Roma 9 - Kuruei Voa Nawawrea 1920

¹ Keriso onu a’a orau voa miki nai kurunaimakina, voa arauau peo, uku na lai‐amua i Avaea Iaa pamea‐eakeina na voa anu miki ione‐li’ina,

² Nai kuruane kukupuna ovara, umu unu kukunu ane, nai panipani ai mi’ina.

³ Keriso mere nai la’i’?-?iakeia’ane‐iai nai umuliai li’ina uku na aroa a’a eiai, oro ane oro na avai a’a keina:

⁴ Oro Isaraela a’a keina; Eloi inu ukua‐mere oro apoakeina, Una evao’evao, kuruei voa ane, oro mi’ina, Vupu ipawkiai ane, omoro marea iaki, eni maura‐voa ane, eiviriai;

⁵ Mai‐oro omo a’a keina, Iesu unu kape oro mere kiniakei’inave, U ane U a’a uriria upa mere are’eakeina, Eloi kopai‐awkavakeina opai keiakana. Amene.

⁶ Eloi inu voa eria‐liakei?-?ape. Uku a’a uriria Isaraela a’a mere kiniakeia’ane euna, oro Isaraela a’a akoa‐akei’inakea:

⁷ Uku oro Aberahamo onu kiri a’a oro uriria Aberahamo onu ukua‐mere miki akoa‐a‐kei’inakea: kuruei voa erau voa kuruakei’inave, I Isako mere ni ukua‐mere akoakeiakana.

⁸ Kurua voa anu miki eire, ukua‐mere i a’a kiniakeina oro Eloi inu ukua‐mere orau akoakeiapea: a oro i kuruei voa ukua‐mere evere’eiakeina oro Aberahamo onu kiri a’a akoakeina.

⁹ Uku kuruei voa erau voa kikiriakeina, Ei pani inu eiei vairuane Nai aneakana, Sara mere kiniakana ane.

¹⁰ Ei voa awku uakeina; i ene mai‐vaki Isako Rebeka awku ia evere’eaka, u anaera ukua kiniai awkamakei’inave;

¹¹ Anaera ukua kinia?-?keiakape, opara ima naea, opara lipi naea, orere liakape, a uku Eloi inu ie’ea lai keia’ane‐iai, uku orere enu opara peo, a uku Una lai U ie’eiaka,

¹² Rebeka erau voa awkiakei’inave, Airavaki ovaki inu aivara keiakana.

¹³ Ei voa Iaa revareva voa e mikirina, erau voa kuruakeina, Iakobo Nai umuawkava’ane euna, a Esau Nai vai’i‐awkava’ane euna

¹⁴ Enei oiamalaikora’i? Eloi laru ai namea uakei’i? Ai.

¹⁵ Kurua voa Eloi Mose kurunave Una lai ipawkina, U erau voa kurunave, Nai umu ipawkiane umu e Nai ipawkiakana, Nai paioka ipawkiane paioka e Nai ipawkiakana.

¹⁶ Ei voa mere enei ipali’ina, uku a’a anu lai peo, uku a’a anu iviri peo, a uku Eloi, U ane U umu mi’ina, awku uriria rokoakeina.

¹⁷ Uku Iaa revareva erau voa Paroa kurunave, Ei uku eiai mukua ai Nai la‐nikava’?-?ane euna, uku ni laru ai Na iva Nai ipawkiane‐iai, uku Na nawi awku pani va’au iki ai upurukiakeia’ane‐iai.

¹⁸ Ei voa ipawkina U ie’eane U umu ipawkina, orau awku U ie’eane U umu kane‐ena.

¹⁹ Ni erau voa veve’i’ina, Uku oiana Eloi voakina? Una lai koama‐lari‐li’i?

²⁰ Ni e, ni a’a e, ni koana ni voa kamukamu kuruna Eloi eiai? Aru karikiakeina una karikia vaki erau voa amaveve’emau? Uku oiana ei aipo orau ni i’iane euna?

²¹ Vana karikia a’a iva miapeana ka’e varepa monou mere vana vapara, vana rurupu ane, karikiai?

²² Eloi ie’emakina Una iara ipawkiai, Una iva ane, U lai kekepa keia’ane mani a’a eiai oro e‐avakeiai evere’eiakeina,

²³ Uku Una umu unu evereverea U ipawkiane‐iai Una umu‐mia a’a eiai U evere’eiane euna evao’evao eiai,

²⁴ Enei ane, enei Isaraela a’a e peo, lai unuku a’a awku, U laea‐alauane euna?

²⁵ Hosea anu buka laru ai U erau voa kuruna, Kurua kaki a’a Na a’a a‐kei’inavea Na a’a Nai eroiakana; U ane u naumuki a‐kei’inavea Nai naumuki oroiakana.

²⁶ Iou ai ei voa erau voa kuruakei’inave, Noro Na a’a peo, Iou ai Eloi rokoa‐opai inu ukua‐mere oro eroiakeiakana.

²⁷ Isaia awku voa araro erau voa kurunave, Isaraela a’a anu evereverea ere aura anu miri mikiriakeia’ane, Omo a’a ailapea iekavakeiakana;

²⁸ Uku pani va’au ai Iehova voa veve’eakana, ema oailiakana ane.

²⁹ Erau voa Isaia kuruaka, Iehova Sabaota kiri a’a varomo, a’a ailapea, ave’?-?aiaka livilia, Sodoma a’a, Gomara a’a ane, enei mikiriane euna.

³⁰ Oi ika voa ana enei mi’ina? Lai unuku a’a opara anana a‐voronavea, opara anana oro auiane euna, pirimaroakoa anu opara anana ane.

³¹ A Isaraela a’a Vupu voronave opara anana awkuai li’ina, kurua Vupu oro auiape.

³² Uku oiana? Uku i pirimaroakoa oro a‐voronavea, i Vupu unu opara oro voronave. Kurua uai ai oro ara’anave;

³³ Orau ei voa kikiriakeina, Akoi’i, Siona akapu upa mere uai rawre Nai aimakina a’a aruru arava’ane‐iai, rawre a’a aruru aua‐ava’ane?-?iai; a a’a kavakava pirimaroakoakana, u makiri‐awkavakeiapea.