Mareko 1 - Kuruei Voa Nawawrea 1920

¹ Iesu Keriso, Eloi inu Mere enu Iva voa erau voa pinai‐li’ina,

² Voa orau Isaia laikorava a’a anu buka laru ai kikiriakeina, Akoi’i, Na iva a’a Ni paku ai Nai okaivirimakina, Ni kapea u evere’eakana Ni paku ai.

³ A’a monou voa araro laealimakina: Kekepere ai kapea karikine Iehova eiai, Una kapea anana‐eine.

⁴ Ioane ere bapatiso‐liaka kekepere ai, lai urukia anu ere bapatiso omoro kuruaka ane namea anu paue‐awmia eiai.

⁵ Iudea eiei inu avai a’a uriria mere, Ierusalema anu avai a’a mere awku, a’a u ai elenave, i u oro uriria ere bapatiso‐ekavakei’inave Ioridana aiara ai, omo namea iki e’emakei’inave.

⁶ Ioane kamela kimari a’a kape lukiakei’inave, kape awre una mako ai piriakei’inave ane, kira’a, venoko ane, u na’anave.

⁷ Erau voa u omoro kurunave, U ane U nai neko ai aneliviai anelia U epe’epe keina nai, U ane, ipi’ipiapea, nai a’a ima peo are epo aiai Una are rawre uniai.

⁸ Nai ere bapatiso‐naka’?-?ane euna: a U Avaea Iaa bapatiso‐nakavakana.

⁹ Ou pani ai Galilaia anu Nasareta mere Iesu anenave, i Ioane U ere bapatiso‐awkavakei’inave Ioridana anu aiara ai.

¹⁰ Emoki ere inamakei’inave vapai kaia ai U inamu‐oinave, Avaea naku orau lilimakei’inave U upa mere:

¹¹ Voa awku pani muku mere erau voa laealimakei’inave, Ni Na naumuki Mere keina, uku Ni Na kopai evere’eakeina.

¹² Kekepere ai eleai Avaea emoki oininave.

¹³ Lare 40 kekepere ai U uarokoanave, i Satani ailiakei’inave; lekuleku a’uri kiripai U uarokoanave; aivara‐avaea oro kamaia‐awkanave.

¹⁴ Ioane enu piria pani neko ai kipura marea laru ai Iesu Galilaia eiei ai anenave, Eloi inu eiei Iva voa omoro kurumakei’inave.

¹⁵ Erau voa kurumakei’inave, Pani evere’eakeina, Eloi inu eiei arekamu ai keina: noro lai urukine, Iva voa pirimaroakone ane.

¹⁶ U Galilaia anu Ururu ai are‐rokoamakei’inave, Simona, Anederea ane Simona anu aroa a’a, U inamu‐ei’inave, keve Ururu ai ururumakei’inave: uku orere nava evoroa a’a kei’inave.

¹⁷ Iesu erau voa kuruenave, Norere e’e’ikane, a’a evoroai Nai ipanakiakana.

¹⁸ Keve orere emoki ave’einave, e’e’okanave ane.

¹⁹ U paku ai mau’u enavaka’ane, Iakobo Sebede enu mere, Ioane ane una aroa a’a, U inamu‐ei’inave, orere mapea ai keve ekoromakei’inave.

²⁰ Orere U emoki laea‐elau’unave: orere enu mekai una aivara a’a kiripai mapea ai orere ave’enave, e’e’okanave ane.

²¹ Oro Kaperanauma ai inunave, Sabati lare U omoro marea ikirinave, omoro kurunave ane.

²² Uku Una ipawkia voa eiai oro varuavakei’inave: uku lai evera a’a orau U ipekinave, kikiria a’a orau apea.

²³ Omoro marea laru ai avaea‐upu mia a’a rokoanave; voa araro u laeali’inave.

²⁴ Erau voa kurumakei’inave, Enei oiamali’i Ni eiai, keinamaki Iesu Nasareta a’a e? Ni ama’ane’i a’avai? nai ipanilauna, Ni Eloi inu Iaa A’a.

²⁵ Iesu una voa ei’inave, erau voa kurunave ane, Voa oaio, ei a’a mere ni elemanene.

²⁶ Avaea‐upu kurua a’a kukunu‐awkavaka’ane, voa araro laealiaka’ane, u elemanenave.

²⁷ Oro uriria varuavakei’inave, erau voa ekinamakei’inave ane, Oi opara ana eire? ipawkia voa nawawrea eire, amua a’a anu voa U avaea‐upu ekina, oro kamaia‐awkana ane.

²⁸ Una uru emoki upurukinave makomako ai Galilaia eiei iki ai.

²⁹ Oro omoro marea elemaneaka’ane, oro Iakobo, Ioane ane kiripai emoki anenave Simona, Anederea ane, enu marea ai.

³⁰ Simona anu kimi a’e kou’upua varuvaru maia kei’inave, oro Iesu awkinave a’e enu maia eiai.

³¹ A’e ai U enanave, a’e enu eve U mi’inave, U a’e la‐okanave; maia a’e emoki ave’enave, pei ekuai a’e la’anave.

³² Eua pani ai lare euaka’ane, maia a’a uriria U ai oro mi‐anenave, oro awku avaea‐lipi miaka.

³³ Pai’iri a’a uriria kikau ai kaupukiakei’inave.

³⁴ A’a oro maia e e miaka oro aila U aukariekanave, avaea lipi aila U laeinave; uku avaea lipi ipa‐ulau’unave oro voa kuruai U ei’inave.

³⁵ Merea pani ai, lare ina pani paku ai, U la’anave, epuri mako ai U elenave, nawki‐awkanave ane.

³⁶ Simona, oro awku U kiripai marea ai pokoinave, e’e’okanave.

³⁷ Oro auiaka’ane oro erau voa kurunave, A’a kavakava nivoromakina.

³⁸ U erau voa kuruenave, Enei enanamaki pai’iri pai’iri arekamu ai, Nai iou ai awku omoro kuruane‐iai: ou uku eiai Nai Eloi mere anenave.

³⁹ Omo omoro marea uriria laru ai Galilaia eiei ai U omoro kurunave, avaea‐lipi awku laeinave.

⁴⁰ Apa auma a’a U ai anenave, U paku ai are epo ai’inave, erau voa nawki‐awkamakei’inave ane, Ni umuliane urupu‐i’iai Ni liai li’ina.

⁴¹ Iesu umu‐awkanave, Una eve oiokanave, apa auma a’a nekenave ane, erau voa kurunave ane, Nai umu li’ina, urupu evere’enamoki.

⁴² Apa auma emoki aukarikavakei’inave, a’a urupu‐eakei’inave ane.

⁴³ Iesu emoki okaivirinave, erau voa awkinave ane,

⁴⁴ Oivirine ni a’a e awkinavaia, enara, ni kape omoro a’a ipawkira, urupuliakeia la’aruku ekura orau Mose awkinave, iki e’ea voa eiai a’a anu paku ai.

⁴⁵ U elenave, uru upurukinave ane, a’a kavakava awkinave ane, ei uku eiai a’a anu paku ai Iesu pai’iri ikiriai a‐li’inavea: pai’iri iki ai epuri mako mako ai U pokoinave: mako‐mako mere oro U ai anenave.