Kolosi 4 - Kuruei Voa Nawawrea 1920

¹ Amua a’a e, opara anana, opara ipi’ipia ane, nomo piria aivara ekune; pa aikavai noro awku Amua mi’ina pani muku ai.

² Eloi nawki‐awkavai noro lari pa liai, ou opara oiviriai noro iviri, kopai ane, li’ine.

³ Nawki‐awkane ane enei awku eiai, omoro iaki inu kikau Eloi auane‐iai enei eiai, enei voa miki omoro kuruane‐iai uku Keriso eiai, U ane U eiai nai kipura piria a’a pokoina.

⁴ Kurua Iva voa nai iki ipawkiane‐iai, uku kurua iaki liai nai kamaia‐ikava?-?keina.

⁵ Pani va’au unu a’a paku ai lai evera rokone, ima pani opara ima liai noro epua a’akine.

⁶ Panipani ai nomo voa la’aruku unu iva mi’inamoki, kavani voa miki noro miane‐iai a’a kavakava anu voa vevea eiai.

⁷ Titiku, u ane u naumuki aroa a’a, paioka a’a miki ane, ene kaupu unu a’a Amua anu iaki ai, ene uru u nakuakana.

⁸ Ei uku eiai nai okaivirina noro ai uku ene uru noro viriane‐iai, nomo umu ane u iviri‐eiane‐iai.

⁹ U kiripai Onesimu awku nai okaivirina, u awku a’a miki, naumuki aroa a’a, u nomo a’a ane. Awku kavakava eu ai liakeina orere nakiakana.

¹⁰ Aritaraku ane, u nai kiripai piriakeina, u keponaina, Mareko ane Banaba anu aro a’e enu mere. Noro voa miane euna u eiai: noro ai u anea’ane, noro umu‐aine.

¹¹ Iesu, nawi Iusutu oroiakeina, u awku keponaina. Oro momoa‐eia anu kaupu a’a. Omo kaupu a’a mere oro e nai kiripai iaki liane euna Eloi inu eiei eiai, nai eiai oro paioka a’a keia’ane euna.

¹² Epapara, u ane u nomo pai’iri inu a’a, Iesu Keriso onu aivara ane, u keponaina, panipani ai u Eloi nawki‐awkamakina noro iviri oiane‐iai, lai anana keia’ane‐iai uku Eloi inu lai kavakava noro eiai.

¹³ Nai ioneliai li’ina uku una iviri miki noro eiai, aroa a’a eiai ane Laodikea ai, oro awku eiai Kierapoli ai.

¹⁴ Luka naumuki mena?-?mena vaki, Dema ane, orere keponaina.

¹⁵ Kepoia voa Laodikea aroa a’a eiai, Nimepa eiai ane, ekalesia eiai ane, oro ane una marea ai oro kaupukina.

¹⁶ Ei revareva noro awkono avao ai oraiakeia’ane, noro orau evere’ene ei revareva Laodikea ekalesia a’a awkono avao ai oraiakeia’?-?ane‐iai, noro awku oraiai limakina revareva nai Laodikea ai okaivirimakina.

¹⁷ Arakipu erau voa awkine. Arakipu e, omoro iaki Amua mere ni miane euna ni oivirine, kurua iaki ni ima liane‐iai.

¹⁸ Ei ika kepoia voa i na eve nai kikirina, nai Paulo. Umu‐ikane uku kipura marea laru ai nai ipiriakeina. La’aruku noro mi’ine.