Mataio 24 - Kuruei Voa Nawawrea 1920

¹ Iesu omoro marea ave’eaka, U enamakei’inave kapea ai, Una aivara omoro marea anu lalava e e ipekiai U ai anenave.

² Iesu erau voa kuruenave, Ei marea uriria noro inamu?-?eiapeana? Nai kurunaina kapoi, Ei marea ururia enakavakeiakana, rawre eria rawre mo upa mere keiakana.

³ Neko mere ai U Oliveta akapu upa mere pa’amakei’inave Una aivara‐oro e U ai anenave, erau voa veve’enave ane, Ni akine uku ei awku unu evere’ea pani eiai, oi vupu ana uku Ni aneliviai anelia pani ai, pani va’au unu oailia pani ane?

⁴ Iesu kuruenave, Noro oivirine a’a ewaea‐nakana?-?vaia.

⁵ Uku a’a aila aneakana, i Na nawi oroiakeiakana ane, erau voa kuruakana ane, Nai Keriso keina; a’a aila oro ewaea‐ekavakana.

⁶ Maura, pani va’au peo, noro uru viriakana uku apaki e e eiai, epo voa awku apaki e e eiai. Kukupuna pa miai: uku ei awku uriria evere’eai limakina, a oailia pani arekamu ai peo.

⁷ Uku kaki a’a kaki a’a e apakinavai mani lala’avakana, eiei awku uku eiei e: pei oea, ni’iri maia, pani va’au oioi keiakana mako?-?mako ai.

⁸ Ei kukunu awku uriria ukua kinia anu mepu kukunu orau keina.

⁹ Uku mani‐nakavai oro napiriakana, na’avakana ane: i kaki a’a uriria noro mani‐nakavakeiakana uku Na nawi eiai.

¹⁰ A’a aila aua’avakana, aravakana ane, omo a’a oro anai‐aviakana, vai’i‐ekava?-?kana ane.

¹¹ Arauau laikorava a’a lala’avakana, a’a aila oro ewaea‐ekavakana.

¹² Uku namea opara la’avakana a’a aila anu umu kou’upua evere’eakana opara anana eiai.

¹³ A kurua a’a iviri keiakana anea’anea oailia pani ai, u iawkavakeiakana.

¹⁴ Ei Iva voa Eiei eiai omoro kuruakeiakana pani va’au iki ai ione voa kaki a’a uriria eiai; neko mere ai oailia pani aneakana.

¹⁵ Kurua oava anu uku noro inamu‐oiane Iaa Mako ai oimakina, orau Daniela laikorava a’a kurunave (a’a ei voa oraina u virinamoki).

¹⁶ Oro Iudea eiei ai i‐pokoiakana oro akapu ai area‐enanameki.

¹⁷ U ane u marea upa mere i‐pokoina aru una marea mere iou miai u pa liliai:

¹⁸ U ane u aura ai i‐pokoina una a’a kape roikiai marea ai u pa vairuai.

¹⁹ Au’a oro eiai oro ukua nemo keina, oro awku eiai ou pani ai upi ame ekuna!

²⁰ Nawki‐awkane noro area‐enanavaia laura pani ai, Sabati lare ai ane:

²¹ Uku ou pani ai kukupuna ovara keiakana, kukupuna orau pani va’au unu pinai pani mere anea’anea eai keiape, moawku keiapea ane.

²² Ou pani inu eiei uma?-?eaka livilia a’a kapeo area‐enavaka; a uku Eloi inu a’a eiai ou pani inu eiei uma eiakeiakana.

²³ Ou pani ai a’a kurunaiane, Akoi’i, Keriso eu aku naea, iou aku naea: una voa noro pa pirimaroakoai.

²⁴ Uku arauau keriso?-?oro arauau laikorava a’a ane, lala’avakana, momo’ore vupu oro ipekiakana ane, oro liai liane, oro Eloi inu a’a ewaea‐ekavakana.

²⁵ Pa aikavai uku ei awku eiai Nai nakiane euna omo anea pani paku ai.

²⁶ Oro erau voa kurunaiane, Akoi’i, u kekepere ai i‐pokoina: pa eleai; Akoi’i, u marea lalava laru ai uapokoina; pa pirimaroakoai.

²⁷ Uku orau kaia anu evao anu eiei mere elemanena, maruru eiei ai inamu‐oiakeina ane; A’a anu Mere enu anea orau keiakana.

²⁸ Iou ai imua kape uakeina, iou ai iara naku kau?-?pukiakeiakana.

²⁹ Ei lare enu kukupuna periakeia’ane, lare emoki muru‐awkavakeiakana, ia awku pamea awkuapea, rawpu kaia mere aravakana, kaia anu iva‐awku oro varuvaru‐ekavakeiakana:

³⁰ Ou pani A’a anu Mere enu vupu ereakana kaia ai: pani va’au unu kaki a’a uriria vikiriakana, A’a anu Mere iva, evao’evao ovara ane, kaia anu awporo upa mere anemakeiakana oro inamu‐oiakana.

³¹ Una aivara‐avaea oro pi laea araro liai U ekaiviriakana, Una a’a‐oro pani va’au unu eiei morere‐morere mere oro kaupukiakana, kaia ei anelai mere kaia iou anelai.

³² Uru iri mere aipo voa ipawkine; una vao ika miane, aw‐oro ilo ereane ane, aumeia pani arekamu ai noro ipali’inake:

³³ Orau noro awku, ei awku uriria noro inamu‐eiane, noro ipaliakana U arekamu ai keina, lia, nomo kikau ai keina.

³⁴ Nai kurunaina kapoi, Ei kiri a’a imuapea ei awku unu evere’ea pani paku ai.

³⁵ Kaia, pani va’au ane, periakeiakana, a Na voa‐oro periakeiapea.

³⁶ A uku kurua lare, pani inu eiei miki ane, a’a kapeo ipali’ina, pani muku unu aivara‐avaea‐oro, Mereawku, ipapea, Mai e ipali’ina.

³⁷ Orau awku kei’inave Noa anu pani ai, orau awku keiakana A’a anu Mere enu anea pani ai.

³⁸ Orau pani va’au unu ere aru pani paku ai a’a purai na‐amakei’inave a’e mimakei’inave, vako pei awkumakei’inave anea’anea Noa mapea lakeaka’ane,

³⁹ Oro pauapauakei’inave anea’anea erearu aneaka’ane, oro uririra e‐avakei’inave: A’a anu Mere enu anea orau keiakana.

⁴⁰ A’a rere aura ai keiakana; monou iou‐miakeiakana, monou ave’eakeiakana.

⁴¹ A’ero rere pu awmakeiakana; monou ioumiakeiakana, monou ave’eakeiakana.

⁴² Ou uku eiai noro oivirine: uku Amua anu anea lare noro ipapea.

⁴³ Ei voa ipali’ine, marea anu mai‐vaki avapu a’a anu anea pani ipaliaka livilia, u marea oiviriaka.

⁴⁴ Ou uku eiai noro awku oivirine: uku pani noro laikorana A’a anu Mere aneapea kurua pani ai U aneakana.

⁴⁵ Aivara miki, lai evera ane, u koana una amua are’eane euna una marea a’a pei ekuai pei pani ai?

⁴⁶ Kurua aivara orau limakina una amua auiakana una anea pani ai u kopai‐awkavakeina.

⁴⁷ Nai kurunaina kapoi, Amua kurua aivara are’eakana, una aru uriria eiviriai.

⁴⁸ A kurua aivara lipi a’a keia’ane, una umu laru ai u erau voa kuruane, Na amua ema vairuapea;

⁴⁹ Marea ukua u vaki?-?emiane, awpa nania a’a kiripai u ailo keia’ane;

⁵⁰ Kurua lare aivara laikorapea una amua vairuakana,

⁵¹ U aivara laoiakana ewaea a’a‐oro kiripai pokoiai; iou ai vikirimakeiakana, ni’iri ekikimakeiakana ane.