Luka 22 - Kuruei Voa Nawawrea 1920

¹ Veila ika eria pu purai arekamu ai anenave, purai nawi Pasova oroiakei’inave.

² Omoro amua a’a, kikiria a’a ane, uku evoromakei’inave oro Iesu a’ane‐iai; uku a’a aruru oro kore kei’inave.

³ Satani Iuda ikirinave, u aivara 12 inu kaupu a’a kei’inave, nawi mo Isakariota u oroiakei’inave.

⁴ U elenave, omoro amua a’a, aiau marevaki a’a ane, kiripai u voa kurunave, u Iesu anai‐aviane‐iai.

⁵ Oro kopaili’inave, kuruei voa kurunave ane uku moni kavani oro awkuakana.

⁶ Omo voa kavani eiai u evere’enave, u pani aioiaka‐pokoinave a’a aruru U kiripai a‐pokoinavea ane, uku anai‐aviai.

⁷ Veila ika eria pu purai lare anenave, kurua lare Pasova mamoe ukua avai limakina.

⁸ Iesu Petero, Ioane ane, ekaivirinave, erau voa kuruenave ane, Enara, pasova pei evera, enei na’ane‐iai.

⁹ Orere erau voa veve’enave, Enere pei eka’ama?-?evemau?

¹⁰ U erau voa kuruenave, Akoi’i, norere pai’iri ikiriane, a’a au‐nakuakana, ere vana vakarumakeiakana; e’e’okane marea laru ai u ikiriakana.

¹¹ Norere marea anu mai?-?vaki erau voa kuruakana, Amua vevenina, aki a’a anu lalava ekeiana, Nai pasova pei i‐navakana Na aivara kiripai?

¹² Marea upa mere lalava ovara u ipanakiakana, aru uakeina ane: iou ai pei evene.

¹³ Orere enanave, auinave ane orau U kureaka: pasova pei orere evenave.

¹⁴ Pei pani aneaka’ane, iva a’a 12 kiripai U pa’anave.

¹⁵ U erau voa kuruenave, Umu miki Nai umuliane euna ei pasova pei navai noro kiripai Na kukunu pani paku ai.

¹⁶ Uku Nai kurunaina, Ei purai inu pei Nai moawku na’apea, anea’anea ei purai inu miki iki evere’eakeia’ane Eloi inu eiei laru ai.

¹⁷ Koiri U mi’inave, nawki‐awkanave ane, U erau voa kuruenave, Mi’ine, noro aua‐mi’ine ane noro awkono avao ai;

¹⁸ Uku Nai kurunaina, Iri uru unu ika Nai na’apea anea’anea Eloi inu eiei anea’ane.

¹⁹ Pu awku U mi’inave, nawki‐awkanave ane, vepenave ane, au‐ekunave ane, erau voa kuruemakei’inave, Na kape eire awkuakeina noro eiai: uku laikora‐ikiai ei opara li’ine.

²⁰ Pei oailiakeia’ane koiri awku U au‐ekunave, erau voa kuruenave, Ei koiri kuruei nawawrea keina i Na aro evere’eakeina, Na aro orekavakeina noro eiai.

²¹ Akoi’i, kurua vaki anai?-?avi’imakina una eve Nai kiripai pakara ai keina.

²² Orau evere’eakei’inave A’a anu Mere Una kapea enana kapoi: au’a Una anai‐avia vaki eiai!

²³ Oro voa veve’eimakei’inave eka vaki ana ei opara liakana.

²⁴ Oro voa kavakava ekinamakei’inave uku kurua a’a omo amua evere’eakana.

²⁵ U erau voa kuruenave, Lai unuku a’a amua a’a mi’ina amua‐ekavai; oro ane oro amua‐ekana oro paioka a’a eroiakeina.

²⁶ A noro orau keiapea: a kurua a’a noro awkono avao ai amua keina, kikoro a’a orau u evere’enamoki; u ane u amua a’a keina, aivara a’a orau u evere’enamoki.

²⁷ Ekara a’a amua a’a keina, u ana u pei navai pa’ana: pei kamaia awkua a’a ana? U peana u pei navai pa’ana? a Nai noro awkono avao ai pei kamaia awkua a’a orau keina.

²⁸ Noro Nai kiripai pokoiane euna Na kukupuna pani ai.

²⁹ Nai eiei nakuna orau Na Mai eiei ikuane euna;

³⁰ Na eiei laru ai Na pakara ai noro pei nava’ane‐iai, amua pakara upa mere papa’ane‐iai Isaraela kaki a’a 12 voa veve’eimakeia’?-?ane‐iai.

³¹ Amua erau voa kurunave, Simona e, Simona e, Akoi’i, uku ni‐miai Satani nawki‐awkava’ane euna, u mumunu‐nikava’ane‐iai orau kawni mami mere mumunu?-?awkavakeina:

³² A ni eiai Nai nawki‐awkava’ane euna, ni pirimaroakoa aveninavaia: ni a’a miki lai urukiane, ni aroa a’a ni paiekava’ane‐iai.

³³ U erau voa kurunave, Amua e, nai iviri keina Ni kiripai kipura marea ai enavai, imuai ane.

³⁴ Iesu erau voa kurunave, Petero e, Nai nikina, kokora‐vaki ei lare vikiriapea, anea’anea pani rere kaiane ni kuruane ni ipa?-?ilauapea.

³⁵ U erau voa veve’einave, Moni eria, pei akeke eria ane, rawre are eria ane Nai nakaivirinave’ane, noro peipei oea ama‐rokoa’e? Oro erau voa kurunave, Ai, awku eria enei oea‐rokoanave.

³⁶ U erau voa kuruenave, Kurua a’a u moni mi’ina una moni u mi’inamoki, orau awku a’a pei akeke mi’ina, u mi’inamoki: kurua a’a rawve eria mi’ina, una a’a kape u inaea‐li’inamoki u rawve inaealiane‐iai.

³⁷ Uku Nai kurunaina ei Iaa revareva voa kikiriakeina Nai eiai evere’eiai limakina, Namea a’a kiripai U akoakei’inave: uku ou voa Nai eiai evere’ea mi’ina.

³⁸ Oro erau voa kurunave, Amua e, Akoi’i, rawve rere eu aku. U erau voa kuruenave, Oaio!

³⁹ U elemanenave, Una opara orau U Oliveta akapu ai enanave; Una aivara e’e’okanave.

⁴⁰ U i‐paiaka’ane U erau voa kuruenave, Nawki‐awkane, noro ailia mi’inavaia.

⁴¹ Rawre koroia anu eiei oro mere U laikinave; U are epo ai’inave, nawki‐awkanave ane.

⁴² Erau voa kurumakei’inave, Mai e, Ni umuliane, ei koiri Nai mere lai‐awkane: a Na lai peo, Ni lai li’inamoki.

⁴³ Aivara‐avaea pani muku mere Una paku ai erenave, iviri‐awkamakei’?-?inave ane.

⁴⁴ Uku lai kukunu ovara U iviri nawki‐awkanave: Una la’ania aro orau ka’e ai ara’amakei’inave.

⁴⁵ Nawki‐awkava mere U la’avaka’ane, Una aivara ai aneaka’ane, uku omo lai kukunu oro awaw‐keimakei’?-?inave U auienave,

⁴⁶ U erau voa veve’einave, Uku oiana noro awawkeimakina? lala’ane, nawki‐awkane ane, noro ailia mi’inavaia.

⁴⁷ U voa kurumakei’inave ane, a’a aruru Iuda omo paku ai U ai anenave, Iuda aivara 12 unu kaupu a’a kei’inave, uku Iesu epo?-?awmiai, u Iesu arekamu ai anenave.

⁴⁸ Iesu erau voa veve’enave, Iuda e, A’a anu Mere ni epo ama‐awmi’i ni anai‐aviane‐iai?

⁴⁹ Oro Iesu avikimakei’inave ei awku inamu‐eiaka’ane, oro erau voa veve’enave, Amua e, enei rawve ama‐vakimau?

⁵⁰ Omo a’a monou omoro amua anu aivara vaki‐awmi’inave, una eve miki mekai keporo ei’inave ane.

⁵¹ Iesu erau voa kurunave, Noro evere’i’ine. A’a anu keporo U nekenave, aukarikanave ane.

⁵² Omoro amua a’a, omoro marea aiau unu marevaki ane, mai‐oro ane, Iesu piriai aneaka’ane, U erau voa veve’einave, Rawve, iri iei ane, avapu no’ovea a’a orau piriai, noro ama‐ane’i?

⁵³ Lare kavakava Nai noro kiripai omoro marea laru ai pokoiaka’ane, ipiriai noro eve oiokavakape; a nomo pani eire, muru unu iva pani ane.

⁵⁴ Oro pirinave, arekanave ane omoro amua a’a anu marea ai. Neko ai amai mere Petero e’e’okanave.

⁵⁵ Oro marea anu vara laru ai iau awkuaka’ane, papa’avaka’ane, Petero oro kiripai pa’avaka.

⁵⁶ Aivara paka monou inamu‐oinave u iau paku ai pa’amakei’inave, u iviri ekiawkamakei’inave, erau voa kurunave ane, Ei vaki awku U kiripai uarokoanave.

⁵⁷ U erau voa kurunave, Ai, a’e, nai ipa‐ulauapea.

⁵⁸ Maura pani a’a inamu‐oinave, erau voa kurunave ane, Ni awku ei kaupu unu a’a keina. Petero erau voa kurunave, Ai, vaki e, nai ei kaupu unu a’a peo.

⁵⁹ Pani va’au apea neko mere ai a’a mo erau voa kurunave, Ei vaki U kiripai uarokoanave kapoi: uku u Galilaia a’a keina.

⁶⁰ Petero erau voa kurunave, Vaki e, ni voa nai ipapeo. U voa kurumakei’inave ane kokora vaki emoki vikirinave.

⁶¹ Amua urukinave, Petero inamu‐ekiawkanave ane. Petero voa laikorakinave Amua kuruaka, Kokora vaki vikiriapea anea’anea ni kuruane pani rere kaiane ni ipa?-?ilauapea.

⁶² Petero elenave, viki ovara u vikirinave ane.

⁶³ A’a Iesu a’akinave oro keke‐makiri awkanave, vaki?-?awmi’inave ane.

⁶⁴ Una inamu oro kapua piriaka’ane U inamu‐oinavaia, Una paku oro vaki?-?awmi’inave, erau voa veve?-?enave ane, Ipakine Ni lai korava a’a keina, koama vaki‐nimi’e?

⁶⁵ Awku e aila oro mai‐voa kurunave U eiai.

⁶⁶ Merea pani ai a’a aruru unu mai‐oro, omoro amua a’a ane, kikiria a’a ane, kaupukinave. Omo voa vevea marea laru ai U arekavakei’inave, oro erau voa veve’enave,

⁶⁷ Ni Keriso ana? Ni akine. U erau voa kuruenave, Nai nakiane noro pirimaroakoapea:

⁶⁸ Nai voa vevenaiane, kavani voa noro ikuapea, noro ururuiapea.

⁶⁹ Ei pani mere opai keiakana A’a anu Mere Eloi inu iva eve miki mekai pa’avakana.

⁷⁰ Oro uriria erau voa veve’enave, Ni Eloi inu Mere ana? U erau voa kuruenave, Lia, orau noro kuruna, Nai U keina.

⁷¹ Oro erau voa veve’enave, Oi oea ana uakeina ione voa e eiai? uku Una ane epo mere ione voa enei viriane euna.