Mataio 28 - Kuruei Voa Nawawrea 1920

¹ Sabati lare periakei’inave, namai lare enu merea pani ai, Maria Magadala, Maria e ane, lauoi inamu‐oiai orere anenave.

² Akoi’i, pani va’au oioi ovara li’inave: uku Iehova anu aivara‐avaea pani muku mere lilinave, rawre lai‐awkanave lauoi inu kikau mere, rawre upa mere U i‐pa’anave ane.

³ Una paku evao mikirinave, Una a’a kape maina anu urupu mikirinave:

⁴ Oiviria aiau uku kore u eiai oro varuvaruli’inave, imua a’a orau oro evere’einave.

⁵ Aivara‐avaea a’ero erau voa kuruenave, Norere kore pa liai: uku nai ipali’ina Iesu iri keoa upa mere avakei’inave norere vorona.

⁶ U eu ai peo, uku orau U kurunave, U imua mere rokoa la’ane euna, Anene, mako U i’iakei’inave norere inamu‐oine.

⁷ Rokoroko enara, Una aivara ekira, U imua mere la’ane euna, noro paku ai U enanavailia kapoi Galilaia ai; iou ai noro inamu‐oiakana: Akoi’i, nai nakiane euna kapoi.

⁸ Orere lauoi mere emoki enanave, orere kore, kopai ane, kei’inave; aivara ekiai orere area‐enanave.

⁹ Au‐ekuai anemakei’inave orere Iesu inamu‐oinave, U erau voa kuruenave, Norere ouana? Orere anenave, are epo ai’inave, Una are a’akinave ane, avioinave ane.

¹⁰ Iesu erau voa kuruenave, Kore pa liai, enara Na aivara ekira Galilaia ai enavai, iou ai oro inamu‐i’iakana.

¹¹ Orere enamakei’inave oiviria aiau varomo pai’iri ai anenave, awku uriria liakei’inave oro omoro amua a’a ekinave.

¹² Oro mai‐oro kiripai kaupukiaka’ane, voa ipiaka’ane, moni ovara oro aiau ekunave,

¹³ Erau voa kurumakei’inave, Noro erau voa kuruakana, Kipere pani ai enei awawkeimakei’inave Una aivara anenave, Una kape avapu iou‐mi‐enanave ane.

¹⁴ Kavana ei voa viriane, paioka voa noro eiai enei kuruakana, noro kukupuna mi’inavaia.

¹⁵ Oro moni mi’inave, orau oro ipekiakei’inave oro li’inave: Isaraela a’a awkono avao ai eai ei voa upurukiakeina.

¹⁶ Aivara 11 Galilaia eiei ai elenave, kurua akapu ai Iesu ekiaka.

¹⁷ Oro inamu‐oiaka’ane, oro avioinave: a’a varomo peroro e’eanave.

¹⁸ Oro ai Iesu anenave, erau voa kuruenave ane, Iva uriria ikuakeina pani muku ai, pani va’au ai ane.

¹⁹ Ou uku eiai noro enara, kaki a’a uriria ipekira, i Mai inu nawi, i Mere enu nawi, i Avaea Iaa anu nawi, bapatiso‐ekara:

²⁰ Oro ipekira awku uriria kamaia‐ekavai Nai nakiane euna: Akoi’i, Nai noro kiripai pokoi‐liviai panipani ai anea’anea pani va’au periane.