IJeremaya 1 - IBAYỊBỤỤ NYA OHE OLUHYE

IJeremaya

¹ Ụpwụ ọlẹ ri ala ịlẹ ka iJeremaya ya. IJeremaya ọọwa ri ọnyị nya iHililkaya ọlẹ kọ ri ọngọhẹ nya angịkiliya i-bwu epweji nya Anatotu i-imwawụ nya iBenjamịn.

² Amkpaa ya ẹla ta iJeremaya ẹ-ẹpwụ nya ẹka iwo kụrụ ịta nyọlẹ ká iJosaya ọnyị nya Amọn ri adịrahụ nya ala iJuda.

³ Amkpaa myịmyị ya ẹla tọọ lụka ká iJehoyakim ọnyị nya iJosaya ri adịrahụ. Ọ ya ẹla ta iJeremaya lụka datị-datị ịnyịnyịịnyị gbee pwụ ẹka iwo kụrụ ookpokpo nya adịrahụ oriri nya iSedekaya ọnyị ọkịla nya iJosaya. Ẹ-ẹpwụ nya ọya ọharụ nya ẹka ọọwa, ị go ala iJerusalẹm kpa rụ ka agba lẹ.

Amkpaa Wụrụ IJeremaya

⁴ Amkpaa ya ẹla tam yẹkẹẹ,

⁵ “Ene-ene kịị jẹnyị nyang lẹ, m̀ jẹng, ene ká ịnang ka mang lẹ, m̀ chịng ịgọ ha ịlọm, chụng nyọka ri ọlọmwụ ha ẹpwụma datị-datị.”

⁶ Ọọwa, m̄ wọọ yẹkẹẹ, “Chaahoho! Ọngọlahị Amkpaa ee, am ọngọlẹ-ẹ́? Ḿ ka jẹ-ẹ̀ kpa ọnụ-ẹla koo. M̀ ri ọnjwo wẹẹ.”

⁷ Ma Amkpaa byim yẹkẹẹ, “Ā ya ọwa nyị ri onjwo ka. Ẹga nya ọng myị ọng kam dung ka, ā ka ka lẹ. Ẹla myị ẹla ọlẹ kam bying ya ma ya, ọwa ā ka ya lẹ.

⁸ Ā ju uhi nyaa ka, chajị m̀ ka juwa tang, kam ka chẹwụ keng. Am Amkpaa-à wẹẹ ya ẹla tang lẹ.”

⁹ Ọọwa, Amkpaa-à nịra ụbwọ nyamwụ kpaaa kaka gum ọ-ọnụ lẹ, ọ byim yẹkẹẹ, “Wo mẹ, m̀ jam ya ẹla nyam ọlẹ ká ka ya hang lẹ.

¹⁰ Alẹ ọlẹ m̀ ya ọngịrị hang nyọka jahị da ẹpwụma bala ịpyị nya ịdịrịhụ datị-datị lẹ. À ka hu ịhyẹ nyaa latẹ-latẹ, tụrwaa beji kpalị-kpalị bala ọ-ka yaa ahị kụrụ eji, taa ayịreji. À ka họ ká ẹpwụma ịkịla ka wuleji, yeji giri-giri.”

Ọyị ọ-yẹ a-arụrụ Imiiye

¹¹ Ụka ọkịla, Amkpaa tọm wo yẹkẹẹ, “IJeremaya ee, Ịịyẹ ā tị́ yẹ-ẹ̀ wẹ?” M wọọ yẹkẹẹ, “Ụ́bwọ nya okoji amọndụ m yẹ lẹ”

¹² Ọọwa, ọ byim yẹkẹẹ, “A yẹ myị̀myị. M juwa kpẹhị ju ala ịlẹ kam ya nyọka yẹ kị ka họ jịra.”

¹³ Amkpaa myịmyị tom wo yẹkẹẹ, “Ịyẹ ā tị́ myịmyị yẹ?” M̀ wẹ byọọ yẹkẹẹ, “M̀ yẹ ẹchụ o-oye nya ẹtẹ ká enyi ọlẹpwụ nyamwụ juwa wụ gbụrụ-gbụrụ, kọ tị gbụrụ kịlẹkẹ yahị da we oye nyahị.”

¹⁴ Amkpaa byim yẹkẹẹ, “Ee, ayịreji ọtata ka wẹ bwu ẹtẹ chị alọpyị ọlẹ wuu ọgụ.

¹⁵ M̀ jam wụrụ alẹpwụma ịlẹtẹ wuu warị wẹ iJerusalẹm.” Ịdịrịhụ nyaa ka ya ẹchị-ịdịrịhụ nyaa yeji ọ-ọnụ nya ogirigba nya iJerusalẹm, ị ka kpa ẹwụ ta egwalọ nya iJerusalẹm bala epweji ịkịla ịlọpyị nya iJuda.

¹⁶ M ka yẹ angịnyị nyam akama, chajị nyọlẹ kị họ ọhọbịrị. Ị nyẹẹkpẹ dam juwa ju ịtangare ila ha ijiga, ị kpụ eteji ha ekpeku ịlẹ kị kpa abwọ nya ịlaa họ.

¹⁷ “IJeremaya ee, wuleji ká ya jaa ẹla myị ẹla ọlẹ kam bying ma ya mẹ. Ā ju uhi nyaa koo, ó-ri ịnyị ka m̀ ka chị uhi jung gụ ọọwa ị-ịlahị nyaa.

¹⁸ M̀ jam jung ọngịrị ká ka godayị giri-giri lala epweji ọlẹ kị me egwalọ dagaga ju lẹ. À ka lala ọtachị oloje-oje lee ugulọ ọlẹ kị họ loje ọnyọmịla. À ka bá ẹla ta ọpyị nya iJuda wuu tụ ịdịrịhụ bala alegbeju bala angịkiliya bala alụwa wuu.

¹⁹ Ị ka mwẹla tang, ị́ tị ka kụrụng myị ka, chajị m̀ juwa tang nyọka chẹwụ keng. Am Amkpaa-à ya ẹlẹwẹ lẹ.”