Luka 6 - Kuruei Voa Nawawrea 1920

¹ Sabati lare monou Una aivara kiripai Iesu kawni aura vimu ai are rokoanave; Una aivara kawni uru awke?-?kenave, uru omo eve mokono ai kikirimakei’inave oro na’anave.

² Parisea a’a varomo erau voa veve’einave, Uku oiana noro sabati inu vupu lipi amali’i?

³ Iesu erau voa veve’einave, Noro voa oraiapeana Davida eiai ou pani ai u pei navai‐navailiaka’ane, oro awku u kiripai kei’inave;

⁴ U Eloi inu marea ikirinave, iaa pu mi’inave, na’anave ane, una aivara awku u kiripai u au‐ekunave; ei pu iaa keina omoro a’a eiai?

⁵ U erau voa kuruenave, A’a anu Mere sabati lare enu Amua awku.

⁶ Sabati lare mo U omoro marea ikirinave, ipawkinave ane: a’a monou i‐pokoinave una eve miki paroro‐kei’inave.

⁷ Kikiria a’a, Parisea a’a ane, inamu‐ekimakei’inave sabati lare ai U aukarika’ane naea; oro ailieane‐iai.

⁸ Omo lai U ipali’inave, Eve paroro a’a U erau voa kurunave, La’ane, awkono avao ai oine ane. U la’anave, paku ai oinave ane.

⁹ Iesu erau voa kuruenave, Voa monou Nai vevenaima; Opara anana ana sabati lare ai ima liai, mo, lipi liai, ekara’ana? a’a iawkavai naea, a’a oavai naea?

¹⁰ Inamu‐urukimakei’?-?inave oro uriria ai, U a’a erau voa awkinave, Ni eve oiokane. U eve oiokanave: una eve aukarikavakei’inave.

¹¹ Oro iara evopoakei’inave; oro voa ipimakei’inave uku Iesu mani‐awkavai.

¹² U akapu ai inanave nawki‐awkavai, iou ai kipere iki U Eloi nawki‐awkanave.

¹³ Pani merea Una aivara U ai anenave U laea‐elau’unave: omo a’a 12 U ie’einave, nawi iva a’a U eroinave;

¹⁴ Simona nawi Petero awku U oroinave, Anederea ane una ovaki, Iakobo ane, Ioane ane, Pilipo ane, Batolomaio ane,

¹⁵ Mataio ane, Toma ane, Iakobo Alapeo onu mere ane, Simona ane, nawi Selote oroiakei’inave.

¹⁶ Iuda Iakobo onu a’a, Iuda Isakariota, u ane u Iesu unu anai‐avia vaki kei’inave.

¹⁷ Oro kiripai U kinunave, kanikara ai oinave Una aivara kaupu kiripai, a’a aruru ovara ane Iudea eiei iki mere, Ierusalema mere, Turia, Sidona ane enu miri mere, Una voa viriai, U omo maia aukariekava’ane‐iai, oro U ai anenave;

¹⁸ I upu avaea oro kuku?-?nu‐ekavakei’inave: oro aukariekavakei’inave.

¹⁹ A’a aruru uriria nekeai oro ipia‐mi’inave: uku iva U mere elemanenave, uriria aukariekanave ane.

²⁰ Una aivara U inamu?-?ekiekanave, erau voa kuruenave, Noro oea‐rokoa a’a e, noro kopai‐nakavakeina: uku Eloi inu eiei noro eiai uakeina.

²¹ Noro eai pei navainavaili’ina noro kopai‐nakavakeina: uku noro lai aukiakeiakana. Noro awku eai vikirina noro kopai‐nakavakeina: uku noro kekeliakana.

²² A’a noro vai’i‐nakava’ane, lainakava’ane nomo a’a mere, anakaia voa kurunaiane, nomo nawi ane lariliane, uku A’a anu Mere eiai, noro kopai‐nakavakeina.

²³ Kurua lare ai kopaili’ine, kopai eiai ekeli’ine: uku nomo kavani ovara keina pani muku ai: uku orau omo mai‐oro liaka laikorava a’a eiai.

²⁴ Umu e, aru mo’onu mia a’a e! uku nomo kavani noro miane euna.

²⁵ Umu e, noro eai pei lai aukiakeina! uku noro pei navai‐navailiakana. Umu e, noro eai kekeli’ina! uku noro awni mu’u mailau liakana, vikiriakana ane.

²⁶ Umu e, a’a uriria keponaiane! uku orau omo mai‐oro li’inave ewaea laikorava a’a eiai.

²⁷ A noro virimakina Nai kurunaina, Nomo mani a’a noro umu‐ekane, oro awku vai’i‐nakana noro paiekane,

²⁸ Oro ivave‐nakana noro kopai‐ekane, oro mani‐nakana oro eiai noro nawki‐awkane.

²⁹ A’a ni variri vakina variri e kukine u vakiane‐iai; a’a ni piliue iou‐mi’ina ni piliue e iou‐miai ni pa eiai.

³⁰ A’a kavakava nawki?-?nikana ni awkune; u ane u ni aru iou‐mi’ina, ni aru vairuai ni nawki pa awkavai.

³¹ Orau noro umuli’ina a’a liai noro eiai, orau noro awku li’ine oro eiai.

³² Noro umu‐ekava’ane oro umu‐nakana, oi avioia ana noro mi’ina? uku namea a’a umu‐ekana oro ane oro umu‐ekana.

³³ Noro imaliane oro eiai oro ane oro imali’ina noro eiai, oi avioia ana noro mi’ina? uku namea a’a awku orau li’ina.

³⁴ Noro aru ara‐emiane oro ane oro mere kavani miai noro araea’araeali’ina, oi avioia ana? uku namea a’a aru ara‐awmi’ina namea a’a eiai uku kavani ipi’ipia miai.

³⁵ Nomo mani a’a umu‐ekane, imali’ine, ara‐awmi’?-?ine ane, kavani pa araea’?-?araealiai; nomo kavani ovara?-?mai keiakana, Mukua Epe’epe enu mere noro keiakana: uku U umu keina umu eria namea a’a eiai.

³⁶ Noro umu keine, orau nomo Mai awku umu keina.

³⁷ Voa pa veve’eai, noro voa vevenaiakeiapea; a’a mua pa awkavai, noro mua?-?nakavakeiapea: paue’awmi’ine, noro paue‐namiakeia?-?kana.

³⁸ La’aruku awkune, la’aruku nakuakeiakana; ikiau evopoakeia, oiniakeia, upuakeia, nakuakeiakana. Uku ikiau ipi’ipia noro ipina orau ipiakeiakana noro eiai.

³⁹ Aipo voa U erau voa veve’einave, Inamu‐apua a’a inamu‐apua a’a e oravai amali’i? orere aroa laru ai aravapeana?

⁴⁰ Aivara una amua upa mere keiape: a’a kavakava anana evere’eakeia’ane una amua orau u keiakana.

⁴¹ Uku oiana iri‐uku mau’u ni inamu‐ekiawkana ni aroa a’a anu inamu laru ai, a iri‐uku ovara ni inamu laru ai ni laikora‐nikiapea?

⁴² Ni aroa a’a ni eka’amakurumau, Ovaki e, iri‐uku mau’u ni inamu mere nai uakinamiki, iri‐uku ovara ni inamu laru ai ni laikora?-?nikiape liane? Ewaea vaki e, pinai iri‐uku ovara mi‐awmi’ine ni inamu mere, ni imai inamu‐oiakana iri‐uku mau’u mi‐awmiai ni aroa a’a anu inamu mere.

⁴³ Uku iri ima uru ivave a‐merinakea; iri ivave uru ima a‐merinakea.

⁴⁴ Uku iri inu uru iri kavakava ipaliakeina. Uku aimu mere a’a veila akounakea, kaia manumanu mere a’a ma a‐awkeke?-?nakea.

⁴⁵ Ima a’a una umu mere ima awku mi‐anena; lipi a’a una umu mere lipi awku mi‐anena: uku umu unu veruku mere ane epo voa kuruna.

⁴⁶ Uku oiana noro Amua, Amua, iroina, noro awku liape liane Nai nakina?

⁴⁷ A’a kavakava Nai ai anena, Na voa virina, kamaia‐ekana ane, una aipo Nai ipanakiakana:

⁴⁸ U a’a orau marea la‐okamakina, u kae aroa korana, u’uri rawre upa mere aiekina; ere aru anea’ane, ere ovia marea vakiane, ere marea vanovanoliai liapea, uku marea kane la‐okavakeina.

⁴⁹ A kurua a’a u viriane euna, kamaialiape ane, u a’a orau una marea ururu unu kae ai u la‐oka’ane euna, marea u’uri kane mako miape; ere ovia ei marea vakina, marea emoki oa’ana, marea anu upupua ovara mai keina.