Roma 14 - Kuruei Voa Nawawrea 1920

¹ A’a una pirimaroakoa eapa keina, aroa a’a orau noro umu‐aine, a u kiripai voa e kevakeva pa kuruai.

² Uku a’a monou unu pirimaroakoa evere’ena pei kavakava navai; a a’a mo, uku una pirimaroakoa eapa keina, u aurapei e na’ana.

³ A’a u peipei na’ana u a’a e lari pa awkavai uku u peipei a‐na’anakea: peipei larilia vaki awku peipei na’a vaki u lari pa awkavai: uku orere i Eloi umu‐ekavakeia’?-?ane euna.

⁴ Ni koana a’a e enu aivara ni voa veve’ena? U oiane naea, u arava’ane naea; una opara i una amua voa veve’eakeina. U oiakana uku oiai Amua iva awkuai li’ina.

⁵ A’a monou lare monou e avioina; a’a mo lare kavakava ipi’ipia avieina. Una lai laru ai a’a kavakava ailiakeinamoki.

⁶ A’a lare monou avioina uku kurua lare iaa keina, u orau li’ina uku Amua eiai; a’a awku u pei varomo e na’ana, kurua pei u na’ana Amua eiai, uku Eloi u kopai‐awkana; u awku kurua pei u larili’ina kurua pei u larili’ina Amua eiai, u awku Eloi kopai‐awkana.

⁷ Uku ene a’a kapeo uarokona una nane eiai, a’a kapeo imuna una nane eiai.

⁸ Enei rokoane naea, Amua eiai enei rokona; enei imuane naea, Amua eiai enei imuna. Ou uku eiai, enei rokoane naea, enei imuane naea, enei Amua anu a’a keina.

⁹ Ei uku eiai Keriso imunave, moawku rokoanave ane, uku U Amua rokoakeia’ane?-?iai imua a’a eiai, rokoa a’a awku eiai.

¹⁰ A ni, uku oiana ni aroa a’a ni voa veve’ena? Uku oiana ni aroa a’a ni lari‐awkana? Eloi inu voa vevea pakara paku ai enei uriria oiakana.

¹¹ Uku ei voa kikiriakeina, Amua erau voa kuruna, Orau Nai rokona kapoi, are‐epo kavakava Na paku ai aiakana, Eloi inu paku ai anai kavakava iki e’eakana.

¹² Enei inamu‐oina kapoi, ene a’a kavakava Eloi inu paku ai iki e’eakana uku una opara eiai.

¹³ Ou uku eiai ene a’a enei voa pa veve’eai: a enei oivirinamaki auawia naea, ekeni naea, ene aroa a’a anu kapea ai enei einavaia uku aua’avai.

¹⁴ Nai ipali’ina, i Amua Iesu nai aili’iakeina ane, pei miki eria upu keina; a a’a laikora’ane pei varomo upukeina, kurua pei upukeina oro eiai.

¹⁵ I pei ni na’amakina ni aroa a’a kukunu‐eakeia’ane, ni opara umu unu opara peo. Oivirine i pei ni na’ana ni aroa a’a ni oa’anavaia, u ane u eiai Keriso imunave.

¹⁶ Oivirine ni opara ima aviakeinavaia.

¹⁷ Uku Eloi inu eiei pei peo, ere peo, a kurua eiei opara anana, airu ane, kopai ane, i Avaea Iaa mere;

¹⁸ A u ane u orau Keriso kamaia‐awkana, Eloi kopai?-?li’ina u eiai, U kepoina ane.

¹⁹ Airu unu awku, awku ane ene lai la‐ekana, enei evoronamaki.

²⁰ Uku pei eiai Eloi inu iaki pa au‐awkavai. Pei uriria urupu keina; a a’a namea keina una pei auawia keia’ane a’a e eiai.

²¹ Opara anana oia pei, ere iara ane, opara uriria ane, lari‐ekavai, i oro ni aroa a’a arava’ane.

²² A uku ni pirimaroakoa, ni e eiai ni oivirine Eloi inu paku ai. A’a anu lai‐amua mua‐awkavape liane una opara eiai u kopai keina.

²³ A’a peroro e’ea miane uku pei u na’ana, u mua‐awkavakeina, uku una opara pirimaroakoa upa mere la‐okavakeiapea, opara uriria pirimaroakoa upa mere la‐okavakeiapea, namea opara keina.