kam wẹẹ ya hanụ mẹ.

³ Jaabwọ kam myị ọnụ ha iMosisi ene-ene, m ya ọpyị ọlẹ wuu hang bala angịnyị nyam wuu pwụ ẹga myị ẹga ká ẹta nyanụ ka chị lẹ̀.

⁴ Oyi nya ọpyị nyanụ ka bwu ugbileji oledii ka ju ka ikiti nya iLibanọn o-oye nya ẹtẹ. Ọ ka bwu Ihu ọtụka nya iYufuretisi ọ-ọmẹnụtụrụ kele ka ọpyị nya ala iHiiti lalaláala ka ju ka Ihu nya iMeditareniya ọ-ọmwẹnụ-obyi ịnyịnyị.

⁵ Ọngọngọhẹ-ẹ́ ka kụrụng ahụ iJochuwa myị ka jaabwọ myị abwọ ká hịhị ka ba. M̀ ka juwa tang ụka wuu jaabwọ kam juwa ta iMosisi. Ḿ ka nyẹẹkpẹ dang ka.

⁶ “Aa ju ugbodu ká godayị giri-giri mẹ. Ahụ à ka kpa angịlẹ kụ ọpyị ọlẹ lẹ. M̀ myị ọnụ nya ọpyị ọlẹ ha adaa igogo anyị.

⁷ Aa ju ugbodu ká goday giri-giri mẹ. Aa jẹ myịmyị ká kpa ehile ịlẹ wuu ká iMosisi ọnchẹ nyam ya hang mẹ. A ya ẹhị da ebwo nyamwụ ọhẹ-lọhẹ bwee ka, aalẹ à ka kịlahị ẹ-ẹga myị ẹga ká kà.

⁸ Aa jẹ myịmyị kanụ wa ụpwụ nya ehile ọlẹ ụka wuu. À ka me irya jwoo lẹnụ bala alodu, ká ka ju ihi nya ẹla myị ẹla ọlẹ kị da ẹ-ẹpwụ nyamwụ. Ọọwa, ọ ka ha hang lẹ̀, ā ka kịlahị lẹlẹ.

⁹ M̀ tị́ dang ehile lẹẹ yẹkẹẹ: ju ugbodu, ká godayị giri-giri! A ju uhi ka. Ọkịlẹtụ ā kpụng enyi ka, chajị am Amkpaa Ohe Oluhye nyang juwa tang ẹga myị ẹga ká kà kà.”

Ọnwụlanọ nyọka Kpoye nya ỊJọdan

¹⁰ Ọowa, iJochuwa à da alegbeju ị-dọọ ụbwọ ehile

¹¹ kị ka tụ ịkampụ nya ala Isirẹlụ da lẹlẹ. Ọ byaa nyị byi angịnyị yẹkẹẹ, “Anụ nwụla ang oriri nyanụ nọ mẹ, chajị ọ́ lala ẹnụtụrụ ịta lẹ, ānụ kà kpoye nya Ihu ịJọdan kaka ye ọpyị ọlẹ ká Amkpaa Ohe Oluhye nyanụ ya hanụ la lẹlẹ.”

¹² IJochuwa byi imwawụ nya iRubẹn bala imwawụ nya ịGadị bala ẹhya nya imwawụ nya ịManasẹ yẹkẹẹ,

¹³ “Anụ kpịtịya jaabwọ ka iMosisi ọnchẹ nya Amkpaa ya jenu ya Amkpaa Ohe Oluhye nyanụ nyị wẹẹ ya ọpyị ọlọmwẹnụ-ụtụrụ nya ịJọdan hanụ kụ lẹ̀.

¹⁴ Ịhụ bala anyị bala iyo ịlẹpwa nyanụ ka hi jam ẹgẹlẹ. Angịdẹwụ nyanụ ịlẹ kị nwụlanọ nya ẹwụ tị ka ji ịlahị nya ala Isirẹlụ ịkịla chajị kị ka da ala Isirẹlụ ịịwa ụbwọ.

¹⁵ Ị ka daa ụbwọ gbee kị ka kụ ọ-ọpyị ám̀ ọ-ọmwẹnụ-obyi nya ịJọdan ọlẹ ká Amkpaa Ohe Oluhye nyahị ya haa. Ụka kọ la ịnyị kpá lẹ, ānụ ka nyà tịrẹkpẹ wẹ ka kụ ọ-ọpyị nyanụ ọlọmwẹnụ-ụtụrụ nya ịJọdan ọlẹ ka iMosisi ọnchẹ nya Amkpaa ya hanụ lẹlẹ.”

¹⁶ Ọowa, alimwawụ nya iRubẹn bala alimwawụ nya ịGadị bala ẹhya nya alimwawụ nya ịManasẹ à wẹ byi iJochuwa yẹkẹẹ, “Ahị ka họ ang myị ang ọlẹ ká ya wẹ. Ahị ka ka ẹga myị ẹga ká duuhi ẹrụ kà.

¹⁷ Jaabwọ kahị ju ịhị nya iMosisi, ịnyịnyị-ịnyịnyị āhị ka jung lẹ. Amkpaa Ohe Oluhye nyang ā juwa tang jaabwọ kọ juwa ta iMosisi mẹ!

¹⁸ Ị ka nwụ ọng myị ọng ọlẹ kọ ya ẹhị da ọngịrị nyang bwee lee o-ju ihi nya ehile nyang ka. Aa ju ugbodu ká godayị giri-giri mẹ.”