Luka 23 - Kuruei Voa Nawawrea 1920

¹ A’a uriria kaupukiakei’inave oro lala’anave, Pilato paku ai ora’anave ane.

² Onai‐awkavai oro awkamakei’inave, erau voa kurumakei’inave, Ene kaki a’a awkono avao ai ei vaki ewaea ipawkia vaki enei auiane euna, a’a eimakei’inave uku kavani Kaisara awkuai, U kurumakei’inave ane U Keriso keina, Amua awku keina.

³ Pilato erau voa veve’enave, Ni Isaraela a’a anu amua ana? U erau voa kurunave, Ni orau kuruna.

⁴ Omoro amua a’a, a’a aruru ane, Pilato erau voa kuruenave, Ei a’a anu namea nai auiape.

⁵ Erau voa oro iviri kurumakei’inave, A’a aruru U iara‐ekamakina uku Una ipawkia voa eiai Iudea eiei iki ai, Galilaia mere pinai?-?limakina anea’anea ei mako ai.

⁶ Pilato ei voa viriaka’ane u veve’enave ei a’a Galilaia a’a ane.

⁷ U ipalimakei’inave Iesu Heroda anu voa vevea eiei a’a kei’inave, Heroda ai u okaivirinave; ou pani ai Heroda awku Ierusalema ai pokoinave.

⁸ Heroda Iesu inamu‐oiaka’ane u kopai‐mai li’inave: uku pani va’au Iesu inamu‐oiai u umuli’inave, uku voa aila u viriaka Iesu eiai; Iesu iva iaki liai u inamu‐oiai u araea’araea‐li’inave.

⁹ U Iesu voa aila veve’enave, Iesu voa eria kurunave.

¹⁰ Omoro amua a’a, kikiria a’a ane, lala’anave, iara onai‐ulau’unave ane.

¹¹ Heroda una aiau kiripai Iesu inaka‐awkamakei’?-?inave, oro keke‐makiri‐awkanave, vaupa a’a kape luki‐awmi’inave, Pilato ai moawku okaivirinave.

¹² Kurua lare ai Pilato, Heroda ane, airu evere’eiakei’inave; orere mani a’a keiaka.

¹³ Omoro amua a’a, a’a aruru unu mai‐oro ane, Pilato kaupukiaka’ane.

¹⁴ U erau voa kuruenave, A’a aruru unu ewaea ipawkia a’a noro ei a’a arekava’ane euna na paku ai: noro paku ai nai voa veve’eane euna, ewaea eria nai auiane euna ou awku eiai noro onai?-?ulauna:

¹⁵ Heroda awku ewaea eria auiane euna uku U eiai: uku Heroda moawku okaiviriane euna ene paku ai, uku eria keina avakeiai.

¹⁶ Ou uku eiai nai vaki‐awmiakana, ururuakana ane.

¹⁷ (Ei pani inu opara uakei’inave purai pani ai a’a monou u ururuai limakina.)

¹⁸ A’a aruru uriria voa araro laeali’inave, erau voa kurunave ane, Ei vaki iou‐mi’ira, Baraba ururura enei eiai.

¹⁹ (Ei a’a, Baraba, uku iara rawre pai’iri laru ai u eaka, avé eiai awku, upi?-?riakei’inave kipura marea laru ai.)

²⁰ Pilato Iesu ururuai umulimakei’inave, voa moawku kuruenave

²¹ Voa araro oro nanali’?-?inave, erau voa kurunave ane, Iri keoa upa mere a’ane, iri keoa upa mere a’ane.

²² Rere kaiane pani u erau voa veve’einave, Oi lipi ana U liane euna? avai uku eria nai auiane euna: nai vaki‐awmiakana, ururuakana ane.

²³ Oro voa araro laeali’inave U avakeia’ane‐iai iri keoa upa mere. Omo voa evere’eakei’inave.

²⁴ Pilato voa evere’enave orau oro umuli’inave.

²⁵ Kurua vaki piriakei’inave iara rawre, avé ane, eiai u ururunave, orau oro umuli’inave; Iesu u ekunave oro liane‐iai orau oro umu?-?li’inave.

²⁶ Oro oravaka‐enama?-?kei’inave, Kurene enu a’a, nawi Simona, oro a’akinave, u avari mere anemakei’inave, una ano ai oro iri keoa ai’inave, uku u vakaruane‐iai Iesu neko ai.

²⁷ A’a aruru ovara awku, a’ero ane, e’e’okanave, oro awni mu’u mailau awkamakei’inave, vikirimakei’inave ane U eiai.

²⁸ Iesu urukimakei’inave, erau voa kuruenave, Ierusalema anu paka e, viki pa liai Nai eiai, a noro eiai vikirine, nomo ukua‐mere awku eiai.

²⁹ Uku lare aneliviai anelia a’a erau voa kuruakana, Kono a’ero kopai‐ekavakeina; ame‐oro awku ame ekuape.

³⁰ Oro akapu erau voa kurueakana, Arane enei upa mere; ruakine ane.

³¹ Oro iri awkiri orau liane, oro iri nawawre orau oiamalimau?

³² Namea a’a rere era?-?vaka‐enamakei’inave e‐avakeiai U kiripai.

³³ Mako nawi La’aro Epamu oro i‐paiaka’ane, iri keoa upa mere oro a’anave, namea a’a rere ane, monou Una eve miki mekai, monou Una eve keau mekai.

³⁴ Iesu erau voa nawki‐awkanave, Mai e, paue’emi’?-?ine, uku oro a‐ipali’inakea iure oro limakina. Oro aua aua miane‐iai Una a’a kape oro kokoranave.

³⁵ A’a aruru inamu‐ekiawkamakei’inave oinave; mai‐oro awku oro awkono avao ai keke‐makiri‐awkanave, erau voa kurumakei’inave, A’a e U iekanave, Eloi inu Keriso, Ie’ea a’a ane, U keia’ane, Una nane U iawkanamoki.

³⁶ Aiau awku kekema?-?kiri‐awkanave, U ai anemakei’inave, iara ere awkumakei’inave ane.

³⁷ Erau voa kurumakei’inave, Ni Isaraela a’a anu amua a’a keia’ane, inikane.

³⁸ Revareva Una uku upa mere erau voa kikiriakei’inave: ISARAELA A’A ANU AMUA EIRE

³⁹ Namea a’a monou eokavakei’inave anara voa erau voa kurunave, Ni Keriso peana? Inikane, enere awku iakane.

⁴⁰ Namea vaki e una a’a anu voa ei’inave, erau voa veve’enave, Ni awku Eloi korelia‐peana, uku ni awku mua anu kavani eiai imumakina?

⁴¹ Opara anana enere imumakina, kavani miki eire enere namea eiai, a ei a’a opara namea liape.

⁴² Ei a’a Iesu erau voa kurunave, Ni eiei Ni ikiriane Ni laikora‐ikine.

⁴³ Iesu erau voa kurunave, Nai kurunina kapoi, Eai lare Nai kiripai ni poko?-?ima Paradiso ai.

⁴⁴ Lare uku unu pani kei’inave, pani va’au iki muru kei’inave anea’anea pukurua pani ai.

⁴⁵ Lare muru awkavakei’inave, omoro marea anu iaa lalava mai‐kapua vimu ai koravakei’inave.

⁴⁶ Iesu voa araro laealiaka’ane, U erau voa nawki‐awkanave, Mai e, Ni eve mokono ai Na avaea Nai aina: U orau kuruaka’ane, U imunave.

⁴⁷ Aiau marevaki awku liakei’inave u inamu‐oiaka’ane, u Eloi avioinave, erau voa kurunave ane, Ei a’a opara anana a’a kapoi.

⁴⁸ A’a aruru uriria i‐kaupukiakei’inave, awku liakei’inave oro inamu‐eimakei’inave, omo ukari vakimakei’inave oro pai’iri ai vairunave.

⁴⁹ Una a’a uriria, a’ero ane, e’e’okanave Galilaia mere, ei awku inamu‐eimakei’inave oro amai mere oinave.

⁵⁰ Sunederi a’a monou, nawi Iosepa, u ima a’a, opara anana a’a ane, kei’inave:

⁵¹ (Sunederi a’a anu opara Iesu eiai u evere’eakape; ) U Arimatea a’a Isaraela a’a anu pai’iri: Eloi inu eiei eiai u awku aioiaka‐pokoinave.

⁵² Ei a’a Pilato ai enanave, Iesu unu kape miai u nawki‐awkanave.

⁵³ U kape iri keoa upa mere iou‐mi’inave, kapua pirinave, lauoi nawawrea laru ai i’inave ane, lauoi rawre laru ai koravakei’inave, a’a e ei lauoi laru ai a’i’iakei’?-?inavea.

⁵⁴ Purai pei evere’ea lare eire, Sabati lare arekamu ai kei’inave.

⁵⁵ A’ero awku U kiripai Galilaia mere aneaka, oro e’e’okanave, lauoi inamu‐oinave, mako awku lauoi laru ai Una kape kei’inave.

⁵⁶ Oro pai’iri ai vairunave, mera muri muramura oro karikinave, vupu unu ipawkia voa orau oro Sabati lare laikai’inave.