Luka 1 - Kuruei Voa Nawawrea 1920

¹ Uku a’a aila ipia‐miane euna uru voa kikiriai awku‐oro eiai enei awkono avao ai pirimaroakoakeina,

² Orau awku‐oro akuakei’?-?inave, enei ione a’a pinai pani mere kei’inave, Iva voa anu omoro a’a ane;

³ Nai ei awku‐oro kevere?-?kevere ipiaka’ane omo pinai pani mere, nai laikoranave opara ima nai awku ei uru voa kikiriai ni eiai Teopilo mai‐vaki e,

⁴ Uku ni voa miki ipaliane‐iai awku‐oro eiai ni a’a anu ane epo mere ipanikiakeia’?-?ane euna.

⁵ Heroda Iudea amua anu pani ai omoro a’a monou, nawi Sakaria, uarokoanave, u Abia anu kaupu a’a kei’inave: una a’e Arona anu kiri a’e kei’inave, a’e enu nawi Elisabeta.

⁶ Orere opara anana kei’inave Eloi inu paku ai, Eloi inu vupu, ipawkia voa uriria ane, orere kamaia‐ekanave.

⁷ Orere ukua‐mere eria miaka, uku Elisabeta kono?-?kei’inave, orere mai‐vaki kei’inave.

⁸ Omoro a’a anu opara orau una pani aneaka omoro a’a anu iaki liai Eloi inu paku ai,

⁹ U omoro marea ikiriaka’ane una iaki mera muri pei iau ruawkavai.

¹⁰ A’a aruru ei pani ai awru iki ai nawki‐awkamakei’inave.

¹¹ U paku ai Eloi inu aivara‐avaea erenave mera muri kokai eve miki mekai oimakei’inave.

¹² Sakaria inamu‐oiaka’ane u varuavakei’inave, kore kei’inave ane.

¹³ Aivara‐avaea erau voa kurunave, Sakaria e, kore pa liai: ni nawki viriakeina; ni a’e Elisabeta mere kiniakana ni eiai, ni nawi Ioane oroiakana.

¹⁴ Kopai ovara‐mai ni kopailiakana; a’a aila kopailiakana u kiniakeia’ane.

¹⁵ Uku u amua vaki keiakana Eloi inu paku ai, iri uru unu ika, ere ailo ane, u navapea; Avaea Iaa u evopoakeiakana una kinia pani mere.

¹⁶ Isaraela a’a aila u urue?-?kavakana Amua omo Eloi inu paku ai.

¹⁷ Elia anu avaea, iva ane, Una paku ai u enavakana, mekai inu umu uruekavai ukua‐mere i, inakalia a’a anu lai uruekavai opara anana a’a anu lai evera i; a’a aruru anana evere’eiai Amua eiai.

¹⁸ Sakaria aivara‐avaea erau voa veve’enave, Nai eka’ama‐ipalimau ei awku evere’eakeina? uku nai, na a’e ane, enere mai‐vaki keina.

¹⁹ Aivara‐avaea erau voa kurunave, Nai Gabariela, u ane u Eloi inu paku ai oina; uku kuruniai nai ikaiviriakeina, ei awku ipanikiai ane.

²⁰ Akoi’i, ni momoakeia?-?kana, voa kuruai aina’aina keiakana, anea’anea ei awku evere’eakeia’ane, uku na voa ni pirimaroakoapea, ei voa pani miki evere’eiakeiakana.

²¹ A’a aruru aioiaka‐pokoinave Sakaria eiai, oro varua’anave u pani va’au awru laru ai pokoinave.

²² U elemaneaka’ane voa kurueai u aina’aina kei’inave: u avaea inamu‐oiaka awru laru ai oro inamu‐oinave: uku voa eria una eve u ekinave u momoakei’inave.

²³ Una iaki omoro marea ai oailiaka’ane, una marea ai u vairunave.

²⁴ Neko mere ai una a’e Elisabeta ia evere’enave, ia 5 u vauakinave, erau voa kurumakei’inave,

²⁵ Orau Eloi ilauane euna, na makiri U iou miane euna ane.

²⁶ Ia 6 pani ai aivara‐avaea Gabariela okaiviriakei’inave Eloi mere Galilaia anu pai’iri ai, pai’iri nawi Nasareta oroiakei’inave.

²⁷ A’e paka ai u enanave, ei paka awkoiaka‐rokoakei’inave, una vaki nawi Iosepa oroiakei’inave, u Davida anu kiri a’a; a’e paka nawi Maria oroiakei’inave.

²⁸ Aivara‐avaea u ai anenave, erau voa kurunave ane, Kopaili’ine naumuki a’e e! Amua ni kiripai pokoina.

²⁹ Uku una voa eiai u varuavakei’inave, una lai laru ai u ipimakei’inave ei kepoia voa anu miki eiai.

³⁰ Aivara‐avaea erau voa kurunave, Kore pa liai Maria e: uku ni naumuki keina Eloi inu paku ai.

³¹ Ni ia evere’eakana, mere kiniakana ane, Una nawi Iesu ni oroiakana.

³² U amua keiakana, Eloi inu Mere oroiakeiakana ane: Amua Eloi Una mai Davida anu amua pakara awkuakana.

³³ Iakobo onu kiri a’a U amua‐ekavakana opai keiakana; Una amua‐eiei periapea.

³⁴ Maria aivara‐avaea erau voa veve’enave, Ei awku eka’ama‐evere’emau, uku nai vaki ipape?

³⁵ Aivara‐avaea erau voa kurunave, Avaea Iaa ni ai aneakana, Eloi inu iva ni?-?muruakana: ou uku eiai ei iaa mere kiniakeiakana ni mere U Eloi inu Mere oroiakeiakana.

³⁶ Akoi’i, ni a’elai Elisabeta, una mai‐vaki inu pani ai u ia‐evere’eane euna: ia 6 eire u nemo keia’ane euna, u ane u kono a’e oroiakei’inave.

³⁷ Uku awku kavakava evere’eai Eloi liai li’ina.

³⁸ Maria erau voa kurunave, Nai Amua anu aivara‐paka keina; ni voa orau evere’enamiki. Aivara‐avaea ave’enave.

³⁹ Neko mere ai Maria Iuda pai’iri akapu ai ema inanave;

⁴⁰ Sakaria anu marea u ikirinave, Elisabeta kepoinave ane.

⁴¹ Elisabeta Maria anu kepoia voa viriaka’ane, upi una ivei laru ai ru’unave; Elisabeta Avaea Iaa evopoakei’inave:

⁴² Voa araro u erau voa kurunave, A’ero awkono avao ai ni kopainikavakeina, ni ivei inu mere ane kopai‐awkavakeina.

⁴³ Uku oiana nai avi’i’iakeina, na Amua anu mei nai ai anena?

⁴⁴ Uku emoki nai ni voa viriaka’ane, upi kopai eiai na ivei laru ai ru’unave.

⁴⁵ A’e ane u pirimaroakoane euna u kopai‐awkavakeina: uku voa Eloi mere awkiakei’inave ou voa evere’eakeiakana.

⁴⁶ Maria erau voa kurunave, Na imunu Amua kepoina,

⁴⁷ Uku Eloi na Iawka na avaea piame’ena.

⁴⁸ Uku U urukiape Una aivara‐paka mere uku una rurupu eiai: Uku ei pani mere a’a kiri uriria kopai?-?awkavakeia a’e oro iroia?-?kana.

⁴⁹ Uku iva Uku awku ovara liane euna nai eiai, Una nawi Iaa keina!

⁵⁰ Una umu uakeina, kiri, kiri mo eiai, Oro eiai oro avioina.

⁵¹ Una iva re U ipawkiane euna. Oro awku omo umu laru ai oro kauakaua kei’inave omo lai evera eiai U laeiane euna.

⁵² Amua a’a omo amua pakara mere U kaieane euna, Rurupu a’a U are’eiane euna.

⁵³ Navai‐navailia a’a pei ima U lai aukinave; Aru‐mia a’a aru kape U laeiane euna.

⁵⁴ Una aivara Isaraela U paioka’ane euna, Una umu laikora‐awkimakina;

⁵⁵ Una kuruei voa ene mai‐oro eiai, Uku Aberahamo, una kiri a’a ane, opai keiakana.

⁵⁶ Maria Elisabeta kiripai ia rere kaiane pokoinave, neko mere ai u vairunave una pai’iri ai.

⁵⁷ Pani miki aneaka’ane Elisabeta mere kininave.

⁵⁸ Una avai a’a, ovaki airavaki ane, oro uru virinave Amua umu‐awkavaka; u kiripai oro kopaili’inave.

⁵⁹ Lare 8 pani ai upi momoa‐eiai oro anenave; una mekai inu nawi Sakaria oro oroinave.

⁶⁰ Una mei erau voa kurunave, Ai, u nawi Ioane oroiakeiakana.

⁶¹ Oro erau voa kurunave, Ni avai a’a kapeo kurua nawi oroiakeina.

⁶² Una mekai eve veia oro veve’enave uku nawi u umuli’ina upi oroiakeiakana.

⁶³ Kikiria rawre, peni ane, mi‐aneai u ekinave, erau voa u kikirinave, Una nawi Ioane: oro uriria varua’anave.

⁶⁴ Una ane emoki aika?-?vakei’inave, una anai ururuakei’inave ane, u voa kurunave, Eloi avioinave ane.

⁶⁵ A’a uriria arekamu ai rokoamakei’inave oro kore evopoakei’inave: Iudea anu akapu eiei iki ei voa upurukiakei’inave.

⁶⁶ A’a uriria ei voa virinave omo umu laru ai ei voa oro eivirinave, erau voa kurumakei’inave, Ei upi oiama‐limau? Uku Amua anu eve U kiripai kei’inave.

⁶⁷ Una mekai Sakaria Avaea Iaa evopoakei’inave, kepoia voa erau voa kurunave,

⁶⁸ Isaraela anu Amua Eloi kopai‐awkavakeina; uku Una a’a U aikavape, iawkava U evere’eane euna oro eiai,

⁶⁹ Enei eiai iviri Iawka U la‐oka’ane euna Davida Una aivara anu marea ai.

⁷⁰ Orau U kuruane euna Una iaa laikorava a’a anu ane epo mere pinai pani mere.

⁷¹ Enei iakavai ene mani a’a mere, oro awku mere oro vai’i‐akana.

⁷² Ene mai‐oro U veruku umu‐ekanave, Una iaa kuruei voa U laikora‐awkinave,

⁷³ Kuruei voa ene mai‐vaki Aberahamo U kurunave,

⁷⁴ Ene mani inu iva mere enei iakavakeia’ane‐iai, Enei kore eria avioiane‐iai.

⁷⁵ Enei iaa, opara anana ane, keia’ane‐iai U paku ai ene rokoa pani iki ai.

⁷⁶ Ni upi e, Amua Epe’epe enu laikorava a’a niroiakeiakana: Uku Amua anu paku ai ni enavakana Una kapea evere’eiai;

⁷⁷ Una a’a aruru lai evera ekuai iawka eiai i namea anu paue’emia eiai,

⁷⁸ I ene Eloi inu veruku umu; I U mere pani merea mukua mere aneakana enei ai.

⁷⁹ Pamea ekuai oro muru ai, imua anu ivawvoa’a ai, papa’amakina, Ene are airu unu kapea ai eravai.

⁸⁰ Upi la’anave, lai iviri evere’enave ane, kekepere ai uapokoinave anea’anea pani miki u Isaraela a’a anu paku ai ereane.