Roma 8 - Kuruei Voa Nawawrea 1920

¹ Ou uku eiai oro Iesu Keriso laru ai rokona, oro eiai eai mua eria uakeina;

² Uku Avaea anu Vupu, rokoa ipawkimakina Keriso Iesu laru ai, Vupu mere i’?-?ika’ane euna, namea, imua ane, enu vupu mere.

³ Uku a’a anu eapa Vupu liai a‐li’inavea, a Eloi li’inave. Una Mere okaivirima?-?kei’inave a’a kape laru ai, namea a’a anu kape mikirimakei’inave, epie pei orau namea eiai, namea a’a laru ai U mua‐awkanave;

⁴ Uku Vupu unu opara anana eiei laru ai evere’?-?eakeia’ane‐iai. Uku ene rokoa i ene kape nane amua?-?ekavakeiapea, i ene avaea nane oro amua‐ekavakeina.

⁵ A’a i omo kape nane amua‐ekavakeia’ane, kape nane enu awku oro eivirina. I omo avaea nane oro amua‐ekavakeia’ane, avaea awku oro eivirina.

⁶ A’a anu lai awkuakeia’ane kape nane awku eiai imua uakeina; a’a anu lai awkuakeia’ane avaea awku eiai rokoa uakeina, airu ane.

⁷ Uku kape nane enu lai mani keina Eloi inu paku ai: kurua lai Eloi inu Vupu kamaia‐a‐li’inakea, u kamaialiai liapea ane.

⁸ Oro ane omo umu evopoakeina kape nane awku eiai, Eloi kopai‐awkavai oro liapea.

⁹ Eloi inu Avaea noro laru ai rokoamakeia’ane, kape nane awku peo, a avaea awku noro evorona; a’a Keriso onu Avaea miape liane, u Keriso onu a’a peo.

¹⁰ Keriso noro laru ai rokoane, nomo kape uku namea imuai limakina ane, uku opara anana nomo avaea rokoa mi’ina.

¹¹ U ane U Iesu imua mere la‐okanave noro laru ai U rokoamakeia’ane, U ane U Keriso imua mere la‐okanave nomo oia kape U rokoa ekuakana uku Una Avaea noro laru ai rokona.

¹² Ou uku eiai, ovaki airavaki e, enei kamaia a’a peo ene kape nane eiai kamaia‐ekavai.

¹³ Noro orau rokoane, noro imuakana; a uku avaea anu paioka nomo kape nane enu eni opara noro a’ama?-?keia’ane, noro rokoakana.

¹⁴ Uku oro ane i Eloi inu Avaea oro eravakeina, oro uriria Eloi inu ukua‐mere keina.

¹⁵ Uku piria aivara a’a anu lai noro moawku miape, kurua lai noro kore‐nakava?-?keina. Noro laru ai noro lai kane miane euna ukua‐mere noro aponaiakeia’ane euna, kurua lai kane akina erau voa araro laealiai, Aba, ene Mai e!

¹⁶ Avaea awku, ene avaea ane, ioneli’ina, enei Eloi inu ukua‐mere keina:

¹⁷ Enei ukua‐mere keia’ane, enei airavaki ukua awku keina; Keriso ane kiripai enei airavaki‐ukua keina; Keriso onu kukunu aua‐mia a’a enei keia’ane, uku Una evao’evao enei aua‐miane‐iai.

¹⁸ Nai laikorana eai pani inu kukunu ima peo uku evao’evao kiripai ipi’ipiai, kurua evao’evao enei laru ai ipawkiakeiakana.

¹⁹ Uku ea awku uriria iviri inamu‐ekimakina, aioiaka‐pokoimakina ane, Eloi inu ukua‐mere enu erea inamu‐oiai.

²⁰ Uku ea awku eria a‐eakei’inavea uku u verukua eiai, a uku Una lai, U ane U ea awku kamaia‐enave.

²¹ A panipani ai araea’araea uakei’inave ea awku pomoa anu iva mere ururuakeiakana, uku kurua ururua miai Eloi inu ukua‐mere enu evao’evao kiripai aneakana.

²² Uku enei ipali’ina anea’‐anea eai, a’e ukua kinia kukunu orau, ea awku uriria i’ilimakina.

²³ Oro e peo, a enei awku, enei Avaea anu maura‐uru miane euna, ene nane laru ai enei i’ilimakina, enei ukua?-?apoa aioiaka‐pokoimakeia’?-?ane i ene kape enu iawka mere.

²⁴ Uku i araea’araea enei iakavakeia’ane euna: a araea’araea anu awku inamu‐oiakeina u araea’araea awku peo: uku oiana a’a araea’araea li’ina kurua awku u inamu‐oina?

²⁵ A enei araea’araea liane kurua awku enei inamu‐a‐oinakea, ou awku eiai enei kekepa aioiaka‐pokoina.

²⁶ Orau Avaea awku ene eapa paiokana, uku nawki voa nawki‐awkavai, anana nawki‐awkavai ane, enei ipapea: a Avaea voa enei auiai liapea enei eiai U i’i voa nawki‐awkana,

²⁷ U ane U a’a anu lai evorona Avaea anu voa miki U ipali’ina, uku Una nawki Eloi inu a’a eiai Eloi inu lai mikirina.

²⁸ Enei ipali’ina a’a Eloi umu‐awkana, oro ane Una lai orau oro laea‐elauakeia’ane euna, oro eiai awku uriria ima rokoamakina.

²⁹ Uku U ipa‐elauaka U laea‐elauaka Una Mere enu aipo miai, uku aroa a’a anu avai ovara anu airavaki U keia’ane‐iai.

³⁰ Oro ane U ie’eiaka U laea‐elauane euna ane; oro ane U laea‐elauane euna oro mua mere ururueakeina U omoro kuruna, oro ane oro mua mere keina U omoro kuruane euna U evao’evao eiane euna.

³¹ Eiawku eiai enei oiamakurumau? Eloi paiaka’ane, koana maniakamau?

³² U ane Una Mere U manipu‐a‐awkanavea, U awkunave enei uriria eiai, U kiripai awku uriria ane U veruku akuapeana?

³³ A’a Eloi ie’eiane euna koama‐avimau? Eloi kuruna mua mere oro ururueakeina.

³⁴ U ane u koana mua?-?ekavai? Keriso Iesu imunave, imua mere U moawku la’ane euna. Eloi inu eve miki mekai U pa’ana, enei eiai U nawki‐awkamakina ane.

³⁵ Keriso onu umu mere koama‐lai‐akamau? Kukunu ana, kukupuna ana, mani ana, pei oea ana, irikaiva ana, e’ei ana, kaia rawve ana?

³⁶ Ei voa Iaa revareva laru ai kikiriakeina, Uku Ni eiai lare pani iki a’avai oro ipia‐mimakina. Mamoe orau avakeiai akoakeina, orau enei awku akoakeina.

³⁷ I U mere U ane U umu‐aka’ane euna enei awkoni‐awkava a’a anu amua a’a keina.

³⁸ Uku nai ipa‐ilauakeina imua peo, rokoa peo, aivara‐avaea peo, omo amua peo, ei pani inu awku peo, iru pani inu awku peo,

³⁹ Mukua peo, eporo peo, ea awku e peo, Eloi inu umu mere laiakavai liakana, kurua umu ene upa mere keina Keriso Iesu laru ai, ene Amua.