Mareko 9 - Kuruei Voa Nawawrea 1920

¹ U erau voa kuruenave, Nai kurunaina kapoi, A’a varomo eu ai oina, oro imuapea, anea’anea Eloi inu eiei iva anea’ane euna oro inamu‐oiane.

² Lare 6 periakei’inave ane, Petero, Iakobo ane, Ioane ane, a’a e mere Iesu akapu muku upa mere eravaka‐inanave: omo paku ai u ae’epuakei’inave ane.

³ Una a’a kape akuru evere’eanave, urupu‐mai pamea anu urupu orau kei’inave; a’a orau urupu‐eai liapea.

⁴ Elia Mose kiripai omo paku ai erenave: orere Iesu kiripai voa kurumakei’inave.

⁵ Petero Iesu erau voa kurunave, Amua e, enei kopai‐nikana enei eu ai rokona: enei komo marea rere kaiane la‐ekanamaki; monou Ni eiai, mo Mose eiai, mo Elia eiai.

⁶ Voa e kuruai u a‐ipali’inavea, uku oro kore ovara kei’inave.

⁷ Awporo onu ivawvoa’a ruekinave: voa awporo mere erau voa kurunave, Na naumuki Mere ei aku, Una voa viriamu.

⁸ Oro emoki inamu‐ekinave, a’a kapeo oro inamu‐oinave, Iesu e oro kiripai i‐pokoinave.

⁹ Oro akapu mere kinumakei’inave, U ekinave a’a e pa awkiai uku awku eiai oro inamu‐eiaka, anea’anea A’a anu Mere imua mere la’ane.

¹⁰ Kurua voa omo lai laru ai oro oivirinave, oro voa ekinamakei’inave uku imua mere la’ava anu miki eiai.

¹¹ Oro erau voa veve’enave, Uku oiana kikiria a’a kuruna Elia pinai aneai limakina?

¹² U erau voa kuruenave, Elia pinai anena kapoi, awku uriria evere’ena ane; voa awku kikiriakeina A’a anu Mere eiai, kukunu aila U miai limakina, inaka‐awkavakeiakana ane.

¹³ Nai kurunaina, Elia ei‐anena kapoi, voa orau kikiriakeina u eiai, omo lai orau oro liane euna u eiai.

¹⁴ Oro aivara ai vairuaka’ane a’a aruru ovara oro inamu‐oinave aivara avikimakei’inave, kikiria a’a voa veve’eimakei’inave ane.

¹⁵ A’a aruru inamu‐oiaka’ane oro varuavakei’inave, U ai area‐enamakei’inave, oro kepoinave.

¹⁶ Kikiria a’a U erau voa veve’einave, Oiana noro voa ekevakeva kurumakina?

¹⁷ Aruru a’a anu a’a monou erau voa kurunave, Amua e, na mere Ni ai nai areka’ane euna, u avaea‐momoa mi’ina;

¹⁸ Avaea‐momoa ukua ai anea’ane, u ukua kae ai kaina, kaunere‐pou una ane epo mere elemanena, una ni’iri awku nekeneke ekikina, una kape kerema evere’emakina: Ni aivara nai nawki‐ekanave avaea laoiai, oro laoiai a‐li’inavea.

¹⁹ Iesu erau voa kuruenave, Peroro e’ea kiri a’a e, pani inu va’au oiana Nai noro kiripai keiakana? pani inu va’au oiana Nai lai kekepa miakana noro eiai? arekane Na paku ai.

²⁰ Oro arekanave Iesu unu paku ai: avaea Iesu inamu‐oiaka’ane u ukua emoki kukunu ovara awkanave; ukua ara’anave, kaunere pou ane epo mere elemanenave ane.

²¹ Iesu ukua anu mekai erau voa veve’enave, Pani inu va’au oiana ukua ei maia mi’ina? Mekai kurunave, una upi pani mere.

²² Pani aila avaea ukua iau laru ai kaina, ere laru ai ane, uku oavai: Ni liai liane, umu‐akane, paiakane ane.

²³ Iesu erau voa kurunave, Nai liai liane! Awku uriria liai liakeina pirimaroakoa a’a eiai.

²⁴ Ukua anu mekai erau voa emoki kurunave, Nai pirimaroakoanake: na eapa pirimaroakoa Ni iviri‐ene.

²⁵ Iesu inamu‐ei’inave a’a area‐anemakei’inave, U avaea‐momoa erau voa awkinave, Avaea‐momoa, keporo namau ane, elemanene, moawku u laru ai pa ikiriai.

²⁶ Avaea vikirinave, ukua kukunu‐awkanave ane, ukua mere u elemanenave: uku ukua imua a’a orau kei’inave, a’a aila kurunave, u imuakeina.

²⁷ Iesu ukua anu eve a’akinave, paiokanave ane, ukua la’anave.

²⁸ Iesu marea ikirimaneaka’ane, Una aivara erau voa vauavaua veve’enave, Uku oiana avaea enei laoiai a‐li’inavea?

²⁹ U erau voa kuruenave, Ei kaupu unu avaea lipi i nawki‐awkava e laoiakeina.

³⁰ Ou mako mere oro Galilaia eiei vimu ai elenave; a’a Una aki ipaliai U umu‐a?-?li’inavea.

³¹ Una aivara U ipekimakei’inave, U erau voa kuruenave ane, A’a anu Mere anai‐aviakeiakana a’a anu paku ai, oro avakana, lare rere kaiane enu lare ai U moawku imua mere la’avakana.

³² Ei voa anu miki oro a‐ipali’inavea, miki eiai voa veve’eai oro kore kei’inave.

³³ Oro Kaperanauma ai anenave: marea laru ai oro pokoinave ane, u erau voa veve’einave, Oi voa ana kapea ai noro voa ekevakeva kurumakei’inave?

³⁴ Oro voa peo, uku kapea ai oro voa ekevakeva kurumakei’inave uku kurua a’a omo kaupu mere mai‐vaki are’eakeiakana.

³⁵ U pa’anave, aivara 12 U ai aneai u laea‐elau’unave, erau voa kuruenave ane, A’a umuliane u pinai vaki keiai, u a’a uriria anu ika vaki keiakana, oro uriria anu aivara a’a ane.

³⁶ Upi mau’u U mi’inave, omo awkono avao ai ai’inave ane: U upi Una eve miaka’ane, U erau voa kuruenave,

³⁷ A’a upi mau’u ei upi orau umu‐aiakana Na nawi eiai, u umu‐ai’ina: a’a umu‐ai’ina, Nai e u umu‐ai’iape, U awku ikaivinriave u umu‐aina.

³⁸ Ioane erau voa kurunave, A’a monou enei inamu‐oinave avaea lipi laeimakei’inave Ni nawi eiai, u a‐e’e’akanakea: enei ei’inave uku u a‐e’e’akanakea.

³⁹ Iesu kurunave, Pa eiai: uku a’a kapeo rokona u iva iaki liakana Na nawi eiai, kurua a’a voa lipi kuruapea Nai eiai.

⁴⁰ Uku kurua a’a u ene mani a’a peo, u ene a’a keina.

⁴¹ A’a koiri ere nakuane noro na’ane‐iai uku noro Keriso onu a’a keina, Nai kurunaina kapoi, una kavani u paukiapea.

⁴² Ei vaki mau’u monou u i‐pirimaroakona a’a u eiai uai aiane u arava’ane‐iai, ima miki ou a’a eiai rawre una ke piriakeia’ane, ere aura ai kaiakeia’ane.

⁴³ Ni namea liane uku ni eve eiai, eve eine: ima miki ni eiai eve monou e rokoa ikiriai, ni eve rere miane Gehena ai ikiriai, iau opai inu mako ai.

⁴⁴ (Iou ai ano imuapea, iau awku nawmokiakeiapea.)

⁴⁵ Ni namea liane uku ni are eiai, are eine: ima miki ni eiai are monou e rokoa ikiriai, ni are rere miane Gehena ai laoiakeiakana.

⁴⁶ (Iou ai ano imuapea, iau awku nawmokiakeiapea.)

⁴⁷ Ni namea liane uku ni inamu eiai, inamu eme‐awkine: ima miki ni eiai Eloi inu eiei inamu monou e ikiriai, ni inamu rere miane Gehena ai lanikeiakana:

⁴⁸ (Iou ai ano imuapea, iau awku nawmokiakeiapea.)

⁴⁹ Uku a’a kavakava i iau urupu‐eakeiakana.

⁵⁰ Ere aura ima keina: ere aura una iara paukiane, oiana uakei’i ere aura iara‐eai? Noro laru ai ere aura mi’inamoki, airu pokoinamoki ane.