Kolosi 3 - Kuruei Voa Nawawrea 1920

¹ Keriso kiripai imua mere noro la’ane euane, pani muku unu awku noro evorone, iou ai Keriso ua‐pokoina, Eloi inu eve miki mekai U i‐pa’ana ane.

² Pani muku unu awku, pani va’au unu awku peo, noro umu‐ekane.

³ Uku noro imuane euna, nomo rokoa Keriso kiripai Eloi ai vaua‐awkavakeina.

⁴ Keriso, U ane U ene rokoa miki keina, U ereane, noro awku U kiripai evao’evao ereakana.

⁵ Nomo lai pani va’au unu opara eiai noro ea’ane; lai eve’eve, lai upu ane, lai i’ima ane, eiri umu ane, iawmia uriria ane, imunu avioia opara ioure.

⁶ Ei namea eiai Eloi inu ia’ia aneliviai anelia,

⁷ Nomo lai muru pani ai ei namea opara noro awku li’inave.

⁸ A eai namea kavakava noro lai‐awkavai limakina; ia’ia, iara ane, namani ane, mai‐voa ane, anakaia voa ane, ei voa nomo ane‐epo upu‐li’inavaia.

⁹ Arauau pa nakavai, uku umu nane una opara ane noro auane euna,

¹⁰ Nane nawawrea noro luki‐namiane euna, uku u nawawrea‐eakeimakina lai evera iki ipaliai, una ea Uku unu aipo orau evere’eai.

¹¹ Ei nane nawawrea ai Heleni a’a peo, Isaraela a’a peo, momoa‐eia a’a peo, momoa‐eia eria a’a peo, lai unuku a’a peo, Sikitani a’a peo, piria aivara a’a peo, ururua a’a peo; a Keriso awku kavakava anu aw keina, ene uriria laru ai U rokona ane.

¹² Eloi inu iaa a’a, naumuki a’a ane, orau, umu, lai kekepa ane, lai iva’iva ane, lai kevere‐kevere ane, noro luki‐nami’ine;

¹³ Painamakina, paue’?-?namimakina ane, a’a ane u ia’ia keia’ane a’a e eiai. Orau Amua paue’namiane euna, noro paue’awmiai limakina.

¹⁴ Ei opara uriria upa mere umu luki‐awmi’ine, uku umu paikia anu kau anana keina;

¹⁵ Eloi inu airu nomo umu laru ai amua‐awkanamoki, ei airu ai noro laea‐nalauakei’inave Una kape monou unu a’a; kopaili’ine ane.

¹⁶ Ipawkia voa Keriso eiai aruku vapara orau nomo umu laru ai rokonamoki. I lai evera iki ipanakine, painakane ane, i salamo, awni ane, avaea awni ane, la’aruku nomo umu laru ai awni‐awkane Amua eiai.

¹⁷ Opara noro li’ina, voa ane noro kuruna, awku kavakava li’ine Amua Iesu unu nawi eiai, i U mere ane Eloi Mai noro kopai‐awkana.

¹⁸ A’ero e, nomo vakiro noro umu‐ekane, orau Amua evere’ena.

¹⁹ Vakiro e, nomo a’ero noro umu‐ekane, pa vaki‐emiai.

²⁰ Ukua mere e, uku opara kavakava nomo mei, mekai ane, kamaia‐ekane; uku ei opara Iesu kopai‐awkana.

²¹ Mekai e, nomo ukua‐mere iara pa ekavai, oro paku maroa mi’inavaia.

²² Piria aivara a’a e, nomo pani va’au unu amua a’a kamaia‐ekane; lai kaikai iaki a’a orau apea, a’a e kopai awkavai oro umuli’ina, a uku noro Amua avioina.

²³ Iaki kavakava noro limakina, noro li’ine orau noro liane Amua eiai, a’a eiai peo.

²⁴ Uku noro ipali’ina Amua mere omoro‐aru, nomo kavani orau, noro miakana. Uku Amua Keriso noro kamaia‐awkana.

²⁵ A kurua a’a ane namea u lioko‐lioko, namea anu kavani awkuakeiakana; Eloi a’a naumukiapea uku una pani va’au unu avioia eiai.