Kolosi 1 - Kuruei Voa Nawawrea 1920

¹ I Eloi inu lai nai Paulo Iesu Keriso onu Iva a’a, Timoteo ane, ene aroa a’a:

² Ei revareva Eloi inu a’a eiai, Keriso onu pirimaroakoa a’a eiai ane, Kolosi ai. La’aruku, airu ane, nakuakeinameki Eloi ene Mai mere, Amua Iesu Keriso mere ane.

³ Eloi, ene Amua Iesu Keriso onu Mai, enei kopai‐awkana, panipani ai enei nawki‐awkamakina noro eiai,

⁴ Uku nomo pirimaroakoa anu uru Keriso Iesu ai enei viriane euna, nomo umu unu uru ane noro mi’ina Eloi inu a’a uriria eiai,

⁵ Uku araea’araea eiai pani muku ai oiviriakeina noro eiai. Ei araea’araea eiai noro viriane euna miki inu Iva voa laru ai.

⁶ Uku Iva voa noro ai paiane euna, noro kiripai rokoamakina ane, orau u pani va’au iki upurukiane euna, uru merimakina, mo’onu la’amakina ane, orau u liane euna noro awkono avao ai kurua lare mere Iva voa noro pinai virinave ane, Eloi inu la’aruku noro ipali’inave ane,

⁷ Orau i Epapara noro ipanakiakei’inave, ene naumuki paioka a’a. U Keriso onu omoro a’a miki noro eiai,

⁸ Uku nomo umu eiai, umu ane i Avaea nakuakeina, u akiane euna.

⁹ Ei uku eiai, kurua lare mere nomo uru enei pinai virinave’ane, noro eiai nawki‐awkavai enei aikavape, nanuku‐awkavai ane, lai inu emai parea noro evopoakeia’ane‐iai uku Una lai eiai, lai evera iki, lai pamea ane, noro miane‐iai uku avaea awku eiai;

¹⁰ Noro ima rokoane‐iai Amua kopai‐awkavai, opara anana anu uru noro ipekiane, nomo lai inu pamea la’ane‐iai Eloi eiai.

¹¹ Uku Una iva evao’evao‐mai keina, i iva kavakava noro venea‐naiakeia’ane‐iai, noro evere’naiakeia’ane‐iai, awku uriria kopai, lai kekepa ane, lai iva’iva ane, rokoaka‐emiai.

¹² Eloi kopai‐awkavai ane, U ane U evere’aiane euna Una pamea a’a anu omoro‐aru aua‐miai.

¹³ Eloi ane muru unu iva mere U iaka’ane euna, Una naumuki Mere enu eiei ai U au‐aka’ane euna,

¹⁴ U ai ene iawka enei mi’ina, ene namea anu pauea?-?ioure.

¹⁵ Keriso vauki‐rokoa Eloi inu aipo rokona, awku uriria anu ea pani paku ai U Airavaki Ukua, Amua ane, uarokoanave.

¹⁶ Uku i U awku uriria eiakei’inave pani muku ai, pani va’au ai ane, awku inamu‐eiakeina, vauki‐rokoa awku ane, amua pakara naea, amua eiei naea, kaia omoro amua naea, kaia iva amua naea: i U awku uriria eiakei’inave uku U eiai.

¹⁷ Awku uriria paku ai U ua‐rokona, i U, i U mere ane, pani va’au iki rokona.

¹⁸ Ekalesia Una kape, Una kape enu Uku U. Pinai?-?vaki U, Airavaki U imua a’a mere la’avai, uku awku uriria paku ai U amua keia’ane‐iai.

¹⁹ Uku Mai veruku umuli’inave iaa iva uriria U laru ai rokoane‐iai.

²⁰ Eloi evere’enave i U mere pani va’au airu‐eai Una nane eiai, i Una aro iri keoa upa mere upuakei’inave airu?-?emakina, i U mere, nai kuruna, awku pani va’au ai, pani muku ai ane, airu‐eiai Una nane eiai.

²¹ Noro ane i namea opara noro keke’e a’a naiakei’inave, nomo lai laru ai noro mani a’a kei’inave ane, U airu?-?naiane euna,

²² Una kape ai, i Una imua, Eloi kiripai U airu?-?naiane euna, noro iaa a’a, namea eria, mua eria ane, U narava’ane‐iai Eloi inu paku ai;

²³ Pirimaroakoa nomo u’uri orau noro kane a’aki?-?makeia’ane, nomo araea’araea mere noro laikiape liane, araea’araea ane Iva voa upa mere keina, kurua Iva voa noro viriane euna, pani va’au iki ai omoro kuruakeia’ane euna, kurua Iva voa omoro kuruai nai Paulo evere’i’iakeia’ane euna.

²⁴ Eai na kukunu awkono avao ai kopai nai auiai li’ina noro eiai, kukunu oea‐lima?-?kina, Keriso onu kukunu Una kape, Ekalesia, eiai, na kape ai nai evopona’ana.

²⁵ Nai evere’i’iakeia’ane euna Ekalesia kamaia‐ekavai i iva orau i Eloi ikuakeia’ane euna nomo paioka eiai, uku Eloi inu Iva voa iki nai omoro kuruane‐iai,

²⁶ Kurua voa miki ane, u vaua’awkavakeia’ane euna kiri a’a uriria mere ea pani mere, a eai kurua voa ipawkiakeia’ane euna Una a’a eiai,

²⁷ Ei voa miki inu evao’evao lai unuku a’a eiai oro ipekiai Eloi umuli’ina, ei voa miki, Keriso noro laru ai rokona, evao’evao onu araea’araea.

²⁸ Ei Keriso enei omoro kuruna, a’a kavakava una e’ei ipawkimakina, a’a kavakava voa anu miki ipawkimakina ane, uku a’a kavakava i Keriso anana‐eakeina, a’a kavakava Eloi inu paku ai enei arekava’ane‐iai.

²⁹ Ei uku eiai na venea uriria nai awkuna, nai pirimaroakoamakina Una iva, U ane nai laru ai iaki iviri U limakina.