Ioane 8 - Kuruei Voa Nawawrea 1920

¹ Iesu Oliveta ai enanave.

² Pani merea ai omoro marea ai U vairunave, a’a aruru i‐anenave U ai; U pa’anave, ipekinave ane.

³ Kikiria a’a, Parisea a’a ane, eve’eve‐lia a’e U ai arekanave; oro a’e vimu ai oiai awkiaka’ane,

⁴ Oro erau voa kurunave, Amua e, ei a’e auiakeia’ane euna eve’eve limakina.

⁵ Vupu unu voa laru ai Mose akiane euna eve’evelia a’e rawre awpakiai u imuane‐iai: Ni oiamakuru’i?

⁶ Uku ailiai oro erau voa veve’enave, oro voa miane‐iai oro ailieane‐iai. Iesu uku vaparia‐kinunave, Una eve uru U ka’e ai kikirinave.

⁷ Oro omo voa veve’eioko veve’eioko rokoamakei’inave, Una uku U la‐okanave, erau voa kuruenave ane, Namea eria vaki noro awkono avao u pinai ei a’e rawre awpakinamoki.

⁸ U moawku kape vaparia‐kinunave, ka’e ai kikirinave ane.

⁹ Una voa oro virinave, uku omo lai inu mua oro monou monou elenave, mai?-?vaki oro paku ai elenave a’a mo ane anea’anea oro uriria eleaka: Iesu e i‐pokoinave, a’e ane vimu ai oimakei’inave.

¹⁰ Iesu kape anana liaka’ane, a’e e inamu‐oiaka’ane, U erau voa kurunave, A’e e, ni ailiea a’a ekeiana? A’a kapeo mua‐amanika’i?

¹¹ A’e erau voa kurunave, Amua e, a’a kapeo. Iesu erau voa kurunave, Nai awku mua‐a‐nikanakea: enara, moawku namea pa liai.

¹² Iesu moawku erau voa omoro kuruenave, Nai pani va’au unu Pamea keina, a’a e’e’ikana muru ai u are rokoapea kapoi, rokoa anu pamea u miakana.

¹³ Parisea a’a erau voa kurunave, Ni nane eiai Ni ioneli’ina; Ni ione voa miki peo.

¹⁴ Iesu erau voa kuruenave, Na nane eiai Nai ione?-?liane, Na ione voa miki keina: mako mere Nai anenave Nai ipali’ina, mako ai Nai i‐enamakina ane; mako mere Nai anenave, mako ai Nai i‐enamakina, noro a‐ipali’inakea.

¹⁵ A’a orau awku unu aipo noro voa veve’ena: a’a kapeo Nai voa veve’ena.

¹⁶ A Nai voa veve’eane, Na voa vevea anana keina: uku Nai e rokoakeiapea, uku Nai, Mai ane, U ane U ikaivirinave, enere iki rokoakeina.

¹⁷ Nomo vupu voa laru ai ei voa awku kikiriakeina, A’a rere enu ione voa miki keina.

¹⁸ Nai ione a’a monou ionelimakina uku Nai eiai, Mai awku U ane U ikaivirinave U ioneli’ina uku Nai eiai.

¹⁹ Oro erau voa veve’enave, Ni Mai ekeiana? Iesu erau voa kuruenave, Noro ipa‐a‐ilaunakea, Na Mai awku noro ipa‐a‐ulaunakea: noro ipa‐ilauaka livilia, Na Mai awku noro ipa‐ulauaka.

²⁰ Moni roikia mako ai omoro marea laru ai ei voa Iesu omoro kurunave; a’a eve a‐a’akinavea uku Una pani aneakape.

²¹ U moawku erau voa kuruenave, Nai enamakina, noro ivoroakana, nomo namea eiai noro imuakana: Nai i‐enamakina noro i‐aneai liapea.

²² Isaraela a’a erau voa veve’einave, U nane U ama?-?a’amau? uku U erau voa kuruna, Nai i‐enamakina noro i‐aneai liapea.

²³ U erau voa kuruenave, Noro arau ai mere anena, Nai upa mere anena: noro ei pani va’au unu a’a, Nai ei pani va’au unu a’a peo.

²⁴ Ou uku eiai Nai kurunainave, nomo namea eiai noro imuakana: noro pirimaroakoape liane Nai U keina, nomo namea eiai noro imuakana.

²⁵ Oro erau voa veve’enave, Ni koana? Iesu erau voa kuruenave, Pinai pani mere Nai nakiane euna Uku Nai eiai.

²⁶ Voa aila kuruai, voa veve’eai ane, noro eiai Nai mi’ina: a U ane U ikaivirinave U miki keina; ou awku U mere Nai viriane euna oro eiai kuruai Nai pani va’au ai anea’ane euna.

²⁷ Oro a‐ipali’inavea U kuruemakei’inave uku Mai eiai.

²⁸ Iesu erau voa kuruenave, Noro A’a anu Mere la‐okava’ane, noro ipaliakana Nai U keina, Na nane e Nai awku eria li’ina; a orau Na Mai ipaikiane euna, orau ei voa Nai kuruna.

²⁹ U ane U ikaivirinave U Nai kiripai rokoakeina: U epuri ave’i’iape, uku Nai panipani ai li’ina kurua awku kopai‐awkana.

³⁰ U ei voa kurunave a’a aila pirimaroakoanave.

³¹ Isaraela a’a pirimaroakoanave Iesu erau voa kuruenave, Noro Na voa pirimaroakoane liviai, noro Na aivara a’a kapoi;

³² Voa miki noro ipaliakana, voa miki ururunaia?-?kana.

³³ Oro erau voa kurunave, Enei Aberahamo onu kiri a’a, enei aivara a’a piria‐a‐kei’inavea a’a e eiai: Ni eka’ama‐kuru’i, Noro ururunaiakeiakana?

³⁴ Iesu erau voa kuruenave, Nai kurunaina kapoi, A’a kavakava namea liane u namea anu aivara keina.

³⁵ Aivara una amua a’a anu marea pokoiapea opai keiakana: a Mere pokoiakana opai keiakana.

³⁶ Mere ururunaiane, noro ururunaiakeiakana kapoi.

³⁷ Nai ipali’inake noro Aberahamo onu kiri a’a keina; a i‐avai noro vorona, uku Na voa mako eria mi’ina noro laru ai.

³⁸ Awku Nai inamu‐oiane euna Na Mai kiripai Nai kuruna: awku noro inamu‐oiane euna nomo mai kiripai noro li’ina.

³⁹ Oro erau voa kurunave, Aberahamo ene mai keina. Iesu erau voa kuruenave, Noro Aberahamo onu kiri a’a keia’ane, Aberahamo onu opara noro li’ina.

⁴⁰ A voa miki i‐avai noro umulimakina, a’a ane u voa miki nakiane euna, Nai Eloi mere viriane euna: Aberahamo orau a‐li’inavea.

⁴¹ Nomo mai inu opara noro li’ina. Oro erau voa kurunave, Enei naku‐ukua peo; Eloi U e ene Mai enei mi’ina.

⁴² Iesu erau voa kuruenave, Eloi nomo Mai keia’ane, noro umu‐ikana uku Eloi mere Nai anenave; Nai verukua a’anenavea, U ikaivirinave.

⁴³ Nai voa kuruane uku oiana noro pauapaua keina? uku noro iviri peo Na voa viriai.

⁴⁴ Mai ane noro una mere u diabolo keina, nomo mai inu i’ima liai noro umuli’ina. Pinai pani mere u avé vaki kei’inave, voa miki ai u a‐pokoinavea, uku miki eria u laru ai keina. U arauau kuruane, una lai mere u kuruna: uku u arauau vaki, arauau unu mai ane.

⁴⁵ Uku Nai voa miki nakina, noro ipirimaroakoapea.

⁴⁶ Nomo a’a ekara’ana aili’i’ina Nai namea li’ina? Nai voa miki kuruane, uku oiana noro ipirimaroakoapea?

⁴⁷ A’a Eloi inu a’a keina u Eloi inu voa virina. Noro a‐virinakea, uku oiana? Uku noro Eloi inu ukua‐mere peo.

⁴⁸ Isaraela a’a erau voa veve’enave, Enei voa miki kuruapeana Ni Samaria a’a keina, Ni diabolo awku mi’ina?

⁴⁹ Iesu erau voa kurunave, Nai diabolo miape. A Na Mai Nai avioina, a noro lari‐ikana.

⁵⁰ Na avioia Nai a‐voro?-?nakea: a Monou uarokona, U avioia vorona Nai eiai, U voa veve’ena ane.

⁵¹ Nai kurunaina kapoi, A’a Na voa kamaialiane, u imuapea.

⁵² Isaraela a’a erau voa kurunave, Eai enei ipali’ina Ni diabolo mi’ina. Aberahamo imuakeina, laikorava a’a ane; Ni erau voa kuruna, A’a Na voa kamaialiane, u imuapea.

⁵³ Ene mai Aberahamo u imuakeina, Ni u upa mere areniakeina ana? laikorava a’a ane, oro imuakeina: Ni oiamakuru’i Ni nane eiai?

⁵⁴ Iesu erau voa kurunave, Na nane Nai avioiane, Na avioia eria keina: Na Mai avi’i’ina; U eiai noro kuruna U nomo Eloi keina:

⁵⁵ Noro ipa‐ulauape: a Nai ipa‐ulauna: Nai kuruane, Nai ipa‐ulauapea, Nai noro orau arauau a’a keiakana: a Nai ipa‐ulauna, Una voa kamaiali’ina ane.

⁵⁶ Nomo mai Aberahamo kopaili’inave uku u araea’araeali’inave Na pani inamu‐oiai: u inamu‐oinave, kopaili’inave ane.

⁵⁷ Isaraela a’a erau voa kurunave, Ni kinia pani mere Ni aumeia 50 miape, Aberahamo Ni inamu‐amaoi’e?

⁵⁸ Iesu erau voa kuruenave, Nai kurunaina kapoi, Aberahamo onu kinia pani paku ai, Nai rokoakeina.

⁵⁹ Rawre awpakiai oro rawre uakinave: a Iesu vauakinave, omoro marea mere elenave ane, a’a aruru vimu ai enamakei’inave, U enanave.