Luka 12 - Kuruei Voa Nawawrea 1920

¹ A’a aruru U ai kaupukiaka’ane, uku a’a aruru aruru oro are eunimakei’?-?inave, Una aivara U pinai erau voa kuruenave, Parisea a’a anu paruava veila ika noro oivirine, kurua voa anu miki, ewaea voa oivirine.

² Uku awku kavakava ruawkiakeina u ipawkiakeiakana; awku vauakavakeina u ipaliakeiakana.

³ Voa kavakava noro muru ai kuruane euna, ou voa pamea ai viriakeiakana; voa awkuauakeia lalava laru ai noro kuruane euna, ou voa marea i’i ai are opakava?-?keiakana.

⁴ Na a’a e Nai kurunaina, Kore pa liai oro eiai oro kape a’ana, mo liai oro iva eria mi’ina.

⁵ A Nai nakima uku u eiai noro kore miakana: Kore mi’ine u eiai u a’ane euane, u iva mi’ina a’a Gehena ai kaiai; Nai kurunaina kapoi, Kore mi’ine u eiai.

⁶ Naku mau’u 5 inaealiakeia peana peni monou eiai, naku mau’u monou lai aika?-?vakeiape Eloi inu paku ai?

⁷ Nomo uku unu kimari uririra akoakeina. Ou uku eiai kore pa liai; uku inaealia kavani naku mau’u aila aila eiai mau’u keina, inaealia kavani noro eiai ovara keina.

⁸ Nai kurunaina, A’a kavakava iki e’i’iakana a’a anu paku ai, A’a anu Mere iki e’eakana Eloi inu aivara avaea paku ai:

⁹ A u inaka‐ikavakana a’a anu paku ai, u inaka‐awkavakeiakana Eloi inu aivara avaea anu paku ai.

¹⁰ A’a ane A’a anu Mere u aviakana, u paue’awmia?-?keiakana: a u ane u mai‐voa kuruna Avaea Iaa eiai, u paue‐awmiakeiapea.

¹¹ Oro arenakavakeia’ane omoro marea ai, voa vevea a’a anu paku ai, amua a’a anu paku ai ane, lai kukupuna pa miai kavani voa eiai, uku voa noro kuruakana.

¹² Uku pani miki Avaea Iaa ipanakiakana voa eiai noro kuruai limakina.

¹³ A’a aruru unu a’a monou erau voa kurunave, Amua e, na airavaki awkine enere omoro‐pei kokoravai na aua nai miane‐iai.

¹⁴ Iesu erau voa kurunave, Koamakuru’i Nai ni voa vevea a’a, ni aru korava a’a keina?

¹⁵ U erau voa kuruenave, Oivirine iawmia opara eiai: uku a’a anu aru evereverea una rokoa anu ikiau peo.

¹⁶ Aipo voa U erau voa kuruenave, Amua a’a monou unu aura pei mo’onu la’anave:

¹⁷ Una lai laru ai u erau voa veve’enave, Nai oiama?-?limau, nai mako eria mi’ina na aurapei roikiai?

¹⁸ U erau voa kurunave, Ei awku nai liakana, na aura?-?pei roikia marea nai enakavakana, marea ovara la?-?ekavakana ane; aurapei uriria, na aru ane, laru ai nai i‐roikiakana.

¹⁹ Na imunu nai erau voa kuruakana, Imunu e, pei mo’onu roikiakeina ni mi’ina, aumeia aila eiai; pa’ane, pei nane, kopaili’ine ane.

²⁰ A Eloi erau voa kurunave, Avuavu a’a e, ei kipere ni imunu ni mere iou‐miakeiakana: ei peipei ni roikiane euna koama‐mimau?

²¹ A’a peipei roikina u eiai u orau keina, u amua a’a peo Eloi inu paku ai.

²² Una aivara U erau voa kuruenave Ou uku eiai Nai kurunaina, Lai kukupuna pa miai nomo rokoa eiai, uku pei noro navakana; uku a’a kape ane noro luki’emiakana.

²³ Uku rokoa pinai keina, pei neko mere ai; kape awku pinai keina a’a kape neko mere ai keina.

²⁴ Naku inamu‐eine: oro voeape, oro roikiape; pei roikia marea oro miape; Eloi pei ekuna: noro naku paku ai peana?

²⁵ Nomo a’a koana u laikora’ane una rokoa u va’au eai li’ina?

²⁶ Awku mau’u miki liai noro liape liane, uku oiana noro laikorana uku awku e eiai?

²⁷ Aua inamu‐eine oro lala’ana: oro iaki liape, oro nouape ane; Nai kurunaina, Solomona anu vaupa a’a kape uriria u lukiaka’ane, una vapara ei aua anu vapara ipi’ipia‐a‐kei’inavea.

²⁸ Eloi pono vapara luki‐awmiane, pono eai lare rokona, namai lare iau laru ai ruawkavakeina; U luki?-?namiapeana, noro e, pirimaroakoa mau’u a’a e.

²⁹ Pei noro navakana noro pa voroai, lai rere awku noro pa miai.

³⁰ Uku ei awku uriria eiai pani va’au unu kaki a’a evorona: nomo Mai ipali’ina ei awku noro oea‐rokona.

³¹ Eloi inu eiei noro vorone, ei peipei uriria awku nakuakeiakana.

³² Kore pa liai, kaupu mau’u e; nomo Mai kopai mi’ina Eiei nakuai.

³³ Aru noro mi’ina noro inaeali’ine, la’aruku ekune ane; moni maua mi’ine oro umu evere’eapea, vaupa aru opai pani muku ai, iou ai avapu a’a aneape, ano awku navape.

³⁴ Uku iou ai nomo vaupa aru uakeina, nomo umu awku uakeina.

³⁵ Nomo muri epirina?-?meki, nomo lamepa iau ekunameki.

³⁶ Noro awku evere’enameki a’a orau omo amua aioiaka‐pokoina, u a’e‐mia purai mere vairuane; u anea’ane, kikau vakiane oro kikau emoki auane‐iai.

³⁷ Amua anea’ane aivara aioiaka‐pokoimakina u auieane, oro kopai‐ekavakeina: Nai kurunaina kapoi, una muri u eme piriakana, pei navai papa’avai u ekiakana, u pei au‐ekuakana ane.

³⁸ Kokora pinai viki pani naea, merea pani naea, u anea’ane, oro aioiaka‐pokoimakina u auieane, ei aivara kopai‐ekavakeina.

³⁹ Mikio, marea anu mai?-?vaki ipaliaka livilia pani avapu a’a anea’ane, u oiviriaka, evere’eakape avapu a’a una marea ikiriai.

⁴⁰ Noro awku orau aioiaka‐pokoine: uku kurua pani noro a‐laikoranakea A’a anu Mere anena.

⁴¹ Petero erau voa veve’enave, Amua e, ei aipo voa Ni amakuru’a’i, a’a uriria eiai ana?

⁴² Amua erau voa veve’enave, Aivara miki, lai evera ane, u koana, amua are’eakana una marea aivara eiviriai, omo pei pani miki ekuai?

⁴³ Kurua aivara orau limakina una amua auina u anea’ane u kopai‐awkavakeina.

⁴⁴ Nai kurunaina kapoi, Kurua aivara u are’eakana una aru uriria eiviriai.

⁴⁵ Kurua aivara una umu laru ai erau voa kuruane, Na amua pani va’au aneliviai anelia; aivara ukua, aivara paka ane, u vaki’emi’?-?ina, u pei na’ana, awpa nanina ane, u ailo keia’ane;

⁴⁶ Kurua aivara anu amua vairuakana ou pani ai aivara aioiaka‐pokoiapea, u aivara laoiakana u namea a’a kiripai pokoiane‐iai.

⁴⁷ Kurua aivara una amua anu lai ipali’inave, una amua anu anea eiai u evere’eakape, u vaki‐vaki’emia?-?keiakana.

⁴⁸ A kurua a’a u paua?-?paua kei’inave, u namea li’inave ane, u vaki ailapea vaki’awmiakeiakana. Uku a’a mo’onu awkuakeina, u mere mo’onu umuliakeia?-?kana: mo’onu a’a awkuane euna, u mere oro mo’onu miki nawki‐awkavakana.

⁴⁹ Iau awkuai pani va’au ai Nai anenave; Nai umu?-?oiama‐li’i, Iau awkuakeiaka livilia?

⁵⁰ Bapatiso uakeina Nai eiai, anea’anea kurua bapatiso evere’eakeia’ane, i lai kukupuna Nai ipiriakeiakana.

⁵¹ Noro amalaikora’i Nai anenave pani va’au airu awkuai? Ai, Nai nakina, mani mi‐aneai Nai anenave.

⁵² Uku ei pani mere a’a 5 marea monou laru ai pokoiakana, a’a rere kaiane i mani kokoravakeiakana a’a rere mere.

⁵³ Mekai i mani korava?-?keiakana uku mere eiai, orau mere uku mekai eiai; mei mani keiakana uku paka eiai, paka awku mani keiakana uku mei eiai; ono a’e mani keiakana uku ono paka eiai, ono paka awku mani keiakana uku ono a’e eiai.

⁵⁴ U a’a aruru erau voa kuruenave, Awporo inamakina maruru eiei ai noro inamu‐oiane, noro erau voa emoki kuruna, Lai anemakina, lai anena ane.

⁵⁵ Nara kavaea evukima?-?kina noro inamu‐oiane, noro erau voa kuruna, Lare iva keiakana; lare iva aneakana.

⁵⁶ Ewaea a’a e, pani va’au unu veia, kaia anu veia ane, oraiai noro ipali’ina; uku oiana ei pani inu veia noro ipape?

⁵⁷ Uku oiana noro verukua anana voa veve’eape?

⁵⁸ Ni mani a’a kiripai ni enava’ane voa vevea a’a paku ai, kapea ai ni voa evere’ene ni u mere ururua?-?keia’ane‐iai; voa vevea amua a’a anu paku ai u arenika?-?navaia; voa vevea amua a’a polikimani awkinavaia ni?-?piriai, kipura marea ai niravai.

⁵⁹ Nai nikina, ni kipura marea mere elemaneapea anea’anea kavani iki ni awkuane.