Roma 1 - Kuruei Voa Nawawrea 1920

¹ Paulo, Iesu Keriso onu aivara, iva a’a evere’eai u laea‐ulauakei’inave, Eloi inu Iva voa omoro kuruai u lai‐awkavakei’inave,

² Iva voa Eloi kuruei voa kuruaka i Una laikorava a’a Iaa revareva laru ai,

³ Uku Una Mere, U ane U a’a kiniakei’inave ane, U Davida anu kiri a’a kei’inave,

⁴ A uku Una Avaea anu iaa i Una la’ava imua mere Eloi inu Mere U ipawkiakei’inave:

⁵ Na voa uku Iesu Keriso ene Amua, i U mere la’aruku, iva ane, enei miane euna Una iaki eiai, uku lai unuku a’a uriria awkono avao ai enei a’a paiekavai pirimaroakoa anu ipawkia voa kamaialiai,

⁶ Oro awkono avao ai noro awku akoakeina, Iesu Keriso onu a’a evere’eai noro laea‐nalauakeia’ane euna:

⁷ Noro uriria e Roma ai pokoina, Eloi inu naumuki a’a e, iaa a’a evere’eai noro laea‐nalauakeina. La’aruku, airu ane, nakunameki i Eloi ene Mai mere, Amua Iesu Keriso mere ane.

⁸ Pinai, i Iesu Keriso mere na Eloi nai kopai‐awkana uku awku U liane euna noro uriria eiai; uku nomo pirimaroakoa anu uru pani va’au iki upurukimakina.

⁹ U ane nai avaea iaki awkuna Una Mere enu Iva voa nai omoro kuruane, U, Eloi, ipali’ina nomo nawi nai kairinani kuruena Una paku ai,

¹⁰ Panipani ai nai nanuku?-?awkamakina, U evere’eane kapea auakeia’ane‐iai uku noro ai nai aki‐anea’ane‐iai.

¹¹ Uku inamu‐naiai nai umulimakina, avaea paioka noro ai nai mi‐anea’ane‐iai, uku noro venea‐naiakeia’ane‐iai;

¹² Uku noro kiripai nai pai’ikavakeia’ane‐iai i ene pirimaroakoa, nomo pirimaroakoa, na pirimaroakoa ane.

¹³ Ovaki airavaki e, noro ipaliai nai umuli’ina, pani aila noro ai aneai nai umuliane euna, anea’anea eai na lai evere’eakeiape, uku noro awkono avao ai uru varomo nai roikiane‐iai, orau nai liane euna lai unuku a’a e awkono avao ai.

¹⁴ Uku nai Heleni a’a anu kamaia a’a, lai unuku a’a e enu kamaia a’a ane; lai evera a’a anu kamaia a’a, lai pauapaua a’a anu kamaia a’a ane.

¹⁵ Ou uku eiai na iva orau nai evere’i’iakeina Iva voa omoro kurunaiai Roma ai.

¹⁶ Uku Keriso onu Iva voa eiai nai makiri‐apea: uku kurua Iva voa Eloi inu iva keina pirimaroakoa a’a kavakava iawkavai; pinai Isaraela a’a, neko mere ai lai unuku a’a eiai.

¹⁷ Uku kurua Iva voa laru ai Eloi inu opara anana pirimaroakoa mere, pirimaroakoa i, ipawkiakeina: Iaa revareva erau voa kikiriakeina, I pirimaroakoa opara anana a’a rokoakana.

¹⁸ Uku Eloi inu ia’ia pani muku mere ipawkiakeina namea opara uriria eiai, a’a anu opara lipi eiai ane, i namea voa miki oro pauena;

¹⁹ Eloi ia’ia keina; uku kurua awku oro ipaliai li’ina U eiai omo lai laru ai ipawkiakeina; uku U verukua kurua awku ipekiane euna.

²⁰ Uku Una vauki‐rokoa awku pani va’au unu ea pani mere iki ai inamu‐eiakeina, i Una eve‐pawki Una opai iva, Una iaa ane, iki ai ipekiakeia’ane euna, ou uku eiai ei a’a paioka eria mi’ina.

²¹ Uku oro lai evera miaka’ane Eloi ipaliai, Eloi orau oro avioiakape, kopai‐awkavakape ane; uku oro lai kauakaua kei’inave omo lai evera eiai, omo lai muru eiakei’inave.

²² Oro voa meramera kurumakei’inave omo lai evera eiai, oro avu‐avu miki evere’enave,

²³ Eloi rokoa opai avioiai oro umu‐a‐li’inavea, a imunu a’a anu aipo, naku unu aipo, a’uri inu aipo, vivava vaki inu aipo, mikirimakei’inave, oro avieinave.

²⁴ Ei uku eiai, uku omo rurupu i’ima eiai, Eloi ave’einave omo kape oro awkono avao ai namea‐ekavai:

²⁵ Uku Eloi miki oro ave’eaka arauau eloi eiai, rokoa awku eiakei’inave oro aviei?-?aka, ea awku unu Uku oro inaka‐liaka ane, U ane U kopai‐awkavakeina opai keiakana. Amene.

²⁶ Ei uku eiai Eloi ave’einave omo lai inu i’ima oro evere’eiai. A’ero omo kape ekunave kana opara eiai,

²⁷ Vaki awku omo a’ero ave’einave, lai i’ima li’inave vaki e eiai, vaki vaki e kiripai i’ima limakei’inave, omo namea anu kavani oro mi’inave ane.

²⁸ Uku Eloi laikorakiai oro umuliakape, Eloi ave’einave omo lai evere’eiai, namea opara liane‐iai.

²⁹ Namea opara uriria omo lai evopona’anave, eiri, iawmia ane, mani. Namani, avé ane, anakaia voa, ewaea ane, iara ane;

³⁰ Oro vauavaua omoro noua a’a, Eloi vai’i‐awkava a’a, iara a’a, lai kauakaua a’a, voa meramera a’a, namea nawawrea anu uku a’a, a’e mai ane larilia a’a,

³¹ Lai pauapaua a’a, kuruei voa vepea a’a, lai miki eria a’a, lai kane a’a, umu eria a’a:

³² Oro Eloi inu lai ipalimakina uku a’a ei opara li’ina imua omo kavani keina, oro ei opara li’ina, a’a e awku oro paiekana ei opara liai.