Mataio 27 - Kuruei Voa Nawawrea 1920

¹ Merea pani aneaka’ane omoro amua a’a uriria, a’a aruru unu mai‐oro ane, voa ipimakei’inave uku Iesu avai.

² Oro pirinave, arekanave ane, Pilato kavana awkunave ane.

³ Kurua vaki Iuda Iesu anai‐aviaka u inamu‐oiaka’ane Iesu mua‐awkavakei’?-?inave, u lai urukinave, moni 30 la’a u moawku mi‐anenave omoro amua a’a, mai oro ane, paku ai,

⁴ Erau voa kuruenave ane, Nai namea liane euna uku nai mua eria a’a anai‐aviane euna. Oro erau voa veve’enave, kurua awku ene awku ana? Ai, ni e.

⁵ Moni la’a u kai’inave omoro marea laru ai, elenave ane, una ke konou pirinave iri vao upa mere u imua eokavakei’inave.

⁶ Omoro amua a’a moni la’a mi’inave, erau voa kurunave ane, Opara anana peo ei moni omoro marea anu maua laru ai eiai uku ei moni aro onu kavani moni keina.

⁷ Oro voa ipiaka’ane oro vana karikia a’a anu aura inaeali’inave oro iou ai kikoro imua a’a i’iane‐iai.

⁸ Ou uku eiai kurua aura nawi aro aura oroiakei’inave anea’anea eai.

⁹ Orau Ieremia laikorava a’a anu voa evere’eakei’inave, u erau voa kurunave, Moni la’a 30 oro e‐mi’inave, kurua moni kavani U inaealiakei’?-?inave, kavani Isaraela a’a evere’enave U eiai;

¹⁰ Ei moni oro awkunave vana karikia a’a anu aura eiai, orau Iehova evere’eaka.

¹¹ Iesu kavana anu paku ai oinave, kavana erau voa veve’enave, Ni Isaraela a’a anu amua ana? Iesu erau voa kurunave, Omo amua Nai aku.

¹² I omoro amua a’a, mai‐oro ane, U onai‐awkava?-?kei’inave ane, U voa eria kurunave.

¹³ Pilato erau voa veve’enave, Ei voa aila oro onai?-?nikana Ni viriapeana?

¹⁴ U voa eria kurunave onai voa monou eiai, uku U kavani voa eria kurunave kavana varuavakei’inave kapoi.

¹⁵ Kurua purai pani ai kavana anu opara kipura a’a monou ururuai a’a aruru eiai, kurua kipura vaki a’a aruru ie’enave.

¹⁶ Kipura uru vaki monou oro miaka nawi Baraba oroiakei’inave.

¹⁷ Oro kaupukiaka’ane Pilato erau voa veve’einave, Nai koama‐ururumau noro eiai? Baraba ana, Iesu ana, U ane U nawi Keriso oroiakeina?

¹⁸ U ipali’inave uku namani eiai oro Iesu piriaka.

¹⁹ U voa vevea pakara ai pa’avaka’ane, una a’e epo voa u ai okaivirinave, erau voa kurunave ane, Ei opara anana a’a keinamoki; uku kipere ai aiaro lipi aila nai miaka U eiai.

²⁰ Omoro amua a’a, mai‐oro ane, a’a aruru ailienave nawki‐awkavai Baraba eiai, Iesu avakeia’ane‐iai.

²¹ Kavana erau voa veve’einave, Ei a’a rere ekara a’a ana noro amalaikora’i nai ururuma noro eiai; oro kurunave, Baraba.

²² Pilato erau voa veve’einave, Ei a’a Iesu nawi Keriso oroiakeina nai oiamalimau U eiai? Oro uriria erau voa kurunave, Iri keoa upa mere u avakeinamoki.

²³ Kavana erau voa veve’einave, Uku oiana, oi lipi ana U liane euna? Oro voa araro erau voa laeali’inave, Iri keoa upa mere U avakeinamoki.

²⁴ Pilato inamu‐oiaka’ane una voa eria kei’inave, a’a aruru rawre ia’ia lala’?-?amakei’inave ane, u ere miaka, a’a anu paku ai una eve u ere kikinave, erau voa kurunave ane, Nai mua eria keina ei opara anana a’a anu aro eiai: noro e.

²⁵ A’a aruru uriria erau voa kurunave, Una aro ene upa mere keinamoki, ene ukua‐mere upa mere ane.

²⁶ Pilato Baraba ururunave oro eiai: u Iesu vaki?-?awmiaka’ane iri keoa upa mere avai u Iesu ururunave.

²⁷ Kavana anu aiau Iesu omo mako ai ora’anave, aiau kaupu iki U ai oro kaupukinave ane.

²⁸ Una a’a kape oro uninave, aro kapua oro luki‐awmi’inave ane.

²⁹ Oro aimu kiku veia?-?ka’ane Una uku upa mere aiaka’ane, amua anu ini awku oro Una eve miki mokono ai aiaka’ane: Una paku ai oro are epo ai’inave, U makiri‐awkavai oro keke voa erau voa kurunave, Akoi’i, Isaraela a’a anu Amua e!

³⁰ U upa mere oro kaunere kai’inave, ini U mere mimakei’inave Una uku upa mere oro ini vaki‐awmi’inave.

³¹ Oro keke makiri‐awkavaka’ane, aro kapua U mere oro iou‐mi’‐inave, Una a’a kape oro luki‐awmi’inave, iri keoa upa mere avai oro ora’anave.

³² Oro elemanemakei’inave, Kurene a’a oro au‐awkunave, nawi Simona oroiakei’inave: ei a’a Iesu unu iri keoa vakaruai oro oininave.

³³ Oro Golagota ai paiaka’ane, kurua nawi inu miki, La’aro Epamu unu mako,

³⁴ Ere iara oro awkunave U nava’ane‐iai: U ere ke?-?vere’eaka’ane U navakape.

³⁵ Iri keoa upa mere oro a’anave, Una a’a kape oro kokoranave, aua aua ie’enave ane, orau i laikorava a’a kuruakei’inave, Oro awkono avao ai Na a’a kape oro kokoranave, aua aua ie’enave ane.

³⁶ Uku oiviriai oro i‐pa?-?pa’amakei’inave;

³⁷ Una uku upa mere ei avia voa kikiriakei’inave oro ai’inave, Iesu eire, Isaraela a’a anu Amua.

³⁸ U piria avapu a’a rere e‐avakei’inave iri keoa upa mere, monou Una eve miki mekai, mo, Una eve keau mekai.

³⁹ Oro awawpemakei’inave, makiri voa a’ika a’ika erau voa kurumakei’inave,

⁴⁰ Ni ane Ni omoro marea lare rere kaiane enakanave, moawku la‐okanave ane, Ni inikane. Ni Iehova anu Mere keia’ane, iri keoa mere liline.

⁴¹ Omoro amua a’a, kikiria a’a ane, mai‐oro ane, oro keke erau voa kurumakei’inave,

⁴² A’a e U i’ekanave, U iawkavai liapea. U Isaraela a’a anu Amua U iri keoa mere lilinamoki, enei pirimaroakoakana.

⁴³ U Iehova pirimaroakoanave, Iehova umuliane U iawkanamoki, uku U erau voa kurunave, Nai Iehova anu Mere keina.

⁴⁴ Avapu a’a orere U kiripai iri keoa upa mere avakei’inave, orere awku makiri‐awkavai anara voa kurunave.

⁴⁵ Lare iki pani mere anea’anea pukurua pani arekamu ai pani va’au iki mu?-?rukei’inave.

⁴⁶ Pukurua pani ai voa araro Iesu erau voa laeali’inave, Eli, Eli, lama sabachthani? Ou voa anu miki eire, Na Iehova e, Na Iehova e, uku oiana Ni ave’i’ina?

⁴⁷ A’a varomo i‐oimakei’inave, oro ou voa viriaka’ane, oro erau voa kurunave, Ei a’a Elia laea‐ulauna.

⁴⁸ Omo a’a monou emoki area‐enanave, ina ere iara evoponave, ini va’au pirinave, la‐okanave Iesu nava’ane‐iai.

⁴⁹ A’a mo erau voa kurunave, Keinamoki, enei inamu‐oinamaki Elia anea’ane iawkavai.

⁵⁰ Iesu voa araro moawku laealiaka’ane U imunave.

⁵¹ Omoro marea anu mai kapua emoki koravakei’inave upa mere arau ai miki; pani va’au awku oioili’inave, rawre‐ovara oro awku kokoranave;

⁵² Lauoi‐oro auakei’inave; Eloi inu a’a aila oro imua anu awaw kei’inave oro lala’anave,

⁵³ Iesu unu imua mere la’ava pani neko ai omo lauoi mere oro elemanenave, iaa pai’iri ikirinave ane, a’a aila paku ai oro erenave ane.

⁵⁴ Aiau unu marevaki, oro awku u kiripai oiviriai i?-?pokoimakei’inave, oro pani va’au unu vanovano inamu‐oiaka’ane, awku‐oro liakei’inave ane, oro erau voa kurunave, Ei a’a Iehova anu Mere kapoi.

⁵⁵ A’ero aila amai mere inamu‐ekimakei’inave, oro ane oro Iesu Galilaia mere e’e’okavaka, paiokavaka ane:

⁵⁶ Maria Magadala, Maria Iakobo, Iose ane enu mei, Sebede enu ukua‐mere enu mei, ei a’ero kaupu awkono avao ai kei’inave.

⁵⁷ Lare eua pani ai amua a’a monou nawi Iosepa, Arimatea mere anenave, u awku Iesu unu aivara a’a kei’inave:

⁵⁸ U Pilato ai anenave, Iesu unu kape miai u nawki‐awkanave ane. Kape Iosepa awkuai Pilato aiau ekinave.

⁵⁹ Iosepa kape miaka’ane, kapua urupu u kape luki‐awmi’inave.

⁶⁰ Una lauoi nawawrea laru ai Iesu unu kape u i’inave, lauoi rawre ovara laru ai koravakei’inave, rawre ovara lauoi inu kikau ai u pa‐okanave, u ave’enave ane.

⁶¹ Maria Magadala, Maria e ane, i‐rokoanave, lauoi paku ai orere i‐papa’amakei’inave.

⁶² Purai lare enu namai lare omoro amua a’a, Parisea a’a ane, Pilato ai anenave,

⁶³ Erau voa kurumakei’inave ane, Amua e, enei laikora‐akina ei ewaea vaki Una rokoa pani erau voa kurunave, Lare rere kaiane periane imua mere Nai moawku la’avakana.

⁶⁴ Ou uku eiai lauoi oiviriai a’a ekine, Una aivara kipere pani anenavaia, Una kape avapu iou‐mi’inavaia, a’a aruru erau voa kurunavaia, Imua mere U la’ane euna: orau pinai kukupuna anu ovara ika pani inu kukupuna ovara ipi’ipiapea.

⁶⁵ Pilato erau voa kuruenave, Oiviria a’a e‐mi’ine, enara, lauoi kane piriai, orau noro umuli’ina.

⁶⁶ Oro enanave, lauoi kane pirinave, kikau unu rawre ane, oiviria a’a ane oro ai’inave ane.