IJEMSI 1 - IBAYỊBỤỤ NYA OHE OLUHYE

Ọnụ Ọdachị

¹ Am iJemsi, ọnchẹ ọ-myị ẹrụ nya Ohe Oluhye bala ịnya Ọngọlahị iJisọsị ịKịrayịsị a lẹẹ da ụpwụ ọlẹ lẹ. M jam dọọ du wanụ, anụ angịnyị nya Ohe Oluhye ịlẹ kanụ bwu imwawụ iwo kụrụ imiiye nya ala Isirẹlụ, kanụ nyi epepe yịrị odehe ọlẹ yịrị wuu. Anụ há gbe alẹ mẹ?

Ju Ugbodu Ẹ-ẹpwụ nya Ọmayẹ

² Anụ anyadam ẹ-ẹpwụ nya ịKịrayịsị, anụ hwoo nya ang nya ọkẹkẹnị ọtụka ụka ká ịmayẹ la datị-datị á wẹ ẹga nyanụ.

³ Chajị anụ jẹ́ yẹkẹẹ, ụka ká ịmayẹ ịwẹ á wẹ ka da ọmyịmyị ọlala nyanụ uya, kanụ kpoye nyaa myị́ lẹ aalẹ, ọọwa a ka họ kanụ ka ri angị godayị kpakpakpa ẹ-ẹpwụ nya ugbodu ojuju myị́ lẹlẹ.

⁴ Anụ myị ká ugbodu ojuju ọọwa a họ ụkụrwọ nyamwụ pwụ ọbaba ẹ-ẹpwụ nyanụ chajị kanụ ka ri adam ọlẹng ẹ-ẹpwụ nya ọngịnyị nya Ohe Oluhye oriri nyanụ, ká abwẹla ọnyịịla ọhọhọ ọhẹ-lọhẹ ka ganụ amwụ kpong-kpong kaka mẹ.

⁵ Ó ri ká ọngọngọhẹ nyanụ á juwa kọ jẹ́ yẹkẹẹ, ọwa nyị́ la ẹla ọjẹ́jẹ lẹka lẹ aalẹ, ọngọọwa a bịlẹ Ohe Oluhye ẹla ọjẹ́jẹ mẹ. Ohe Oluhye Ọngọ ọnahị ọtụka ọlẹ kọ kaa hu ang ha angịnyị ehe la alibyi oyaya taa-ka, ka hu ẹla ọjẹ́jẹ ọọwa ha ọngọlẹ kọ bịlọọ pyii.

⁶ Ma, ọngọ ọlịnyị a bịlẹ Ohe Oluhye ẹla ọjẹ́jẹ ọọwa ẹ-ẹpwụ nya ẹhị ọ-da hile Ohe Oluhye la ọkịlẹtụ ookpokpo, ọkọkọ nya ịwẹẹ ọdada mẹ. Chajị ọng myị́ ọng ọlẹ kọ la ọkịlẹtụ nya ịwẹẹ ọdada ọlịnyị aalẹ, ọngọọwa lala enyi ọlẹpwụ nya ihu ọtụka ọlẹ ká igbachịwụ ọtụka-ọtụka kaa kpọọ gu agbụ ịnyịnyịịnyị.

⁷ Ọngọ ọlịnyị a dahịhile yẹkẹẹ, ọwa nyị ka jẹ́-ẹ ye ịngịngịhyẹ bwu ẹga nya Ọngọlahị Ohe Oluhye myị́ kpong-kpong ka.

⁸ Chajị, ọngọọwa ri ụma nya ọngọlẹ ká irya ọlẹpwụ nyamwụ kaa juwa ju awụlẹ ju ịnyịnyịịnyị, du kọ kaa juwa pyị giri-giri ẹ-ẹpwụ nya ang myị́ ang wuu ọlẹ kọ kaa họ.

Ụdụ Ọkpụkpụ lee Ẹbyahị

⁹ Ọ chịla ká okpehika ọlẹ kọ ri ọngịnyị nya Ohe Oluhye ka juwa chị ọkẹkẹnị u-uhye nyọlẹ ká Ohe Oluhye kpọọ ka iwe-ahụrụ oluhye ị-ịlahị nya ịlọmwụ.

¹⁰ Ká ọlụdụ ọlẹ kọ ri ọngịnyị nya Ohe Oluhye a tịtị juwa chị ọkẹkẹnị ịnyịnyị u-uhye nyọlẹ ká Ohe Oluhye kpọọ ka iwe-ahụrụ ọbẹdẹẹ ị-ịlahị nya ịlọmwụ mẹ. Chajị, ọlụdụ bala ụdụ nyamwụ juwa ka chịpwụrụ bwu odehe ọlẹ jaabwọ ká ịfụlawa nya ekeji kaa wo hụrụ myị́.

¹¹ Chajị, jaabwọ ká ẹnụ á chị ịfụlawa lụmẹ-lụmẹ ká ụhị ọháha nyaa kaa teji, du kị kaa gbu woo bala o-juwa wo hụrụ wẹẹ, ịnyịnyị-ịnyịnyị, ọlụdụ a ka gbu myị́ la ụka ọ-mwaa hi okpoko ọlẹ kọ juwa wẹ ẹpwụtụbwọ nyamwụ pwaapwaa lẹ.

Ọmayẹ Tị́ Bwu Ẹga nya Owo?

¹² Ahị ọwawa ka juwa ha ọng myị́ ọng ọlẹ kọ ju ugbodu ẹ-ẹpwụ nya ịmayẹ ịlẹ kị kaa wẹ ẹga nyamwụ wuu. Ụka kọ be bwu ẹwụ nya ịmayẹ ịịwa kpá wuu, Ohe Oluhye ka hu okpo nya ọhịhị ọmyịmyị-ka nyamwụ ha ọngọọwa, jaabwọ ká Ohe Oluhye ayịdang myị ọnụ ene-ene nọ gbe angịlẹ wuu kị ka la ọháha ẹ-ẹga nyamwụ.

¹³ Ụka myị́ ụka ká ọmayẹ á wẹ chị ọngịnyị nya Ohe Oluhye ọhẹ-lọhẹ ọgụ aalẹ, ọngọọwa a yẹkẹẹ, Ohe Oluhye nyaa wẹẹ ma ọwa yẹ lẹ kpong-kpong ka. Chajị, ọngọngọhẹ á ka jẹ́-ẹ ma Ohe Oluhye yẹ, juwa tọ́ọ ọnụ nya ang onyobyi ọhọhọ kpá myị́ ẹnẹnẹhẹ kaka. Lee, Ohe Oluhye ayịdang ọ-ka jẹ́-ẹ kpa ịngịngịhyẹ onyobyi ọhọhọ kaka ma ọngọngọhẹ yẹ kpá ẹnẹnẹhẹ kaka ịnyịnyị.

¹⁴ Ma, ọmayẹ ọnyị myị ọnyị wuu kaa wẹ chị ọngịnyị ehe ọgụ bwula imyi nya ang onyobyi ọhọhọ ọlẹpwụ ọkịlẹtụ nyamwụ ọlẹ kọ kaa hu ẹhyang nya ang onyobyi ọhọhọ dọọ.

¹⁵ Ụka ká ẹnyị ọjẹjẹ nya ẹhyang nya ang onyobyi ọhọhọ ọọwa a wu ẹpwụ lẹ, ọngọọwa a kaa ya ma ọhọbịrị ọhọhọ lẹlẹ. Ụka ká ọhọbịrị ọhọhọ ọọwa á tị juwa nwa ka ịlahị-ịlahị gbee, kọ pwụ achinege lẹ, o-ya dodehe nyamwụ a kaa ri igu ogbugbu lẹlẹ.

¹⁶ Anụ anyadam ẹ-ẹpwụ nya ịKịrayịsị ịlẹ kanụ hám lụmẹ, anụ myị kị hụnụ ahị ka.

¹⁷ Ang o-hu ha ọnyịịla ọnyị myị ọnyị wuu bala ang ọgahị ọkpẹẹkpẹẹ ọlẹ wuu kaahị angịnyị ehe kaa la lẹ, ẹ-ẹga nya Ohe Oluhye, ọ kaa bwu hireji lẹ. Ọwa a ri Ohe Oluhye ọlẹ kọ ri Adịda Ọngọ họ ẹnụ bala ọya bala ịdịchụ ịlẹ kị kaa hu ahịgboo hahị lẹ. Ohe Oluhye ayịdang á kaa yẹda kpong-kpong ka, chajị ukpowu ọchịchị ọhẹ-lọhẹ á ji ẹga nya Ohe Oluhye, jaabwọ ká ẹnụ á byi lẹ, ká ukpowu kaa chị ka.

¹⁸ Bwula obyi omeme nya Ohe Oluhye la ịlọmwụ, a du kọ kpa ẹla nya ịlẹhị nya ẹrụ ọnyịịla nyamwụ họ kahị yẹ ri angịnyị nyamwụ lẹẹ, chajị kahị ka ri ugbe nya ọgbanyẹ ha angịkịla wuu ịnyịnyị lẹlẹ.

A Wo Ẹla Wo Kem Ka

¹⁹ Anụ anyadam ẹ-ẹpwụ nya ịKịrayịsị ịlẹ kanụ hám lụmẹ, anụ myị ká ọng myị́ ọng lẹpwarịrị nyanụ a ri ọngọ juwa la kpịra-kpịra ẹ-ẹpwụ nya ẹla owowo, kọ tị ri ọngọ họ ịnẹkpẹ ẹ-ẹpwụ nya ẹla oyaya nyamwụ bala agbama ojuju mẹ.

²⁰ Chajị agbama ojuju nya ọngịnyị ehe á kaa họ ẹla pwoku abwẹla ọnyịịla nya Ohe Oluhye myị́ kpong-kpong ka.

²¹ Chajị nya ọọwa lẹ, anụ cheri kanụ tụụbwọ hi abwẹla inyibyi ịlịhịịhya ọhọhọ nyanụ wuu bala egbeju ọnyọọngịrị ohideeji ọlala wuu mẹ. Kanụ juwa kpa olegu ọdụmwọ ye ẹrụ ọnyịịla nya Ohe Oluhye, ọlẹ kị kpa warị kaka yeji ẹ-ẹpwụ ọkịlẹtụ nyanụ mẹ. Chajị ẹla nya Ohe Oluhye ọọwa la ọngịrị ka chị ugbodu okpukpuru nyanụ da myị́.

²² Anụ cheri kanụ ri angị wo ẹrụ ọnyịịla nya Ohe Oluhye wowo kem ka. Ma, ọkọkọ nya ọọwa lẹ, anụ ri angị juwa họ ẹla ọọwa họ mẹ. Chajị, ó ri ịnyị ka, tụbwọ aalẹ, anụ juwa pịrị ịlọnụ ju ododu tịtị wẹẹ.

²³ Ọng myị́ ọng ọlẹ kọ juwa wo ẹla ọọwa wowo kem, kọ tị myị họọ họ ka aalẹ, ọngọọwa lala oluchi ọlẹ kọ kaa yẹ ịlọmwụ ị-ịnyọ ọ-kpa yọyị.

²⁴ Chajị, ụka ká oluchi á yẹ ịlọmwụ ị-ịnyọ kpá wuu, ọ kaa deeri hi jaabwọ ká ụrụrụ nyamwụ la ahyaahị.

²⁵ Ma, ọng myị́ ọng ọlẹ ká ịnyamwụ ọwa á ba ẹẹla ọọwa owowo kem ka lee o-juwa deeri hi ẹla ọọwa ka, kọ juwa me irya ju ehile nya Ohe Oluhye ọ-la kpẹẹkpẹẹ ọlẹ kọ kaa ya ọngịrị nya ịlọhị ọlala myị́ hahị, kọ juwa kele ka ịlahị-ịlahị la ẹla ọọwa ọhọhọ aalẹ, Ohe Oluhye ka wahị kụrụ ang myị́ ang nyamwụ wuu ọlẹ kọ juwa họ.

²⁶ Ọng myị́ ọng ọlẹ kọ juwa wa ịlọmwụ yẹkẹẹ, ọwa nyị ri ọngịnyị nya Ohe Oluhye ọlam-ọlam, kọ tị jụ ẹlẹlẹ nyamwụ wu kpa myị́ lẹka aalẹ, ọngọọwa juwa pịrị ịlọmwụ ju ododu wẹẹ!

²⁷ Ọngịnyị nya Ohe Oluhye oriri kpẹẹkpẹẹ la abyị ọhẹ-lọhẹ ọlala kaka, ị-ịlahị nya Ohe Oluhye Adahị a lẹẹ lẹlẹ. Ọngịnyị nya Ohe Oluhye ọlịnyị ka ri ọngọ juwa kpẹhị rịrị anyị-egu ụka wuu bala ọ-ka juwa da ịhụ-egu ụbwọ ẹ-ẹpwụ nya akama nyaa yẹẹyẹẹ, ịnyịnyị. Aalẹ, ọngịnyị nya Ohe Oluhye oriri nya ọngọọwa ri ang ododu ịnyịnyị wẹẹ, ọlịnyị-ị ka ri ụma nya ọngọlẹ kọ ka myị ká alodehe ka kpa ang inyibyi ịhọhọ nyaa chọọ ịrị ị-ịlahị nya Ohe Oluhye kpong-kpong ka ịnyịnyị.