IHoseya 1 - IBAYỊBỤỤ NYA OHE OLUHYE

¹ Ẹla ọlẹ ká Amkpaa ya ta iHoseya ọnyị nya iBe-eri lụka ká Usiya bala iJotam bala Ehasị bala iHesekaya ri ịdịrịhụ i-iJuda bala ụka ká adịrahụ iJerobowam ọnyị nya iJowachị ri Adịrahụ nya Isirẹlụ.

Āhụ bala Anyị nya IHoseya

² Ụka ká Amkpaa dọmwụ nyọka ya ẹla ta ala Isirẹlụ bwu ọnụ nya iHoseya, ọ byi iHoseya yẹkẹẹ, “Kele kaka ye ọnyang ọlakpara kọ ma anyị ịlẹ kị ka ri alakpara lala ịnaa. Angịnyị nyam ịlẹ nyẹẹkpẹ dam juwa kpụ ijiga lala ọnyang ọlụya ọlẹ kọọ rụ hi ọrụmwụ.”

³ Ụka ọọwa lẹ, iHoseya a kele kaka ye iGomẹẹ ọnyị nya iDibilayim lẹlẹ. Ọọwa, ọ jẹ ẹnyị lẹ, ọ ma ọnyị ọlẹng họọ lẹlẹ.

⁴ Ọọwa, Amkpaa a byi iHoseya yẹkẹẹ, “Ẹnyị ọlẹ ká ka ju ọnyị ọwẹ a ri iJesiryẹlụ lẹ, chajị ọ́ ka tata ene kam ka yẹ ọdọdẹpwa nya iJehu akama kwiwa nya angịlẹ kọ nwụ i-iJesiryẹlụ kaka. M ka họ ịpyị nya ala Isirẹlụ ka ta ayịreji wuu gbanggbang.”

⁵ Ụka ọọwa lẹ, m̄ ka mwụ ọngịrị nya ala Isirẹlụ eku ụ-ụwa ọ-ọkpọọ nya iJesiryẹlụ lẹlẹ.

⁶ IGomẹẹ myịmyị jẹ ẹnyị. Ọọwa, ọ ma ọnyị ọnyang lẹlẹ. Ọọwa, Amkpaa a byọọ yẹkẹẹ, “Ẹnyị ọlẹ ká ka ju ọnyị ọlẹ ri iLoruhama, chajị ḿ juwa yẹ ahyẹẹrwẹrwa nya ala Isirẹlụ lee ọ-hịnyọhi haa kaka.

⁷ Ma, m̀ tị ka yẹ ahyẹẹrwẹrwa nya iJuda. Am Amkpaa Ohe Oluhye nyaa a ka chaa da lịlọm lẹ. M̀ ka chaa da bwu ẹwụ ọdada lee uda bala ịcha bala ẹma nya ẹwụ lee bwu anyịrẹ lee angị kụ anyịrẹ.”

⁸ Ụka kọ chị iLoruhama ẹmẹ lẹ, ọ myịmyị jẹ ẹnyị lẹ, ọ ma ọnyị ọlẹng lẹlẹ.

⁹ Ọọwa, Amkpaa a byi iHoseya yẹkẹẹ, “Ẹnyị ọlẹ ká ka jwọọ ri iLowami, chajị anụ-ụ́ ri anyị nyam kaka, ḿ tị ri Ohe Oluhye nyanụ kaka.”

Ị ka Kpa Ala Isirẹlụ Nyà Tịrẹkpẹ

¹⁰ Ala Isirẹlụ ka lụmẹ lala ugburuja nya Ihu ọlẹ ká ọngọngọhẹ-ẹ́ ka jẹ-ẹ̀ wa lee o-maa me myị ka. Ohe Oluhye jam byinu yẹkẹẹ, “Anụ-ụ́ ri anyị nyam ka,” ma, ị-ịlahị ọ tị ka wụrụụnụ “anyị nya Ohe Oluhye ọlẹ kọ juwa hịhị.”

¹¹ Ala iJuda bala ala Isirẹlụ ka yẹ julawụlẹ. Ị ka chụ ọngọ ookpokpo nyọka ri olegbeju nyaa. Ị ka nwa kịlahị ọ-ọpyị ọọwa, chajị ẹnụtụrụ nya iJesiryẹlụ ka ri ẹnụ ọtụka.